AQShning Xyuston shahrida og'ir atletika bo'yicha kattalar o'rtasida jahon chempionati bahslari boshlandi. 29 noyabrga qadar davom etadigan mazkur dunyo birinchiligida 98 davlatdan jami 609 nafar sportchi (shundan 266 nafari ayollar) g'oliblik uchun kurash olib boradilar.
Hamyurtlarimiz orasida birinchi bo'lib bahslarga kirishgan Adhamjon Ergashev (-62 kg) umumiy hisobda 278 kg bilan 12 sportchi orasida 2-natijani qayd etdi (“S” guruhida). Hozircha Adhamjon Ergashev nechanchi o'rinni egallaganligi ma'lum emas, chunki oldinda ushbu vazn toifasining “A” va “V” guruhi a'zolari ishtirokidagi bahslar turibdi.
22 noyabr kuni yana bir yurtdoshimiz Lola Qodirova (-53 kg) “V” guruhidagi sportchilar orasida bahslarda ishtirok etdi. Ikkikurash yakuniga ko'ra 183 kg natijani qayd etgan hamyurtimiz o'z guruhida 9-o'rin bilan kifoyalandi. Bu holat ayollar terma jamoamizning umumjamoa hisobidagi o'rniga qay darajada ijobiy ta'sir ko'rsata olishini mazkur vazn toifasi yakunlari e'lon qilingach bilib olishimiz mumkin.
Ushbu vazn toifasida eng kuchli “A” guruhida ro'yxatdan o'tgan taniqli sportchimiz Marina Sisoeva bugun bahslarga kirishadi. 23 noyabr kuni, shuningdek, terma jamoamiz a'zolaridan Muattar Nabieva (-58 kg, “V” guruhi) jahon chempionatidagi ishtirokini boshlaydi.
Eslatib o'tamiz, 2016 yili Rio-de-Janeyro shahri (Braziliya)da o'tkaziladigan XXXI yozgi Olimpiada o'yinlarining yo'llanmalari o'ynalayotgan mazkur jahon chempionatida Vatanimiz sharafini 12 nafar sportchimiz himoya qilmoqda. Shavkat Jalilov
Manzil: O'zbekiston Milliy Olimpiya qo'mitasi matbuot xizmati

— deya xabar beradi uff.uz nashri.