Bu uchrashuvda avvalgilaridan farq qilgan bitta jihat ko'rdik. Ya'ni, Bikmaev o'rniga Stanislav Andreev maydonga tushirildi. Bo'ldi, boshqa hech qanday o'zgarish bo'lgani yo'q. Qolgani odatdagidek kechdi. Madhiyamiz baralla kuylandi, barcha futbolchilar davra bo'lib, murabbiydan so'nggi ko'rsatmalarni olishdi. JCh saralashi doirasidagi barcha o'yinlarda bo'lgani singari, uchrashuv boshlanishi oldidan bir daqiqa sukut ham saqlandi. Frantsiyadagi mudhish voqeada halok bo'lganlar yodga olindi.
Birinchi bo'lim
Uchrashuvda to'pni o'yinga kiritish huquqi qur'aga ko'ra Yamanga berilgan ekan. Ammo shunga qaramay bizning «shunqorlar» ilk daqiqadayoq hujumga o'tishning uddasidan chiqa oldilar. Shu bilan hujumlar yomg'iri ham boshlanib ketdi. Raqib darvozasi tomon ilk zarba Sergeev tomonidan yo'llandi. Igorning boshi bilan bergan zarbasi haddan tashqari aniq chiqdi. Shu qadar aniqki, to'p to'g'ri darvozabonning qo'liga bordi.
Gol esa Aziz Haydarov tomonidan kiritildi. Odil Ahmedov sherigini to'p bilan ta'minladi va Aziz jarima maydonchasiga kirar-kirmas, darvoza tomon zarba berdi. Garchi zarba u qadar kuchli bo'lmasada, darvozabon uchun ancha noqulay bo'ldi va o'yinda hisob ochildi - 0:1.
Bo'lim o'rtalariga kelib vaziyat shunday ko'rinish oldiki, o'yinda ustunlik to'liq biznikilar tomonda edi. Yaman terma jamoasi esa maydon markazidan o'tsa, o'zini baxtli his qilardi. Ammo bu ustunlik hisobga ko'chishi biroz qiyin bo'ldi. Sardor Rashidov hujum tashkil qilish uchun bir qator imkoniyatlarga ega bo'ldi. Ammo ulardan foydalana olmadi.
Ikkinchi gol
Terma jamoaning ikkinchi goli biroz kutilmagan vaziyatda kiritildi. Garchi o'yinda ustunlik Babayan shogirdlari tomonda bo'lsa-da, Yaman 30 daqiqaga kelib hujumga o'tib ketgan edi. Bu vaziyatda jurnalistlar va muxlislar tomonidan ko'p va xo'p tanqid qilingan Andreev, ha, o'sha Stanislav Andreev ajoyib tarzda qarshi hujumni boshlab berdi. U tezlikda oldinga o'tib, to'pni Odil Ahmedovga etkazib berdi.
U yog'i esa ma'lum, Ahmedov o'zining odatiy o'yinini, ya'ni, o'sha Andreev­ning eng yaxshi o'yinidan ham bir necha barobar kuchliroq bo'lgan odatiy o'yinini ko'rsatdi va to'pni Server Jeparovga etkazib berdi. Jeparov ham bunday vaziyatdan nima qilish kerakligini juda yaxshi biladi. U uzoqdan kuchli zarba bilan raqib darvozabonini dog'da qoldirdi - 2:0.
Goldan so'ng
Goldan so'ng o'yinning borishi yana sekinlashib qoldi. O'zbekiston terma jamoasi asosan uzoqdan zarba berishga urina boshladi. Ammo bundan naf chiqishi juda qiyin edi. Masalan, Sardor Rashidov va Odil Ahmedov bir necha bor uzoqdan zarba berdilar. Ammo ular harchand kuchli va xavfli bo'lmasin, darvozabon bartaraf eta oldi. Shuningdek burchak to'plaridan ham an'ana­viy tarzda bir ish chiqqani yo'q.
Ikkinchi bo'lim
Uchrashuvning ikkinchi qismi ham deyarli birinchisi kabi boshlandi. O'yinda tashabbus O'zbekiston terma jamoasi tomonida bo'lsada, yaqqol golga tortadigan vaziyatlar yaratishda ijodkorlik ko'zga tashlanmadi. Shu sababli Samvel Babayan hatto o'yinchi almashtirishga hozirlik ko'rayotgan edi. Ammo...
Kutilmaganda 50-daqiqada O'zbekiston milliy terma jamoasi hisobni oshirdi. Kutilmaganda, de­yishga sabab shundaki, gol zaxiraga olinishga tayyorlanayotgan Stanislav Andreev tomonidan kiritildi. Bosh murabbiy o'yin shiddatini oshirish maqsadida Andreevning o'rniga Jasur Hasanovni tushirishga hozirlanayotgan edi. Baxtimizga Babayan bu ishni qilishga bir daqiqa kechikdi va yarim himoyachi bosh bilan berilgan ajoyib zarba evaziga to'pni darvoza to'riga joylab qo'ydi.
E'tiborli tomoni, bu safar ham unga to'pni Odil Ahmedov etkazib bergandi.
Uchinchi goldan so'ng
Biroq aytish mumkinki, uchinchi gol O'zbekiston terma jamoasiga biroz salbiy ta'sir o'tkazdi. Nima sababdandir raqib darvozasi tomon shiddatli hujumlar soni kamayib ketdi. Asosiy e'tibor to'pni nazorat qilish va uzoqdan zarba yo'llashga qaratildi. Ammo Yaman darvozaboni Muhammad Ali Ayyash birinchi golda yo'l qo'ygan xatosidan so'ng ishonchli o'yin namoyish qildi va barcha zarbalarni bartaraf etishga muvaffaq bo'ldi.
Aksincha, ikkinchi bo'limda O'zbekiston terma jamoasi himoyasida bir qator xatolar ko'zga tashlana boshlandi. Hatto eng ishonchli hisoblangan Vitaliy Denisov ham adasha boshlagach, yana nima deyish mumkin. Baxtimizga Aleksandr Lobanov ancha ishonchli o'ynadi va bir qator xavfli vaziyatlarni bartaraf etdi. Agar darvozabonning ishonchli o'yini bo'lmaganda, Yaman ancha oldin hisobni tenglashtirgan va balki o'yinga intriga­ni qaytargan bo'lar edi. Ammo Lobanov bunga yo'l qo'ymadi.
Raqib goli
Shunga qaramay Yaman baribir javob to'pini kiritishga muvaffaq bo'ldi. Uchrashuvga qo'shib berilgan daqiqalar o'tib borayotgan vaqtda Al Sarroriy qulay vaziyatga chiqib bordi va undan unumli foydalandi.
O'tkazib yuborilgan golda barcha himoyachilarni ayblash mumkin. Vitaliy Denisov raqibiga etarlicha qarshilik ko'rsata olmadi va uni qo'yib yubordi. Markaziy himoyachilar esa o'z xududlarini yopishga ulgurmadilar. Oqibatda gol o'tkazib yuborildi. Garchi bu to'p o'yin natijasiga ta'sir o'tkaza olmagan bo'lsa-da, baribir alamli bo'lganini ta'kidlash lozim.
Umid qilamizki, terma jamoa murabbiylar shtabi yo'l qo'yilgan bu xatolardan kerakli xulosa chiqara oladi va kelgusi o'yinlarda uni bartaraf etadi.
O'yinga oid faktlar
Ushbu o'yinda O'zbekiston terma jamoasi, bosh murabbiyi va futbolchilari bilan bog'liq bir qator qiziqarli faktlar qayd etildi. Quyida ular bilan tanishib chiqishingiz mumkin.
Babayanning rekordi
O'zbekiston milliy terma jamoasi bosh murabbiy Samvel Babayan qo'l ostida qatorasiga beshta uchrashuvda g'alabaga erishdi. Bunga qadar hech bir murabbiy terma jamoadagi faoliyatini bunday ijobiy natija bilan boshlashga muvaffaq bo'lmagandi.
Aftidan bu yil «Yil murabbiyi» so'rovnomasida kim g'olib chiqishi u qadar katta savolga sabab bo'lmaydi, shekilli...
Haydarovning ilk goli
Uchrashuvda hisob O'zbekiston milliy terma jamoasi yarim himoyachisi Aziz Haydarov tomonidan ochildi. Yarim himoyachi shu tariqa terma jamoa tarkibidagi ilk goliga muallif­lik qildi.
Albatta buning alohida ahamiyatga ega joyi bo'lmasligi mumkin edi, ammo gap shundaki, Haydarov shu vaqt­ga qadar biror marta ham terma jamoa tarkibida gol ura olmagandi. Aziz termada 73 ta o'yin o'tkazgan bo'lsa-da, biror marta raqiblar darvozasiga yo'l topa olmagan ekan. To'qqizta sariq, bitta qizil kartochka olgan, ammo gol urolmagan.
Ishonamizki, ushbu gol Aziz Haydarovning faoliyatida yagona bo'lib qolmaydi va yarim himoyachi hali bizni ko'p bora xursand qiladi...
Ahmedovning paslari
Yamanga qarshi kechgan bahsda terma jamoa sardori Odil Ahmedov ajoyib o'yin ko'rsatdi. E'tiborli tomoni, u jamoasining barcha gollariga mualliflik qildi.
Uchrashuvda O'zbekiston terma jamoasidan Aziz Haydarov, Server Jeparov va Stanislav Andreevlar to'p kiritishdi. Ularning barchasiga to'pni Odil Ahmedov etkazib berdi.
Bunday natijaga dunyoning mana-man degan pleymeykerlari ham havas qilishi turgan gap...
Haydarovning diskvalifikatsiyasi
Yuqorida yarim himoyachi Aziz Haydarovning goli bilan bog'liq iliq fikrlar bildirdik. Ammo bu o'yindan Haydarov bilan bog'liq yomonroq taassurotlar ham qoladigan ko'rinadi.
Gap shundaki, yarim himoyachi Yamanga qarshi kechgan bahsda ogohlantirildi. Natijada u kelgusi turda Filippinga qarshi kechadigan bahsda maydonga tusha olmaydi. U ilgari ham ogohlantirilgani tufayli bunday huquqdan mahrum bo'lgan.
Agarda Aziz Haydarov saralashning ilk turida KXDRga qarshi kechgan bahsda maydondan chetlatilgani va Yamanga qarshi Toshkentda o'tkazilgan o'yinda terma jamoaga yordam bera olmaganini nazarda tutsak, yarim himoyachi intizom masalasida o'z ustida ancha ishlashiga to'g'ri kelishini ko'rish mumkin...
Davomi InterFUTBOL gazetasi blogida.
— deya xabar beradi uff.uz nashri.