Xabaringiz bor, O'zbekiston Olimpiya terma jamoasi kelasi yilning yanvar oyida Qatar davlatida AFC U23 — Yoshlar o'rtasidagi Osiyo chempionatida ishtirok etadi. Guruhimizdan Iroq, Janubiy Koreya va Yaman termalari o'rin olgan.
Ushbu musobaqaning yarim finaliga yo'l olgan to'rtta jamoa Rio-de-Janeyroda o'tadigan yozgi Olimpiadaga yo'llanmani qo'lga kiritadi. Yanvar oyidagi o'yinlar biz uchun qanchalik ahamiyatli ekanligini ortiqcha gapirishning hojati yo'q. Olimpiyachilarimiz Rio-2016 chiptasini qo'lga kiritishlari shart bo'ladi.
Bu borada murabbiy ko'rsatmalari bilan birgalikda futbolchilarning mahorat va tajribalari ham qo'l kelishi turgan gap. Chunki, ko'plab holatlarda o'yin taqdirini bitta-ikkita futbolchi hal qilishi mumkin. O'sha futbolchilarning yakka o'zi ko'p narsalarni amalga oshira oladi. Bu narsani jahon tajribasida ko'ryapmiz. Bizda ham shunday futbolchilar bor va ular o'z klublarida ortirgan tajribalarini terma jamoa ixtiyorida yanayam sayqallashmoqda.
Mana shunday futbolchilardan biri - Zabihillo O'rinboevdir!
Bu yigitning tajribasi va saviyasidan to'g'ri foydalana olsak, kerakli natijalarga erishish imkoniyatlari yanayam oshadi. O'rinboev uchta Jahon chempionatini ko'rgan va ularda ishtirok etgan yurtimizdagi yagona futbolchidir. Agar uni to'p bilan ta'minlab turilsa, aksariyat vaziyatlarni golga aylantira oladi. Buni biz bevosita stadionda ham ko'rganmiz.
U hatto Italiyada - "Napoli" klubining akademiyasida tajribasini ortirib qaytgan. Rafael Benites va Edinson Kavanilar bilan uchrashgan va ulardan kerakli saboqlarni olgan.
30 noyabr kuni Viktor Jalilov boshchiligidagi termamiz Toshkentda yig'iladi. Keyin esa, 2-14 dekabr va 19-28 dekabr kunlari yig'in Dubay shahrida davom ettiriladi. Mana shu yig'inlarda futbolchimizni yana bir marta toblash kerak va ko'rsatmalarni berish lozim.
O'rinboev kuchli zarbalarga ega futbolchi. Bundan tashqari, gavjum holatda (to'pga talashish paytida) "original" fikrlab, to'pni ochiq turgan jamoadoshiga aniq etkazib bera oladi va vaziyatdan chiqib keta oladi. Darvoqe, uning aniq uzatmalar berish koefitsienti ham ancha yuqoridir. Bunday futbolchidan to'g'ri foydalana olish murabbiylar shtabining vazifasi hisoblanadi.
Futbol natijasini hujumchilar hal qilishini inobatga olib, qo'lostimizda turgan futbolchilardan oqilona foydalanishni maqsadga muvofiq deb, hisoblaymiz.
Ayni paytda O'rinboev Oliy liga o'yinlaridan ta'tilga chiqqan va terma jamoa uchun borini berishga tayyor holatda turibdi.
Umid qilamiz, Viktor Jalilov boshchiligidagi murabbiylar shtabi yanvar oyidagi Osiyo chempionatida Zabihilloning tajribasidan oqilona foydalanadi. Bizga O'rinboevdek tezkor fikrlaydigan futbolchilar kerak va ularga kerakli ko'rsatmalarni hozirdan berish kerak. Bir paytlar Temur Hakimovni o'zimiz yo'qotgandik. Bu futbolchimizni kelajak uchun tayyorlashimiz lozim.  
— deya xabar beradi uff.uz nashri.