Ayni payt «Krasnodar» sharafini himoya qilayotgan terma jamoamiz sardori Odil Ahmedovning faoliyat yo'li deyarli barchamizga ma'lum. Xususan, uning yoshlik chog'lari juda ko'p qiyinchiliklarga duch kelgani va hattoki, futboldan butunlay ketish haqida o'ylaganidan ham xabardormiz.
Lekin Odilning omadi kelib, baxtli tasodif ortidan «Paxtakor» murabbiylari e'tiborini o'ziga qaratgan. Keyin taniqli mutaxassis - Valeriy Nepomnyashiyning o'gitlari bilan mahoratini oshirgan. «Paxta­kor»dagi 5 yillik ajoyib davrdan so'ng 2011 yili «Anji» safiga, Eto`O, Diarra va Roberto Karlosni o'zida jamlagan yulduzli tarkibga qo'shildi. Shunisi e'tiborliki, bosiq-kamtar o'zbek yigiti shunday mashhurlar ichida yo'qolib qolmadi. Aksincha, barqaror o'yinlari bilan Rossiya­da hurmat-e'tibor qozondi. 2014 yilga kelib, TsSKA taklifidan «Krasnodar» variantini afzal ko'rgan hamyurtimiz kelajak sari yana bir dadil qadam qo'ydi.
Mana, bugun Odil - O'zbekiston terma jamoasi sardori va Rossiya chempionatidagi eng foydali legionerlardan biri. Yaqinda «Nezavisimoy sportivnoy gazeto'» nash­ri muxbirlari yurtdoshimizdan katta intervyu olishdi. Biz shu suhbatni qisqartirilgan holda, hukmingizga havola etishni lozim topdik.
- Ma'lumki, KXDR termasiga qarshi kechgan mag'lubiyatli o'yindan keyin O'zbekiston milliy jamoasi bosh murabbiyi o'zgardi: Mirjalol Qosimov o'rnini Samvel Babayan egalladi. Bu o'zgarish jamoaga nechog'li ta'sir o'tkazdi?
- Shunisi aniqki, jamoamizga sog'lom g'oliblik ruhi qaytdi. Bilasizmi, futbolda murabbiy va o'yinchilar o'rtasida ruhiy munosabatning o'rni juda muhim. Samvel Vyacheslavovich esa o'yin oldidan futbolchilarni shu qadar ruhlantira oladiki, hattoki, zaxira o'rindig'idagilar ham har qanday holatda faqat g'alabani ko'zlashadi. Biz Babayan bilan «Paxtakor»­dagi faoliyatimdan buyon yaxshi tanishmiz. Ehtimol, uzoq yillik hamkorlik uchun ham u meni sardor sifatida ko'rishni xohlagandir. Terma jamoa safi muntazam ravishda yosh iqtidorlar bilan to'ldirib borilmoqda. 20 yoshli Javohir Sohibov yoki 22 yoshli Igor Sergeev so'zimning isboti. Shaxsan men endi sardor sifatida mas'uliyatni his etyapman.
- Darhaqiqat, Babayan Tosh­kent­da Yaman termasiga qarshi bahsda Sohibov va Sergeevni boshlang'ich tarkibga kiritdi. Bu - mamlakatda kelajagi porloq futbolchilar avlodi etishib chiqayotganidan dalolatmi?
- O'FF rahbarligi Mirabror Zufarovich Usmonov qo'liga o'tgan so'nggi 10 yillik davrda yurtimizda futbolning rivojiga katta e'tibor qaratilmoqda. Turli yoshdagi terma jamoalarimizning jahon miqyosidagi turnirlarda muntazam qatnashayotgani bunga yaqqol misol. Ehtimol, shuning uchun ham termamizning hozirgi yigitlariga «oltin avlod» nisbati berilayotgandir...
- Nega unda o'zbek futbolchilarini Evropa klublarida ko'rmayapmiz?
- Bilasizmi, ayni payt termamizning asosiy 7 nafar a'zosi legioner. Lekin aksariyat yigitlarimiz Osiyo klublarida to'p surishadi. Futbolchilarimiz nega Evropaga intilishmayapti? Ehtimol, O'zbekiston chempionatida asosan texnikaga e'tibor qaratilgani bois, yigitlarimiz atletik salohiyatga katta urg'u beruvchi Evropa klublari talablariga javob bera olishmas?! Shuning uchunmi, bizga hamdo'stlik o'lkalari chempionatlari ko'proq mos tushadi.
- O'zbekistonda terma jamoa uchun baza vazifasini o'taydigan klublar bormi?
- Agar barcha yosh toifasidagi jamoalar tarkibini tahlil qilsak, aksariyat futbolchilar «Paxtakor» klubida tarbiyalanayotganliklarini ko'ramiz. Shuningdek, «Lokomotiv», «Bunyodkor» va «Nasaf» klublaridan ham ajoyib futbolchilar etishib chiqishmoqda.
Davomi InterFUTBOL gazetasi blogida.
— deya xabar beradi uff.uz nashri.