Bugun  Qo'qondagi “Markaziy” o'yingohining anjumanlar zalida “Qo'qon-1912” jamoasining yangi bosh murabbiyi Murodjon Ismoilovni tanishtirish marosimi o'tkazildi. Unda jamoaning ayrim futbolchilari va muxlislar klubi vakillari ishtirok etishdi.
Tadbir avvalida “Qo'qon-1912” futbol klubi vitse-prezidenti, bosh direktori Baxtiyor Tolipov so'zga chiqib, yangi bosh murabbiyni tanishtirdi va jamoaning keyingi rejalari xususida to'xtalib o'tdi.
- Mana qariyib bir oydan beri “Qo'qon-1912” jamoasiga kim bosh murabbiy bo'lishi borasidagi savol kundalang turgandi. Nihoyat, ikki kun oldin bu masalaga oydinlik kiritildi. Jamoamizga Murodjon Ismoilov bosh murabbiy etib tayinlandi. Yangi mavsumga tayyorgarlikni 17 dekabrdan boshlaymiz. 28 dekabr kuni katta tadbir o'tkazish rejalashtirilgan. Aynan shu kuni ko'p savollarga javob topiladi.
Shundan keyin so'z navbati klubning yangi bosh murabbbiyi Murodjon Ismoilovga berildi.
- “Qo'qon-1912” jamoasidan tushgan taklif men uchun yangi chaqiriq bo'ldi. Qo'qon futboli buyuk tarixiga ega. Bu erdagi futbolga bo'lgan munosabat ham boshqacha. Klub rahbarlari, muxlislar ishonchini oqlashga harakat qilamiz, dedi murabbiy.
Muxlislardan birining “jamoaga yangi futbolchilar taklif etiladimi” degan savolga Murod Muzaffarovich quyidagicha javob qaytardi.
- Albatta har bir murabbiyining o'z qarashi bor. Avvalo jamoada o'ynagan futbolchilar bilan gaplashib ko'ramiz. Keyin qaysi chiziqlarni kuchaytirish lozim bo'lsa, o'sha chiziqlarga yangi futbolchilarni taklif etamiz. Ko'z ostimga olib qo'ygan futbolchilar ham bor. Lekin ular borasida hozir bir narsa deya olmayman.
— deya xabar beradi uff.uz nashri.