«Navbahor» futbol klubi rahbariyati «Futbol Ekspress» gazetasining 2015 yil 1 dekabr kuni chop etilgan 95-sonidagi «Navbahor»ning ravnaq topishi asosiy mezon» sarlavhasi ostida chop etilgan maqolani o'rganib chiqdi. Aynan shu maqola yuzasidan o'tkazilgan yig'ilishda klub sha'niga nisbatan noto'g'ri fikrlar bildirilganligi e'tirof etildi. Shu bilan birgalikda, jamoaning bir guruh muxlislari ham bevosita klubga va klub xodimlariga murojaat qilib, maqolada asossiz fikrlar bildirilganligini aytib o'tib, gazeta ijodkorlariga o'z qarashlarini ma'lum qilishlarini ham aytib o'tishdi.
Mamlakatimizda so'z erkinligi va oshkoralikka katta ahamiyat beriladi. Ya'ni yurtimizning har bir fuqarosi o'z fikrini erkin tarzda bayon qilish huquqiga ega. Lekin, bu insonlarga nistaban bo'hton qilish va ularga tuhmat qilish degani emas. Xususan gezetada chop etilgan «Navbahor»ning ravnaq topishi asosiy mezon» maqolasida savollarga javob qaytargan Jahongir Sharifiy asossiz fikrlarni bayon etganligini aytib o'tish joiz.
Quyida asossiz fikrlarga «Navbahor» futbol klubining qarashlarini keltirib o'tamiz. Jahongir Sharifiyning «ilgari ham «Navbahor»ga moddiy yordamlarimni berib kelganman» degan gaplariga oydinlik kiritib o'tsak. 2011 yilning oxirida «Navbahor» klubi ofisida paydo bo'lgan Sharifiy ko'p o'tmay klubda fan klub koordinatori sifatida ish boshladi. E'tiborli jihati, shundaki «Navbahor»ga bir necha yillardan beri muxlislik qilib kelaman deb aytgan Sharifiyni shu paytgacha aksariyat jamoa ishqibozlari tanimasliklarini va hatto o'yingohda ham ko'rmaganliklarini bildirishgandi. Avvaliga muxlislarga qarshi ish yuritgan Sharifiy klubdan bo'shaganidan keyin ishqibozlar orasiga kirib, olib ayrim muxlislar ongini zaharlab, «Navbahor» futbol klubiga nisbatan salbiy munosabat uyg'otishga harakat qilmoqda. Moddiy, moliyaviy yordam masalasiga kelsak, Sharifiy klubda ishlab yurganida o'sha paytdagi «Navbahor» futbol klubi direktori Dilmurod Mamadjanovga o'zini aytishicha qanchadir miqdordagi pulni berganligi keyinchalik yuzaga chiqdi (pul berganligi haqida notarial idora tasdiqlagan hech qanday xujjat mavjud emas). Dastlab Sharifiy bu pullarni klub uchun berganligini aytib, Mamadjanov iste'foga chiqarilgach, klubni yangi rahbarlaridan talab qila boshladi. Keyinchalik esa pulni undirish maqsadida bir necha bor yozma ravishda shahar, viloyat, Respublika prokuraturasi, hokimliklar, O'zbekiston futbol federatsiyasiga murojaat qiladi. Buning natijasida klubda tekshiruv ishlari olib borildi. Tekshiruvlar yakuniga ko'ra Mamadjanovga Sharifiy tomonidan berilgan pullarni klub uchun ishlatilmaganligi oydinlashdi. Shundan so'ng klubning sobiq direktori Mamadjanov va Sharifiy o'rtasida kelishmovchilik yuzaga kelib, ushbu masala ham huquq targ'ibot idoralarida ko'rib chiqildi. Yakunda Mamadjanov va Sharifiy o'zaro kelishib olishgach, bu masalaga yakun yasalgandi.
Sharifiy suhbat davomida klubning faoliyatiga nisbatan muxlislar tomonidan e'tiroz bildirilganligini aytib o'tgan. Boz ustiga bosh murabbiy Baxtiyor Ashurmatovning jamoadagi faoliyatini ham tanqid ostiga olgan. Vaholanki, so'nggi ikki yilda «Navbahor»ni o'sishga erishganligini ta'kidlab o'tish joiz. 2012 va 2013 yillarda oliy ligada jon saqlash uchun harakat qilgan jamoa 2014 hamda joriy yilgi chempionatlarda qayd etilgan natijalarni esa yomon deb bo'lmaydi. Har holda «Navbahor» chempionatning o'rtamiyona jamoalari safidan joy oldi. Bir paytlar faqat sovrinli o'rinlar uchun kurashgan klubni bu kabi maqomga ega bo'lishi ham ko'pchilikni qoniqtirmasligi mumkin. Lekin, jamoani yildan-yilga rivojlanish sari intilanayotganligi ham bor gap. Ashurmatov va shubhaga olingan ayrim uchrashuvlar borasidagi fikrlarni ham asossiz ekanligi bor gap. Har kim bu borada o'z qarashlaridan kelib fikr bildirishi mumkin. Biroq, hech qanday dalil va isbot bo'lmagach, bunday gap-so'zlarni asossiz deyish to'g'riroq bo'lardi. U o'zining fikrlarini asoslab bera olganida va kerakli dalillarni taqdim etganida boshqa masala edi.
Umuman olganda biror-bir kishini ayblashdan oldin uning aybini tasdiqlovchi dalillari bo'lmog'i darkor. Sharifiy esa bir necha yillardan beri ijtimoiy tarmoqlarda nafaqat klub va viloyat futboli rahbarlarini balki viloyat hokimi shaxsiyatga tegadigan fikrlari bilan tuhmat qilib kelmoqda. O'zining bo'hton va ig'volari bilan huquq targ'ibot idoralariga ham ariza yozib murojaat qilganligi yuqoridagi fikrlarimizga asos bo'la oladi. Kelib tushgan arizalar oqibatida, klubda tekshiruvlar ham amalga oshirildi. Tekshiruvlar natijasiga ko'ra faoliyatda hech qanday noqonuniy ishlarni amalga oshirilmaganligi ham isbot talab qilmas haqiqatdir. Sharifiy o'zining tuhmatlari bilan nafaqat klub balki viloyat futboli faoliyatini izdan chiqarishga urinayotganligi zamirida esa shaxsiy manfaat yotganligini e'tirof etish joiz. Klub rahbarligini qo'lga kiritishga urinayotgan bu shaxs klub tomonidan olib borilayotgan har qanday ishni salbiy tarafga yo'yib, muxlislar fikrini o'zgartirishga harakat qilmoqda. Rossiya safarini ham xuddi shu maqsadda amalga oshirilganligi ham ehtimoldan holi emas. Xo'sh agarda unda shunday g'oya va takliflar bor ekan, nima uchun klubda faoliyat yuritgan chog'larida bu kabi ishlarni amalga oshirishga intilmadi? Aksincha, klubda ishlagan paytida «Navbahor» atributikalarini ishlab chiqarish va ularni sotishdan foyda ko'rish maqsadida ma'lum miqdordagi mablag'ni yo'qolib ketishida sababchi bo'lgandi. Ya'ni muxlislarga atributikalarni pulini keyin to'lash sharti bilan sotib yuborgan. Yakunda, ishlatilgan mablag' g'aznaga kirim qilinmaganligi sababli klub zarar ko'rgandi.
Tuhmatlarga javoban klub va viloyat futboli mutasaddilari tegishli organlarga murojaat qilib, arz qilishlari mumkin edi. Lekin, ular xalqimiz odatiga xos tarzda turli gap-so'zlarga ortiqcha e'tibor qaratmay o'z vazifalarini bajarishda davom etishmoqda. Har bir asossiz fikrlarga javob qaytarish, o'z manfaati yo'lida hech narsadan qaytmaslik, janjalkashlik o'zbek xalqi uchun yot sanaladi. Aynan shundan kelib chiqqan holda ayrim noto'g'ri gap-so'zlarni deb ishda sustkashlikka yo'l qo'ymaslik lozim topilmoqda. Bu esa ayrim nopok fikrga ega kimsalarga qo'l kelmoqda. Shunday ekan, xalqimiz tili bilan aytilgandek, andishani otini qo'rqoq deb bo'lmaydi.
Suhbat davomida jamoa o'yinlarga tayyorgarlik ishlarini Toshkentda olib borganligi ham tanqid ostiga olingan. Ayni paytda «Navbahor» futbol klubining qarorgohida ta'mirlash ishlari amalga oshirilayotganligi bois jamoa murabbiylari va futbolchilari Namanganda bo'lgan paytlarida «Turkiston» mehmonxonasida istiqomat qilishdi. Jamoa mashg'ulot o'tkazish uchun maydonga ega bo'lmaganligi sababli mashg'ulotlarni olib borish va o'yinlarga tayyorgarlik ko'rishda ma'lum qiyinchiliklarga olib kelardi. Aynan shu sababli, jamoa vodiydan tashqarida o'tkazilgan safar uchrashuvlariga Toshkentda tayyorgarlik ko'rdi. E'tiborli jihati, jamoaning Toshkentda yig'in olib borilishida esa qator qulayliklar mavjud edi. Birinchi navbatda «Geofizika» qarorgohidagi jamoa a'zolarini yashashi uchun belgilangan qulay narx va shug'ullanish uchun o'sha erning o'zida maydon va boshqa sharoitlarni mavjudligi inobatga olingan. Shuningdek, klubning yillik xarajatlarini oshkor qilish lozimligi ham aytib o'tilgan. O'zbekistonda hech bir klub yil davomida qancha xarajat qilinganligini ommaga oshkor qilinmaydi. Shunday bo'lsada, kerakli tashkilot va idoralarga bu boradagi hisobotlar doimiy ravishda topshirib boriladi. «Navbahor» futbol klubi ham xarajatlar va daromadlar borasidagi hisobotni Namangan viloyat hokimi, O'zbekiston futbol federatsiyasi va Professional futbol ligasiga doimiy ravishda berib boradi. Qolaversa, klub yilning har bir choragida moliyaviy natijalar borasida tegishli tashkilot va idoralarga ham hisobot beradi.
Sharifiy suhbat davomida viloyat futboli va klub mutasaddilarini tanqid ostiga olganligi zamirida ham shaxsiy manfaat yotganligi ayni haqiqat. Negaki, bevosita viloyat futboliga mas'ul shaxslarning xatti-harakatlari va intilishlari natijasida bir qator ishlar amalga oshirilmoqda. Xususan, «KITO INVESTMENTS PTE. LTD» xorijiy kompaniyasi bilan homiylik borasida bitim imzolanganligi viloyat futboliga ma'sul bo'lgan shaxslarning taklifi bilan amalga oshirilganligi fikrimizga asos bo'la oladi. Bundan tashqari 2016 yilgi mavsum arafasida klubni rivojlantirish maqsadida bir qator ishlarni amalga oshirish rejalashtirmoqda.
«Navbahor» futbol klubi har qanday asossiz tanqidlarga e'tibor qaratmaslikka harakat qiladi. Aksincha asossiz bo'xtonlar klub faoliyatiga salbiy ta'sir ko'rsatishi mumkinligini inobatga olgan holda shu tarzda ish olib borishga odatlanilgan. Aslini olganda bu safar ham asossiz tanqidlarga e'tibor qaratmaslikni ko'zlagandik. Ammo, muxlislar orasida tarqatilayotgan turli xil gap-so'zlarga barham berish va kim aslida kim ekanligi borasida tushuncha paydo bo'lishi bois gazetada chop etilgan maqolaga javob yozdik. Yuqoridagi fikrlar bilan tanishib chiqqan har qanday muxlis vaziyatni aslida qanday ekanligi borasida xulosaga kelib oladi degan umiddamiz. «Navbahor» futbol klubi

— deya xabar beradi uff.uz nashri.