AQShning Xyuston shahrida og'ir atletika bo'yicha kattalar o'rtasida o'tkazilayotgan jahon chempionatida to'rtta vazn toifasida g'olib va sovrindorlar nomi ma'lum bo'ldi.
Jumladan, erkaklar o'rtasida vazni 56 kg.gacha bo'lgan sportchilar musobaqasida barcha sovrinli o'rinlar Osiyo vakillariga nasib etdi. Xususan, KXDR vakili OM Yun Chol umumiy 302 kg. natija (dast ko'tarishda - 131 kg, siltab ko'tarishda - 171 kg) bilan birinchi o'rinni egallagan bo'lsa, xitoylik WU Jingbiao 302 kg (139 kg – 163 kg) ko'rsatkich bilan kumush medalni, V'etnam terma jamoasi a'zosi THACH Kim Tuan esa 287 kg (130 kg – 157 kg) natija bilan bronza medaliga sazovor bo'ldi.
Hamyurtimiz Adhamjon Ergashev ishtirok etgan vazni 62 kg.gacha bo'lgan polvonlar musobaqasida xitoylik CHEN Lijun dast ko'tarishda 150 kg, siltab ko'tarishda esa 183 kg. toni o'ziga bo'ysintirdi va ikkikurash yakunlariga ko'ra 333 kg. natija bilan birinchi o'rinni egalladi. Jahon chempionatining kumush medaliga sazovor bo'lgan KXDR vakili KIM Un Guk 328 kg (151 kg – 177 kg) ko'rsatkichni qayd etgan bo'lsa, ozarbayjonlik Valentin Xrestov 317 kg (141 kg – 176 kg) natija bilan bronza medalini qo'lga kiritdi.
Dast ko'tarishda 122 kg, siltab ko'tarishda esa 156 kg toshni o'ziga bo'ysuntira olgan hamyurtimiz Adhamjon Ergashev umumiy 278 kg. ko'rsatkich bilan 22-o'rinni egalladi.
Xotin-qizlar musobaqasida ishtirok etayotgan hamyurtlarimiz qo'lga kiritgan natijalar bilan O'zbekiston Milliy Olimpiya Qo'mitasi rasmiy saytida tanishib olishingiz mumkin...
— deya xabar beradi uff.uz nashri.