Ko'z tegmasin, mamlakamiz jadal suratlar bilan rivojlanib bormoqda. Davlatimiz rahbari tomonidan belgilab berilgan milliy g'oya, mafkura va rivojlanish strategiyasi mana, bir necha yildirki, o'zining mevasini berib kelmoqda.
Yurtimizda yosh bolalardan tortib, keksalargacha ardoqda, e'tiborda. Yoshlarga bo'lgan ertangi kungi umid va ishonchni aytmasangiz ham bo'ladi. Hukumat darajasida e'tiborga molik ishlar amalga oshirilmoqda.
Kuni kecha, ajoyib bir tadbir bo'ldiki, u haqida gapirmaslikning ilojisi yo'q. Poytaxtimizdagi muhtasham "Turkiston" saroyida sog'lom axborot muhitini targ'ib qilish maqsadida "MIT.uz — 2015", Milliy Internet tanlovi g'oliblarini taqdirlash marosimi bo'lib o'tdi. Tanlovda 800 dan ortiq veb saytlar har xil yo'nalishda ishtirok etdi.
Marosimni bosh tashkilotchi - "Kamolot" Yoshlar ijtimoiy harakati Markaziy kengash raisi Bahodir Ganiev ochib berdi. Shundan so'ng har xil nominatsiyalar bo'yicha g'oliblar taqdirlanishdi. Hayajonli onlarda biz ham chetda qolmadik. "Sport" yo'nalishi bo'yicha "Yilning eng yaxshi sayti" deb, sizu-bizga begona bo'lmagan, qadrdon - UFF.uz sayti tan olindi. Ikkinchi va uchinchi o'rinlarga Sports.uz va FCB.uz saytlari munosib ko'rildi.
Biz saytimiz xodimlari bunday yuksak e'tirofdan boshimiz osmonga etdi. To'g'ri, saytimiz avvallari ham o'z yo'nalishida uch marta "Yilning eng yaxshi" sayti deya, ten olingan. Lekin, bu safargisi o'zgacha bo'ldi. Futbol tilida aytadigan bo'lsak, saytimiz sovrin olish bo'yicha "poker"ni qayd etdi. Albatta, buning zamirida mashaqqatli mehnat yotibdi. Mazkur sovrin bizga yanayam katta mas'uliyatlarni yuksalishi shubhasizdir.
Fursatdan foydalanib, barchangizga mana shunaqa e'tiroflarga sazovor bo'lish baxtini tilab qolamiz. Sizga ham shunday kunlar nasib qilsin!
Saytimizdagi barcha blogger va foydalanuvchilarga, qolaversa, tanlov tashkilotchilariga minnatdorchilik bildiramiz.
O'zbek sporti va futbolida g'alabalar davomiy bo'lsin! Foto manbasi: http://kamolot.uz
— deya xabar beradi uff.uz nashri.