Davlatimiz rahbari tomonidan belgilab berilgan yuksak maqsadimiz – jismoniy va ma'naviy etuk, milliy va umuminsoniy qadriyatlar ruhida tarbiya topgan avlodni voyaga etkazish yo'lida sport eng muhim va samarali vositaga aylangan. Zero, tinchlik elchisi deya ta'rif berilgan sport salomatlik, barkamollik, go'zallik, qat'iyat, mardlik, g'urur va iftixor kabi tushuncha va fazilatlar omili sifatida ham e'tirof etilgan. O'tgan davr mobaynida ezgu maqsadga erishish, farzandlarimizning o'z aql-zakovati va iste'dodini to'la namoyon etishi, ularni bugungi va ertangi hayotimizning hal qiluvchi kuchiga aylantirish yo'lida zalvorli ishlar amalga oshirildi.
O'zbekistonning mustaqil taraqqiyot yillarida yoshlarni jismoniy tarbiya va sport bilan shug'ullanishga ommaviy va doimiy jalb qilish davlat siyosati masalasiga, hukumat, parlament hamda davlat hokimiyati mahalliy organlari faoliyatining ustuvor yo'nalishiga aylandi.
Bugun O'zbekiston Milliy Olimpiya qo'mitasi binosida O'zbekiston Respublikasi Madaniyat va sport ishlari vazirligi, Qoraqalpog'iston Respublikasi Jo'qorg'i Kengesi, xalq deputatlari viloyatlar hamda Toshkent shahar Kengashlarining xalqaro sport hamkorligini rivojlantirish hamda 2016 yil Rio-De-Janeyro (Braziliya) shahrida o'tkaziladigan XXXI yozgi Olimpiya va XV Paralimpiya o'yinlariga tayyorgalik ko'rish bo'yicha faoliyatiga bag'ishlangan parlament eshituvlari bo'lib o'tdi.
Parlament eshituvlari O'zbekiston Respublikasi Oliy Majlisi Senatining Tashqi siyosat masalalari qo'mitasi tomonidan Senatning Fan, ta'lim, madaniyat va sport masalalari qo'mitasi hamda O'zbekiston Milliy Olimpiya qo'mitasi bilan birgalikda tashkil etildi. Parlament eshituvlari davomida qayd etilganidek, mamlakatimiz Prezidenti I.A.Karimovning bevosita rahbarligida jismoniy tarbiya va sportni rivojlantirish borasida o'z ko'lamiga ko'ra mislsiz ishlar amalga oshirildi. “Jismoniy tarbiya va sport to'g'risida”gi O'zbekiston Respublikasi Qonuni izchil amalga oshirilmoqda, sport musobaqalarining uch bosqichli tadbirlari yo'lga qo'yilgan. “Umid nihollari”, “Barkamol avlod” va “Universiada” sport o'yinlari yosh avlodni sportga jalb qilishning, sog'lom turmush tarzini ommalashtirishning muhim omili bo'lib xizmat qilmoqda. Bolalar sportini rivojlantirish jamg'armasining tuzilishi esa mazkur soha taraqqiyotining sifat jihatidan yangi bosqichini boshlab berdi.
Shahar va qishloqlarda noyob hamda eng yuqori xalqaro standartlarga javob beradigan sport inshootlari yaratildi, ustoz, murabbiy va instruktorlarni muntazam tayyorlash tizimi yo'lga qo'yildi. Iqtidorli sportchilarni har tomonlama qo'llab-quvvatlash choralari ko'rilmoqda. O'zbekistonda faoliyat ko'rsatayotgan 80 dan ziyod sport federatsiyalari barcha zarur texnik va uslubiy vositalar bilan ta'minlangan, malakali murabbiy kadrlar bilan to'ldirilgan.
Bular barchasining samarasi sifatida Vatanimiz sportchilari xalqaro maydonda tobora muvaffaqiyatliroq ishtirok etib kelmoqdalar. Bugun O'zbekiston jahon sport hamjamiyati tomonidan etakchi sport mamlakati sifatida e'tirof etilmoqda. Sportni rivojlantirishga qo'shgan buyuk xizmatlari hamda o'sib kelayotgan avlod salomatligiga ko'rsatayotgan g'amxo'rligi uchun O'zbekiston Respublikasi Prezidenti I.A.Karimovga Xalqaro Olimpiya qo'mitasi, Osiyo Olimpiya Kengashi, Milliy Olimpiya qo'mitalari assotsiatsiyasining oliy mukofoti topshirilganligi fikrimizning yorqin isbotidir.
So'zga chiqqanlar qayd etganidek, O'zbekiston mustaqillikning ilk yillaridan boshlab Olimpiya harakatini qo'llab-quvvatlab kelmoqda hamda uning faol ishtirokchisi hisoblanadi. Mamlakatimiz yozgi va qishki Olimpiya va Paralimpiya, Osiyo hamda Para-Osiyo o'yinlarida muntazam ishtirok etib kelmoqda. Jismoniy tarbiya va sportning aholi, ayniqsa yoshlarning sog'lig'ini muhofaza qilish, ularning jismoniy, ma'naviy hamda madaniy tarbiyasidagi muhim rolini inobatga olgan holda O'zbekiston doim sport rejimini buzmaslik hamda sportning sofligi uchun kurashga intilib keladi.
Masalani muhokama qilish chog'ida O'zbekiston Respublikasi Prezidentining “O'zbekiston Respublikasi sportchilarining 2016 yil Rio-de-Janeyro shahri (Braziliya)da o'tkaziladigan XXXI yozgi Olimpiya va XV Paralimpiya o'yinlariga tayyorgarlik ko'rishi to'g'risida”gi Qarori ijrosini ta'minlash bo'yicha o'tkazilayotgan ishlarga alohida e'tibor qaratildi. Ayni paytning o'zida qayd etib o'tilganidek, Madaniyat va sport ishlari vazirligi tomonidan Milliy Olimpiya qo'mitasi bilan birgalikda sportchilarning o'quv-mashg'ulot yig'inlarini o'tkazish uchun, xalqaro musobaqalarga jiddiy tayyorgarlik ko'rish hamda musobaqalarda munosib ishtirok etishlari uchun barcha zarur sharoitlar yaratilgan. Amalga oshirilgan ishlar samarasi sifatida joriy yilning noyabr oyiga qadar Vatanimiz sportchilari tomonidan 2016 yil Rio-De-Janeyro (Braziliya) shahrida o'tkaziladigan XXXI yozgi Olimpiya va XV Paralimpiya o'yinlarida ishtirok etishi uchun sportning sakkiz turida 40 ta litsenziyani qo'lga kiritdilar. Oldinda har ikki yirik sport anjumanlariga yo'llanmalar o'ynaladigan ko'plab musobaqalar turibdi va shuni ishonch bilan aytish mumkinki Rio-de-Janeyroda Vatanimiz sharafini himoya qiladigan sportchilarimiz safi yanada kengayadi.
Ma'lumki, 2015 yilning 6 aprel kuni O'zbekiston Milliy olimpiya qo'mitasi xuzuridagi Olimpiyachilarini qo'llab-quvvatlash Fondi boshqaruvining 2016 yili Rio-de-Janeyro shahri (Braziliya)da o'tkaziladigan XXXI yozgi Olimpiya va XV Paralimpiya o'yinlariga yo'llanma olgan sportchilar va ularning murabbiylarini mukofotlash to'g'risida qaror qabul qilingan edi. Majlisda to'rt yillikning eng yirik sport bayramiga litsenziyalarni qo'lga kiritgan bir guruh sportchilar va ularning murabbiylariga O'zbekiston olimpiyachilarini qo'llab-quvvatlash Fondi mablag'lari hisobidan pul mukofotlari tantanali suratda topshirildi.
Majlisda davlat hokimiyati mahalliy organlari tomonidan sport inshootlari va maydonlarini qurish va ulardan to'laqonli foydalanish, sportni ommaviy ravishda rivojlantirish, musobaqalarda yoshlar, ayniqsa xotin-qizlar ishtiroki uchun sharoitlar yaratish bo'yicha qo'shimcha chora-tadbirlar ko'rish zarurligi ta'kidlab o'tildi. Barcha darajadagi xalq deputatlari Kengashlariga mazkur sohada deputatlik nazoratini kuchaytirish taklif etildi.
Muhokama davomida senatorlar va majlis qatnashchilari tomonidan boshqa qator taklif va tavsiyalar bildirildi.
— deya xabar beradi uff.uz nashri.