O'zbekiston chempionati haqida batafsil ma'lumot bera oladigan yagona ko'rsatuv -  Futbol sharhi  ham oliy liga bilan birgalikda qishki ta'tilga chiqdi. Uning joriy mavsumdagi so'nggi mehmoni G'anisher Shog'ulomov bo'ldi. Yaxshi bilamiz,  Futbol sharhi  odatda shunchaki, futbol yangiliklari bilan cheklanmay, dolzarb muammolarga bag'ishlangan mulohazalari bilan ham tanilgan. Ko'rsatuvning joriy yildagi so'nggi sonida an'ana davom etdi: yana qiziqarli fikrlarni eshitdik. Ayniqsa,  Oq-tepa  rahbarining ushbu klubdagi holat yuzasidan bergan ma'lumotlari e'tiborimizni tortdi.
 Oq-tepa  keyingi mavsumni ham birinchi ligada o'tkazadi. Garchi jamoa quyi divizionda ikkinchi o'rinni olgan bo'lsa-da, oliy ligaga o'tish bahsida elitaning 15-jamoasi -  So'g'diyona ga 1:2 hisobida yutqazdi. G'anisher aka bu natija haqida fikr bildirar ekan, jumladan, shunday dedi:  So'g'diyona  oliy liga tuzini anchadan buyon tatib yuribdi, shu sababli ham unda tajriba katta. Ana o'sha tajriba ish berdi. Bizning futbolchilar esa o'z imkoniyatlaridan to'liq foydalanolmadilar va haqli ravishda mag'lubiyatga uchradilar . Mutasaddi bildirgan eng qiziqarli fikr bu emasdi. Shog'ulomov klubdagi iqtisodiy holatga to'xtalarkan, bu borada maqtashga arzigulik natijalarning qo'lga kiritilganini bildirdi. G'anisher akaning aytishicha,  Oq-tepa  oliy ligaga chiqqan taqdirda ham, hech qanday moliyaviy muammoga duch kelmaydi.
- Yurtimizda futbolni rivojlantirish borasida qabul qilingan qarorlarda jamoalar o'zini-o'zi ta'minlashi lozimligi haqida ham band bor. Biz shunga asosan katta hajmdagi ishni amalga oshirganmiz. Klub qoshida tashkil etilgan qayta ishlash zavodi so'nggi uskunalar bilan jihozlangan va yaxshi daromadga ega.  Oq-tepa ning ta'minoti to'laligicha shu korxona zimmasida. Biz oliy ligaga chiqqudek bo'lsak, birovdan pul so'ramaymiz. Ta'minot o'z hisobimizdan qoplanadi. Yaxshi bilamiz, hozir elitadagi aksariyat klublar o'zlarini eplay olishmaydi, homiylar qo'liga qarab qolishgan. Bizning esa bu borada hech qanday muammoga duch kelmasligimiz aniq, - dedi G'anisher Shog'ulomov.
Ochig'i, nafaqat birinchi liga, balki oliy divizionning ayrim klublarida boqimandalik kayfiyati hukm surayotgan pallada bunday gaplarni eshitish ancha xush yoqarkan. Darhaqiqat, o'zbek futboli ko'p yillardan buyon shu muammodan qutulolmayapti - jamoalar faqat homiylar hisobiga yashab keladilar. Oqibatda deyarli 70 foiz klubda moliyaviy qiyinchiliklar uchrab turadi. Xususan, bu masala  Oq-tepa  bilan o'tish bahsida kuch sinashgan  So'g'diyona ni ham tez-tez bezovta qildi. Shuningdek,  Navbahor  bosh murabbiyi Baxtiyor Ashurmatov mavsum davomida bir necha bor moliyaviy muammolarga urg'u bergandi. Bundan tashqari, oliy liga bilan xayrlashgan  Dinamo ga ham bunday kamchilik begona emas. Umuman, deyarli barcha klublarda bir xil holat hukmron - homiy qanchalik baquvvat bo'lsa, klub ham shunga yarasha kuchayadi. Aks holda, muammolarni kutib olavering!
Mana shunday vaqtda birinchi liga klubida menejment ishining bu qadar yaxshi yo'lga qo'yilgani kishini xursand qilishi turgan gap. Bunday kamsonli tashabbusning quyi liga vakilidan chiqayotganini e'tirof etmaslikning iloji yo'q. Aslida, bu borada  Oq-tepa  yagona klub emas. Joriy yildan e'tiboran elitaga qo'shilib, ancha barqaror o'yin namoyish qilgan  Qo'qon-1912 da ham maqtovga loyiq tadbirkorlik ishlari olib borilmoqda. Qo'qon spirt zavodi bo'limlaridan biri  Qo'qon-1912  klubiga tegishli. Shuningdek, jamoa yana ip yigiruv tsexini ishga tushirishni ko'zlamoqda. Ko'rib turganingizdek, klub bir joyda to'xtab qolgani yo'q. Aynan shu omil qo'qonliklarning oliy ligadagi tajribali jamoadan ko'ra yaxshiroq moliyaviy holatga ega bo'lishlariga zamin hozirladi.
Qaniydi, mazkur yo'nalish boshqa klublarga ham ibrat vazifasini o'tasa. Har qancha og'ir bo'lmasin, tan olish kerak, hozirda aksariyat jamoalarimiz  olma pish, og'zimga tush  qabilida kun ko'rishmoqda. O'z-o'zini eplash dargumon. Chunki marketing va menejment borasida ishlar etarlicha yo'lga qo'yilmagan.
Davomi InterFUTBOL gazetasi blogida.
— deya xabar beradi uff.uz nashri.