Angliya Premer ligasi dunyodagi eng qiziqarli va murosasiz chempionat ekanligi, eng ko'p sodiq muxlislarga ega klublar ham aynan Angliya Premer ligasida ishtirok etishi hech kimga sir emas. Angliya futbolining yurtimizdagi millionlab muxlislari qiziqishlarini inobatga olgan holda, «UZREPORT TV» telekanali Angliya Premer ligasi uchrashuvlarini O'zbekiston Respublikasida to'g'ridan-to'g'ri efirga uzatish huquqini xarid qildi. 21 noyabr kuni soat 17:30dan boshlab futbol ishqibozlari “Uzreport TV” telekanali orqali Angliya Premer ligasining 13-turidan o'rin olgan “Uotford” – “Manchester Yunayted” jamoalari o'rtasidagi o'yinni to'g'ridan to'g'ri tomosha qilish imkoniga ega bo'lishadi. Bu bellashuv har ikki jamoa uchun juda muhim ekanini ham alohida ta'kidlab o'tish kerak. Lui van Gal shogirdlari jadvalda peshqadamlar safidan o'rin olishga intilishayotgan bo'lsa, “Uotford” Premer ligadagi o'z o'rnini mustahkamlash uchun kurashmoqda.
Muxlislar qiziqarli bellashuv guvohi bo'lishlari aniq. Soat 22:30dan boshlab esa muxlislar “Uzreport TV” telekanalida APL 13-turining markaziy uchrashuvi – “Manchester Siti” va “Liverpul” jamoalari o'rtasidagi o'yinni “jonli efir”da tomosha qilish imkoniga ega bo'lishadi. Mazkur bellashuvning ahamiyati haqida muxlislarga ortiqcha ta'rif berishning hojati bo'lmasa kerak. Angliyaning ikki grandi o'rtasidagi o'yinlar hamisha tomoshabop bo'lib kelgan. “Manchester Siti” bu o'yindagi g'alaba qozonib, muvaffaqiyatli yurishini davom ettirishga intilishi tabiiy. O'z o'rnida Yurgen Klopp qo'lostidagi “Liverpul” ham osonlikcha taslim bo'lmaydi.Mazkur uchrashuv ham futbol muxlislariga ko'plab hayajonli damlarni taqdim etishini taxmin qilish qiyin emas. Angliya Premer ligasi o'yinlarini “Uzreport TV” telekanali orqali kuzatib boring!
— deya xabar beradi uff.uz nashri.