An'anaviy tarzda o'tkazib kelinadigan “Energiya pobed” sport jurnalistikasi festival-tanlovida saralash bosqichi yakunlanib, barcha nominatsiyalar bo'yicha g'oliblikka nomzodlarning ro'yxati e'lon qilindi.
Quvonarlisi, g'oliblikka nomzodlar orasidan “Jahon” AA fotomuhbiri Anvar Ilyasov ham o'rin egalladi.  
O'z kasbining mohir ustasi va fidoiysi bo'lgan Anvar Ilyasovni yurtimiz sport muhlislari yaxshi biladilar. Tajribali fotomuhbir ko'p yillardan buyon O'zbekiston sport delegatsiyasi tarkibida Olimpiada va Osiyo o'yinlarida, turli darajadagi xalqaro musobaqalarda bevosita ishtirok etib, voqea joyidan fotoreportajlar tayyorlab keladilar.
Sportchilarimizning zafarli onlaridan tayyorlangan fotoreportajlar “Energiya pobed” festival-tanlovining saralash bosqichida ham hakamlar e'tiborini qozondi va endilikda Anvar Ilyasovning ijod mahsuli xorijiy OAVlarida e'lon qilingan “Eng yaxshi fotoreportajlar” nominatsiyasida g'oliblikka asosiy da'vogarlar biri sifatida e'tirof etilgan.
Ushbu nominatsiyada, shuningdek, yana ikki nafar ijodkor, bular – Frantsiyaning “Frans-press” agentligidan Kirill Kudryavtsev hamda Avstriyaning “Biathlonworld.com” portali xodimi Evgeniy Tumashov saralash bosqichidan muvaffaqiyatli o'tib, g'oliblikka da'vogarlar ro'yxatidan o'rin egallashgan.
“Energiya pobed” festival-tanlovining g'olib va sovrindorlari 27 noyabr kuni Moskva shahri (Rossiya)da e'lon qilinadi.
Ma'lumot uchun. Bu yilgi festival-tanlovga RFning 62 hududi hamda 10 davlatdan jami 302 ta ijodiy ishlar yuborilgan. Shavkat Jalilov O'zbekiston Milliy Olimpiya qo'mitasi
matbuot xizmati
— deya xabar beradi uff.uz nashri.