2016 yilning 10-21 fevral kunlari poytaxtimiz mezbonligida o'tadigan futzal bo'yicha Osiyo chempionati-2016 final bosqichiga qur'a tashlash marosimi ko'tarinki ruhda tashkillashtirildi. «Zarafshon kino-kontsert zalida uyushtirilgan marosimda OFK Musobaqalarni o'tkazish bo'limi boshlig'i Shin Man Gil, O'FF prezidenti Mirabror Usmonov, federatsiya bosh kotibi Sardor Rahmatullaev, O'zbekis­ton futzal assotsiatsiyasi vitse-prezidenti Jahongir Usmonov va OAV xodimlari ishtirok etishdi. Tadbirda Osiyoning ikki karra eng yaxshi futbolchisi Server Jeparov bosh rollardan birini bajardi.
Ta'kidlash joiz, Jeparov katta futbolga qadam qo'yishdan avval ma'lum muddat futzalda faoliyat olib borgan. Marosim avvalida odatdagidek, musobaqa mezbonini tanishtirish maqsadida jannatmakon yurtimizning tarixiy hamda diqqatga sazovor go'shalari aks etgan videolavha namoyish etildi. Yig'ilganlar buni qarsaklar bilan qarshi olishdi. Keyin kechaning badiiy qismi boshlandi va sahnaga «Sanam» raqs guruhi taklif etildi. Musiqiy chiqishlardan so'ng tadbirda boshlovchilik vazifasini bajargan Nilufar Sotiboldieva navbatni O'FF prezidenti Mirabror Usmonovga berdi.
- Avvalambor, assalomu alaykum, poytaxtimiz mehmonlari, koshonaga yig'ilgan aziz do'stlar, - deya so'z boshladi Mirabror Zufarovich. - Jannatmakon yurtimizga xush kelibsizlar! Toshkent shahri 3-marta futzal bo'yicha Osiyo chempionatiga mezbonlik vazifasini bajaradi. Bejiz emas, albatta. Bu mamlakatimizda barcha sport turlari qatori futbol, xususan, futzalga qaratilayotgan e'tibor samarasidir. Birinchi galda, bizga yana bir bor mezbonlik huquqini ishonib topshirgani uchun OFK rahbariyatiga minnatdorchilik bildiraman. O'z o'rnida bu ishonchni oqlab, musobaqani yuqori saviyada o'tkazishga harakat qilamiz. Navbatdagi Osiyo chempionatining avvalgilaridan farqi katta. Sababi, bu safar o'rtaga jahon chempionati yo'llanmalari tikilgan. Qit'a chempionati yakuniga ko'ra, eng yaxshi 5ta terma jamoa kelasi yilning kuzida Kolumbiyada o'tkaziladigan JCh-2016 yo'llanmasini qo'lga kiritadi. Shu sababli ham, bo'lajak Osiyo chempionatiga qiziqish juda yuqori. Bugungi kunda nafaqat Osiyo, balki butun dunyoda futzal jadal sur'atlarda rivojlanib boryapti. Shu jumladan, O'zbekistonda ham. Fursatdan foydalanib, barcha ishtirokchi terma jamoa­larga qit'a chempionatida omad va zafar yor bo'lishini tilayman. Mundialga eng kuchli jamoalar yo'llanma olishsin va ular orasida O'zbekiston termasini ham ko'raylik.
Shundan so'ng OFK Musobaqalarni o'tkazish bo'limi boshlig'i Shin Man Gil hamda Osiyoning ikki karra eng yaxshi futbolchisi Server Jeparov sahnaga chiqishdi. E'tiborimizni koreyalik mutasaddi va futbolchimiz o'rtasidagi kichik dialog o'ziga tortdi. Terma jamoamiz yarim himoyachisi ing­liz tilida bemalol gaplasha olishini namoyon etib, zalga yig'ilganlar olqishiga sazovor bo'ldi. Qisqa suhbatdan so'ng nihoyat, navbat qur'a tashlash jarayoniga etib keldi. Jeparov avvaliga Osiyoning 4ta kuchli jamoasi - «guruhboshi»larni ajratib berdi. Vetnamda o'tkazilgan oxirgi Osiyo chempionatida kuchli to'rtlikdan joy olgan jamoalar bitta guruhga tushib qolmasliklari uchun shunday yo'l tutildi. Tabiiyki, terma jamoamiz Osiyo chempionati mezboni sifatida avtomatik tarzda «A» guruhiga joylashtirildi. Eron, Tailand hamda Osiyo chempioni - Yaponiya terma jamoalari mos ravishda keyingi guruhlardan joy olishdi. Terma jamoamiz kvartetini Livan, Qirg'iziston va Saudiya Arabistoni terma jamoalari to'ldirishdi. Aytish joiz, futzalchilarimiz shu kungacha Osiyo chempionatlarida Qirg'iziston termasi bilan 4, livanliklar bilan 3 marta to'qnash kelishgan. Qirg'iziston termasiga qarshi kechgan o'yinlarning 3tasida vakillarimiz g'alaba qozonishgan. Faqat bir marta durang natija qayd etilgan.
Davomi InterFUTBOL gazetasi blogida.
— deya xabar beradi uff.uz nashri.