Soccer.ru sayti ijodkorlari ayni damda ishsiz yurgan taniqli murabbiylar haqida so'z yuritisharkan, ularning hozirda nima bilan band ekanliklariga to'xtalishdi. O'z navbatida, ushbu mutaxassislarning kelgusida qaysi jamoa boshqaruvini qo'lga olishlari mumkinligi borasidagi taxminlari bilan o'rtoqlashdilar.
Karlo ANChELOTTI (Italiya)
Italiyalik murabbiy mazkur ro'yxat ishtirokchilari orasida eng xaridorbopidir. Anchelotti «Qirollik klubi» boshqaruvidan ketdi, lekin Madridni tark etganicha yo'q. Hattoki, «Santyago Bernabeu»dagi o'yinlarni stadionning o'zidan turib kuzatish maqsadida abonement ham sotib oldi va sobiq jamoasini har bir o'yinda qo'llab-quvvatlamoqda. U dunyoning istalgan klubini kuchaytira oladi, o'yinchilar miyasiga o'z g'oyasini singdirishda ustasi farang, jamoani eng yaxshi dasturlar asosida tayyorlaydi. Karloning keyingi ish joyi «Bavariya» yoki «Chelsi» bo'lishi mumkin, ammo hozircha tomonlar mish-mishlarga izoh bermoqchi emaslar.
Marselo B'ELSA (Argentina)
Mavsumni Frantsiya chempionatida boshlagan argentinalik «telba», birinchi turdan so'ng «Marsel»ni tark etdi. Ushbu murabbiy zamonaviy texnologiyalar, olomonning shovqinidan qochib, osuda maskanlarda dam olmoqda. Shunisi aniqki, Marselo ertami-kech baribir, futbolni sog'inadi. Ayni damda u bilan hamkorlik o'rnatish istagini bildirganlar bis­yor.
Fabio KAPELLO (Italiya)
Kapello Rossiyada yomon ishlamadi va vaqtini yaxshi o'tkazdi, unga har taraflama qulayliklar yaratib berildi. Hozircha don Fabioning murabbiylik fao­liyatidagi tanaffus davom etmoqda. Taxminlarga ko'ra, italiyalik mutaxassis yo Londonga yo'l olib, «Chelsi»ni boshqaradi yoki AQShda «Nyu-York Siti» yulduzlariga ustozlik qiladi.
Gus XIDDINK (Gollandiya)
Rossiya terma jamoasining yana bir sobiq bosh murabbiyi. Albatta, uning oxirgi ish joyi ko'p yillar davomida tiklangan obro'siga ozmi-ko'pmi salbiy ta'sir ko'rsatdi. Shov-shuvli tarzda Evropa chempionati yo'llanmasidan quruq qolgan Gollandiya terma jamoasi saralash bosqichini aynan shu mutaxassis bilan boshlagandi. Yaqinda 69 yoshni qarshilagan Xiddinkning futboldan ketish niyati yo'q. Mabodo top klublardan taklif tushsa, Gus uni astoydil o'rganib chiqmoqchi. Masalan, Abramovich «Chelsi»ga chorlasa, rossiyalik oligarxning chorloviga «labbay», deb javob qaytarsa ajabmas.
Lyusen FAVR (Shveytsariya)
Bu mutaxassis o'tgan mavsum Menxengladbaxda ajoyib jamoa shakllantirdi, biroq so'nggi o'yinlardagi omadsizliklardan so'ng unga chiqish eshiklari ko'rsatildi. Bu esa «ayg'irlar»ning foydasiga ishladi. Favrning mahorati va tajribasi muhokamadan xoli. U bilan ish yuzasidan hamkorlik qilishni istaganlar esa bir mavsumlik ijobiy natija emas, balki klubda yaxshi tizim shakllantirishni xohlashmoqda.
Murat YaKIN (Shveytsariya)
Yakin Rossiyadagi muvaffaqiyatsizliklardan so'ng vaqtini oilasi davrasida o'tkazmoqda. Asosiysi, u har doim faoliyatini tiklashga shay. Hozircha faqat takliflarni o'rganib chiqmoqda. Muratning keyingi ish joyi bundesliga bo'lishi mumkin. Albatta, «Spartak»ning sobiq bosh murabbiyi­ni Germaniya klubi boshqaruvida ko'rish ko'pchilikka qiziq tuyulishi tayin.
Alexandro SABEL'Ya (Argentina)
Oxirgi mundialning vitse-chempioni hozirda ishsiz. Argentinalik mutaxassis Evropada ish boshlashi ham mumkin edi: yozda unga «Manchester Siti»dan taklif tushgandi. Tomonlar kelisha olishmadi chog'i, «shaharliklar» Manuel Pellegrini bilan hamkorlikni davom ettirishni ma'qul ko'rishdi. Shuningdek, Alexandroga Saudiya Arabistoni futbol federatsiyasidan ham taklif kelgan, ammo murabbiy bu safar ham rad javobini bergandi. Besh yillik faoliyati davomida Libertadores kubogini qo'lga kiritdi, jahon chempionatida kumush medalga sazovor bo'ldi. Sabelya va Anchelottining yo'llari tutashsa bormi, ular yaratgan harorat va g'oyalari samarasi futbol maydonlariga joziba bag'ishlashi turgan gap.
Davomi InterFUTBOL gazetasi blogida.
— deya xabar beradi uff.uz nashri.