Mana, O'zbekiston chempionati oliy ligasining navbatdagi mavsumi ham yakuniga etdi. Chempionlik poygasidan ko'ra, ligada «jon» saqlashga urinadigan jamoalar o'rtasida kechadigan kurash qiziqroq bo'lgan musobaqa haqida nima deyish mumkin?
Xullas, 30-tur ko'proq bitta o'yin bilan yodda qoldi - «Buxoro» safarda «So'g'diyona»ga qarshi maydonga tushdi va o'zi uchun yoqimli g'alabani qo'lga kiritdi. Bu o'yinda futbolga xos barcha narsa bor edi - shiddat, kurash, joziba va nihoyat, eng muhimi - stadion to'la muxlislar... Odatda tur sharhi eng muhim o'yin bilan boshlanadi. Biz ham so'nggi, 30-tur tafsilotlarini chempionlikni hal qilgan emas, balki quyi ligaga tushib ketmaslik uchun kurashgan klublar o'rtasidagi bahs bilan boshlasak, aybga buyurmaysiz. Zero, Jizzaxda kechgan o'yin barcha jihatlari bilan Toshkentdagisidan yaxshiroq ko'rindi. Samarqandda o'tkazilgan «Dinamo» - «Olmaliq» qarama-qarshiligini-ku, asti qo'yaverasiz...
«BUXORO» MO''JIZASI YoXUD «DINAMO»NING «QORA KUNI»
«Buxoro» yil davomida musobaqa jadvalining quyi qismida yurdi. Biror kun bo'lmadi-ki, buxoroliklar loaqal 15-o'ringa ko'tarilsalar. Ammo qarangki, oliy liganing so'nggi kuni qadim shahar vakillari nafaqat 15, balki elitada qolish huquqini beruvchi 14-o'ringa chiqishni ham uddaladilar. «So'g'diyona» esa harchand urinmasin, o'z maydonidagi o'yinda masalani ijobiy hal qilolmadi. U yog'ini so'rasangiz, ko'p ming sonli muxlislarning ayrimlari hali o'z joylarini topib ulgurishmagan edi hamki, «Buxoro» 2ta to'p farqi bilan oldinga chiqib oldi. Aslida shu kuni Jizzaxning katta futbol bilan xayrlashishi kutilgan edi. Haytovur, «So'g'diyona»ning baxtiga «Olmaliq» bor ekan...
«Dinamo»dan oliy ligada qolish uchun o'z maydonida «Olmaliq»ni engish talab qilinardi. Chunki «Buxoro»ning g'alabasi samarqandliklarga hech qanday imkoniyat qoldirmasdi.  Avvaliga hammasi yaxshi kechadigandek tuyuldi, «Dinamo» birinchi bo'limdayoq hisobni ochdi. Ammo kim ham o'ylabdi, «Olmaliq»ning 90Q2-daqiqada hisobni tenglashtirishini? Aytishlaricha, olmaliqliklar hattoki, etakchilar ustidan g'alaba qozonilgan o'yinda ham bu qadar xursand bo'lishmagan ekan.
ChEMPIONLIK «TANTANASI»
Mavsumdagi so'nggi o'yinda chempion nomi aniqlansa, odatda katta «ajiotaj» kuzatilishi kerak. Mantiqan olib qaraganda shunday. Ammo gap oliy liga haqida ketar ekan, har qanday mantiq «xijolat» chekib qolishini «Paxtakor»ning chempionlik o'yinida yana bir bor ko'rdik. Shu kuni «Paxtakor» stadioniga shu qadar kam muxlis yig'ildiki, mundayroq tuman musobaqasini ham ko'proq odam tomosha qilsa kerak. Ammo «paxtakorchilar» chempionlikni ancha yorqin o'yin evaziga qo'lga kiritdilar - «Andijon» darvozasiga javobsiz 6ta gol urishdi. Umuman, bu o'yinda qaysi tomon g'olib chiqishi haqida savol avval-boshidan ko'tarilmadi. Andijonliklar ko'p hujum qilib, mezbonlarni «uyaltirganlari» yo'q. Shu bilan birga himoyani ham qoyillatishmadi.
Tablodagi hisob bunga guvoh. Shunday ekan, uchrashuvda hammani g'olib nomidan ko'ra, Igor Sergeevning to'purarlar poygasidagi natijasi ko'proq qiziqtirdi, chog'i. Terma jamoa hujumchisi bu vazifani ham amalladi - bir marta penaltidan va yana bir marta o'yindan maqsadiga erishib, 23ta gol bilan oliy liga to'purari bo'ldi. Bu g'oliblik bilan «Paxtakor» va Sergeevni tabriklaymiz, albatta. Ammo PFL... Sharh davomida «tumandagi biror musobaqa» iborasini ishlatdik. Shu gapimizni yakunlab qo'ysak - o'sha musobaqalardagi taqdirlash marosimi ham PFL uyushtiradiganidan yaxshiroq o'tsa kerak. Gapirishga ham uyalasan kishi, ammo PFL direktori shunchaki, o'rtaga chiqib, kubokni topshirib qo'ya qoladigan musobaqa uchun bir yil davomida odamlarni shuncha ovora qilish shartmikan?
Davomi InterFUTBOL gazetasi blogida.
— deya xabar beradi uff.uz nashri.