Murod Ismoilov nomi futbol ishqibozlariga yaxshi tanish. U futbolchilik faoliyatida yarim himoyachi pozitsiyasida harakat qilgan. «Avtomobilchi» (sobiq To'miryo'lchi), «Neftchi», «Atlaschi» «Shahrixonchi», «Nasaf» va «Tsementchi» jamoalari safida oliy va birinchi liga uchrashuvlarida maydonga tushgan.
Futbolchilik faoliyatiga yakun yasagach, 46 yoshli mutaxassis «Paxtakor» futbol akademiyasida ish boshlagan. 2006 yil «sherlar» tizimida faoliyat yuritishga kirishdi. Akademiyada muvaffaqiyatli ishlagach, uni jamoa o'rinbosarlar tarkibi murabbiylar shtabida ish yuritishga taklif qilishdi. Ma'lum vaqt mobaynida o'rinbosarlarga o'zi boshchilik ham qilgan. 2010 yil esa uni Miodrag Radulovich shtabida ish yuritishi haqida qaror qabul qilindi. Natijada Ismoilov evropalik mutaxassis bilan birga ish olib borib, undan turli kerakli jihatlarni o'zlashtirish imkoniyatiga ega bo'ldi. Radulovich ketgach, endi Haydarov shtabida ishlashda davom etdi. 2011 yil esa u Aleksey Evstafeev boshchiligidagi o'smirlar terma jamoasida jismoniy tayyorgarlik bo'yicha murabbiy sifatida Meksikadagi Jahon chempionatida chorak finalgacha etib bordi. Shuningdek, Ahmadjon Musaev boshchilik qilayotgan yoshlar terma jamoasi shtabidan ham o'rin egallagandi. Lekin «Paxtakor»dagi faoliyati tufayli keyinchalik yoshlar termasi yig'inlarida qatnasha olmadi. 2012 yilgi mavsum boshida serbiyalik Deyan Jurjevichga yordamchi murabbiy vazifasini bajardi. Lekin xorijlik murabbiyga javob berilgach, klub rahbariyati Ismoilovni vaqtinchalik bosh murabbiy etib tayinlashga qaror qildi. Yosh mutaxassis esa bu ishonchni yo'qqa chiqarmadi va undan unumli foydalandi. Natijada 2013 yilgi mavsumni Murod Muzaffarovich to'laqonli bosh murabbiy sifatida boshladi. “Paxtakor”dagi bir yillik faoliyatidan keyin unga 2014 yilda “Neftchi”dan taklif tushdi. Farg'onaning bosh jamoasida ishlashni ixtiyor etgan Ismoilov “Neftchi”da 2 mavsum faoliyat yuritdi. U oxirgi yillarda o'sib kelayotgan umidli mutaxassislardan biri hisoblanadi. Akademiya tizimidan asosiy tarkibgacha bo'lgan yo'lni bosib o'tgan murabbiy bu yog'iga o'z uslubiga sodiq qolgan holda yoshlarga jiddiy e'tibor berishni yoqtiradi.
Murod Ismoilov 2011 yilning sentyabr-dekabr oylarida ham «Paxtakor»ga ustozlik qilgandi. O'shanda ham mutaxassis bosh murabbiy vazifasini bajaruvchi sifatida faoliyat olib borgan. Endi u “Qo'qon-1912”da ishlashi kutilmoqda.
Bizning ma'lumot:
Murodjon Ismoilov
1969 yil 4 yanvar kuni tug'ilgan.
O'yngan jamoalari: «Avtomobilchi» (sobiq To'miryo'lchi), «Neftchi», «Atlaschi» «Shahrixonchi», «Nasaf» va «Tsementchi».
Murabbiy sifatida erishgan yutuqlari: 2011 yil: O'zbekiston kubogi sohibi.
2012 yil: O'zbekiston chempioni.

— deya xabar beradi uff.uz nashri.