Yakunlangan haftada O'zbekiston milliy terma jamoasining xorijda to'p suradigan bir necha a'zosi mahalliy chempionatlar doirasidagi o'yinlarda maydonga tushdi.
Qatar
Qatar Yulduzlar Ligasi a'zosi bo'lgan “Al-Jaish” klubida faoliyat olib borayotgan O'zbekiston milliy terma jamoasi yarim himoyachisi Sardor Rashidov chempionatning 9-turida ham o'z hisobiga gol yozib qo'yishga erishdi. “Al-Jaish” ushbu turda o'z maydonida “Al-Arabiy”ni qabul qilib, yirik — 4:0 hisobida g'alaba qozondi. Uchrashuvdagi uchinchi golni aynan o'zbekistonlik futbolchi o'yinning 54-daqiqasida kiritdi. Rashidov shu vaqtga qadar Qatar klubi safida 9 o'yinda maydonga tushib, 7 bora raqib darvozasini aniq nishonga olishga ulgurdi.
“Al-Jaish” ayni vaqtda o'tkazilgan 9 turdan keyin musobaqa jadvalining 2-o'rinini egallab turibdi.
Rossiya
Dam olish kunlarida Rossiya chempionatining 16-tur o'yinlari bo'lib o'tdi. Markaziy uchrashuvlardan birida “Spartak” o'z maydonida, tarkibida O'zbekiston milliy terma jamoasi sardori — Odil Ahmedov harakat qiladigan “Krasnodar”ni qabul qilib, 3:2 hisobidagi g'alabaga erishdi. Ahmedov ushbu uchrashuvda asosiy tarkibda maydonga tushib, 62 daqiqa harakat qildi.
O'zbekiston terma jamoasining Rossiyada faoliyat olib borayotgan boshqa bir futbolchisi — Vitaliy Denisov ham o'z jamoasi “Lokomotiv”ning ushbu turdagi o'yinida ham asosiy tarkibda maydonga tushdi. O'z maydonida “Anji”ni qabul qilgan “temiryo'lchilar” 0:2 hisobida mag'lubiyatga uchradi va hisobidagi ochkolari soni 30taligicha qoldi. “Lokomotiv” ayni vaqtda turnir jadvalining 3-pog'onasida bormoqda. Ikkinchi o'rindagi “Rostov” bilan to'plagan ochokolari teng.
"Krasnodar"ning ochkolari 24ta va ular ayni paytda turnir jadvalining 6-pog'onasidan o'rin olgan.
Ukraina
Ukraina chempionati vakili “Vorskla” sharafini himoya qilayotgan O'zbekiston terma jamoasi yarim himoyachisi Sanjar Tursunov yakunlangan haftada jamoasining “Goverla”ga qarshi o'yinida maydonga tushdi. Ikkinchi bo'lim avvalidan maydonda harakat qilgan Tursunov o'z jamoasining 2:1 hisobidagi g'alabasiga hissa qo'shdi. Aynan u “Vorskla”ning ikkinchi goliga hammualliflik qildi. 50-daqiqada u uzatgan to'pdan keyin Shinder o'zining o'yindagi ikkinchi golini kiritdi va bu gol jamoaga uch ochko keltirdi.
O'tkazilgan 14 turdan keyin o'zbekistonlik futbolchi va jamoadoshlari turnir jadvalining 5-pog'onasidan joy olib turibdi.
— deya xabar beradi uff.uz nashri.