Moskvaning “Lokomotiv” klubi himoyachisi Vitaliy Denisov O'zbekiston terma jamoasidagi holat haqida intervyu berdi.
- O'zbekiston terma jamoasida ishlar qanday kechmoqda?
- Yaxshi, oxirgi beshta o'yinda ketma-ket g'alaba qozonmoqdamiz. Yana Toshkentda printsipial raqibimiz KXDRni mag'lubiyatga uchratdik. Ular ham guruhda birinchi o'ringa da'vogarlik qilmoqda.
- KXDR – guruhdagi yagona jiddiy raqibmi?
- Qolganlar futbol o'ynashni bilmaydi, demagan bo'lardim. Ularning saviyasi ham kuchli. Biz KXDR haqida kam ma'lumotga ega edik. Ularga faqat o'rtoqlik o'yinlari bo'yicha baho berish mumkin. Ammo bunday o'yinlar juda kam bo'ladi.
- Oxirgi uch oyda terma jamoa tarkibida uchta safar o'yinida maydonga tushdingiz? Qaysi mamlakatda kuz yaxshi o'tar ekan?
- Menga Qatarda juda yoqdi. U erga etib borgach, 30 daraja issiqni ko'rib, mazza qildik. Ob havo juda yaxshi.
- Osiyoda siz bormagan davlat qoldimi?
- Birdan eslasam, Yaman va Hindiston hayolimga kelmoqda. Umuman, Osiyoning barcha yirik mamlakatlarida bo'lganman.
- Demak biror hind klubida o'ynab ko'rish uchun sabab bor ekan.
- Yo'q, bunga unchalik ham xohish yo'q. Yaxshisi o'zingizdan bo'lsin, - kuladi Denisov.
- Aytishingizcha Yamanda bo'lmagan ekansiz. Ammo aynan shu jamoa bilan yaqinda o'ynamadingizmi?
- Ha, ammo Yamandagi notinchlik tufayli o'yin Qatarga ko'chirilgan.
- Notinchlik hukm surayotgan mamlakatlar yaqinligi tufayli o'yinlar vaqtida jamoa uchun qo'shimcha xavfsizlik choralari ko'rildimi?
- Politsiya mashinasi bizni hamma joyda kuzatib yurdi. Ammo o'yinlar tinch holatda kechdi. Ko'chada muammosiz yurdik. Hammasi odatdagidek, ammo hamma joyda qo'riqchi qo'yilganini ham aytish kerak. Ilgari bunday emas edi.
- Yaqinda Gilerme “Kuban”ga qarshi kechgan uchrashuv haqida gapirarkan, o'sha yirik hisobdagi mag'lubiyatga sabab topa olmasligini aytdi. Siz bu borada nima deya olasiz?
- Afsuski bunday o'yinlar uchrab turadi. Raqibning tepgan to'pi gol bo'lib ketaverdi, biz esa hech narsa qila olmadik. Bunday vaqtda ruhan juda qiyin bo'ladi.
- Faoliyatingizda yana shunday o'yinlar bo'lganmi?
- Ha, masalan KXDRga qarshi kechgan safar o'yinida birinchi bo'limda to'rtta gol o'tkazib yubordik. U erda ham xuddi shunday bo'lgan edi. Ammo biz ikkinchi bo'limda o'zimizga kelib oldik va nafaqat hisobni tenglashtirishimiz, balki g'alaba qozonishimiz ham mumkin edi.
- Gilerme “Kuban”dan o'tkazilgan gollardan birida aybni o'ziga oldi. Qaysi golligini bilasizmi?
- Burchak to'pidan to'g'ri darvozaga yo'llangan gol.
- Bunday gollarni ilgari ham ko'rganmisiz?
- Ha, terma jamoada va Dnepropetrovskda o'ynaganimda ko'rganman. O'zbekiston terma jamoasida Server Jeparov bunday gollarni urib turadi. U bir marta ko'z o'ngimda shunday gollardan birini kiritgan edi.
- Demak bunday gollar kamyob emas?
- Agar yaxshi texnika va zarbaga ega bo'lsa, bu unchalik qiyin ish emas. Hammasi darvozabon o'zini qanday tutishiga bog'liq...

— deya xabar beradi uff.uz nashri.