Taekvondoning WTF yo'nalishi bo'yicha 2016 yili Rio-de-Janeyro shahri (Braziliya)da o'tkaziladigan XXXI yozgi Olimpiada o'yinlariga yo'llanma olgan dastlabki 48 nafar sportchining nomi ma'lum bo'ldi. Quvonarlisi, ushbu taekvondo ustalari orasidan O'zbekiston sportchisi ham o'rin egalladi.
2015 yilning 5-6 dekabr kunlari Meksika poytaxti Mexiko shahrida bo'lib o'tgan Gran-Pri turnirining hal qiluvchi final musobaqasida Olimpiya reyting jadvalining har bir vazn toifasida kuchli sakkizlikka kirgan dunyoning etakchi taekvondochilari “Rio-2016” yo'llanmalari uchun kurash olib bordilar.
Ushbu musobaqa 2015 yilda o'tkazilgan Gran-Pri turnirlarining yakuniy final bosqichi hisoblanib, unda o'z vazn toifasida oltin medalga sazovor bo'lgan sportchiga 80 reyting ochkosi beriladi. Ya'ni, sportchilarning reyting jadvalidagi mavqeilarini yanada yaxshilab olishlari va Olimpiada o'yinlariga yo'llanma oladigan kuchli oltilikka (har bir vaznda) kirib olishlari uchun qulay imkoniyat edi.
Mazkur musobaqada Vatanimiz sharafini Dmitriy Shokin hamda Jasur Boyqo'ziev himoya qildilar. Har ikki sportchimiz ham eng og'ir (+80 kg) vazn toifasidagi sportchilar bahsida ishtirok etdilar.
Amaldagi jahon chempioni, Osiyo o'yinlari sovrindori Dmitriy Shokin garchi Mexiko Gran-Prisida sovrindorlar safidan o'rin olmagan bo'lsada, eng og'ir vazndagi sportchilarning reyting jadvalida birinchi o'rinni saqlab qoldi.
Jahon chempionatining kumush medal sovrindori, Osiyo o'yinlari g'olibi Jasur Boyqo'ziev esa o'ta murosasiz kechgan bahslarning yakuniga ko'ra bronza medaliga sazovor bo'ldi va og'ir vazndagi sportchilarning reyting jadvalida Dmitriy Shokindan keyin ikkinchi o'rinni egalladi.
Afsuski, qoidagi ko'ra har bir vazn toifasida bir davlatdan faqatgina bir nafardan sportchi Olimpiada o'yinlariga yo'llanma oladi. Bu ikki sportchimizdan qay birini Rio-de-Janeyroga yo'l olishi O'zbekiston taekvondo assotsiatsiyasi tomonidan e'lon qilinadi.
Shu tariqa,“Rio-2016” o'yinlariga J.Koreya terma jamoasi 5 ta yo'llanmani, Frantsiya terma jamoasi 4 ta litsenziyani, Buyuk Britaniya, Eron, Meksika va Rossiya terma jamoalari uchtadan, Belgiya, Xitoy, Xitoy Taypeyi, Xorvatiya, Germaniya, Ispaniya hamda Turkiya terma jamoalari ikkitadan, O'zbekiston, Ozarbayjon, Braziliya, Kot-d'Ivuar, Misr, Gabon, Yaponiya, Moldova, Portugaliya, Serbiya, Shvetsiya, Tailand va AQSh terma jamoalari bittadan yo'llanmani qo'lga kiritdilar.
Bugun Mexikoda terma jamoalar o'rtasida Jahon kubogi bahslari start oladi. Yilning so'nggi nufuzli musobaqasida dunyo reytingida kuchli sakkiztalikdan joy olgan davlat terma jamoalari ishtirok etadi.
Mazkur musobaqada O'zbekiston terma jamoasi ham ishtirok etadi. Ikki kun davomida o'tkaziladigan musobaqada Vatanimiz sharafini Dmitriy Shokin, Jasur Boyqo'ziev, aka-uka Maksim va Nikita Rafalovich, Temur O'rolov, Valentin Xegay himoya qiladilar.
Hamyurtlarimizga bo'lajak bahslarda ham omad va zafarlar tilab qolamiz. Shavkat Jalilov O'zbekiston Milliy Olimpiya qo'mitasi
matbuot xizmati
— deya xabar beradi uff.uz nashri.