«Real» hujumchisi Karim Benzema nihoyat, Frantsiya termasidagi sherigi va «Lion» yarim himoyachisi Matyo Valbuenaga nisbatan uyushtirilgan tovlamachilik jinoyati haqida oshkora gapirdi. Ya'ni TF1 jurnalistlari bilan suhbat chog'i o'zining jinoiy harakatdagi «roli» xususida to'xtaldi.
- Karim, nega aynan hozir oshkora gapirishni xohlab qoldingiz?
- Sabab bitta: men bilan ro'y bergan voqealarni yana bir marta tushuntirib, matbuot tomonidan bo'layotgan qahrli xurujlarga javob qaytarmoqchiman.
- Hattoki, Frantsiya bosh vaziri ham yoshlarga ibrat ko'rsatolmasligingiz va siz uchun milliy jamoada joy yo'qligini ta'kidladi.
- Bu shunchaki, g'azab oqibati. Boshqa izoh yo'q. Menga xuddi jinoyatchidek munosabatda bo'lishyapti: ochiq ayblashyapti, loyga belashyapti, hammasini turlicha talqin qilishyapti. Afsus...
- Endi voqealar tafsilotiga o'tsak. 6 oktyabr kuni siz Klerfontendagi bazada Valbuena bilan bitta xonaga joylashgansiz. O'shanda nima bo'lgandi?
- Videoyozuv borligini bilgandim. Shuning uchun Matyoni ogohlantirishni xohladim. Biroq u barchasidan xabardor ekan. Shunda Liondagi bir do'stim orqali yordam berishim mumkinligini aytdim. Zero, u bu muammoni hal eta olardi.
- Karim Zenatini nazarda tutyapsizmi?
- Ha, u mening do'stim. Matyodan bularni o'z oilasiga aytgan-aytmaganligini so'radim. Axir asosiysi - oila-ku. Men unga sof vijdon bilan gapirdim. Deylik, o'zim ham shunga o'xshash holatga tushganim va politsiyaga murojaat etganimni ta'kidladim. U ham politsiya bilan bog'langanini aytdi. Shuning uchun ham tovlamachilik, go'yoki, undan pul to'lashni talab qilganim haqidagi gaplarni eshitganimda, o'zimni qo'yarga joy topolmayapman. Barchasi safsata. Do'stimning pulga muhtoj bo'lgani ham, boshqa gap-so'zlar ham bo'hton. Xudoga shukr, anchadan buyon etarli darajada pul topyapman va nimagadir muhtojligim yo'q. Agar kimgadir yordam berishni istasam, bundan qandaydir manfaatni ko'zlamayman. Uning o'zi (Valbuena) barchasini samimiyat bilan aytganimni tasdiqlaydi. Harqalay, hech qanday pul haqida gap bo'lgani yo'q. U esa kutilmaganda, meni go'yoki, majbur qilganimni aytyapti. Ha, 2 martacha maslahat berdim. Ya'ni 2 yoki 3 marta Lionda do'stim borligi va bunday ishlarda yordam bera olishini ta'kidladim. Zero, unda bu masalada tajribasi bor.
- Biroq Matyoning aytishicha, siz vaziyatga yaxshi niyatda aralashmagansiz...
- O'shanda bunday o'ylayotgandek ko'rinmagandi. Biroq keyinchalik barcha gap-so'zlardan so'ng «tomi siljib» qoldi, chog'i. Qaytaraman, biz pul haqida umuman gaplashmaganmiz. U buni tasdiqlashi kerak.
- Umuman, siz tovlamachilar bilan tanishmisiz?
- Yo'q.
- Karim Zenati - bu shaxs kim?
- Yoshlikdagi do'stim. Uning taqdiri oddiy. Ha, qamoqda o'tirgan. Biroq 2 yil oldin ozodlikka chiqdi. Aslida qalban yaxshi inson. Mana, qamoqdan so'ng yangi hayot boshlash imkoniyatiga ega bo'ldi va bundan foydalandi. Biz xuddi aka-ukalardekmiz.
- Biroq ko'pchilik atrofingizdagi kishilarga nisbatan tan­qidiy qarash­ga ega.
- Atrofimdagi kishilar masalasida kimlarni nazarda tutishayotganini bilmayman. Bular oilam, do'stlarim-mi? Ular tufayli uyalmayman. Yaqinlarim men uchun g'oyat qadrli. Ha, kambag'allar kvartalida tug'ilganman, lekin yaxshi inson maqomiga erisha oldim. Shu ma'noda aytsam, ko'plab bolalar, hattoki, atrofimdagilar uchun ibrat ko'rsatdim. To'g'ri, «Uning atrofidagilar yomon», deyishlari mumkin. Ammo faktlar qani?
- Shundayku-ya, lekin siz sportga zarracha daxli yo'q mojaroga birinchi marta aralashmayapsiz...
- O'sha voqealarni nazarda tutyapsizmi (Benzema 2009 yili voyaga etmagan fohishaga bog'liq jinoyat bo'yicha sud kursisiga o'tirgan, ammo 2014 yili butunlay oqlangan)? Ha, hammasi juda cho'zildi, biroq oxir-oqibat, aybsizligim isbotlandi-ku. Shunday ekan, o'sha mojaroni unutish vaqti keldi.
Davomi InterFUTBOL gazetasi blogadi.
— deya xabar beradi uff.uz nashri.