Birinchi liga o'yinlari poyoniga etdi va endi mazkur musobaqa bilan bog'liq fikr-mulohazalarimizni bildirgandi. Mubolag'a emas, bir necha yillardan buyon quyi divizion uchun qo'llanilayotgan tizimning naqadar noto'g'riligi tez-tez tilga olinib, ommaviy axborot vositalarida ko'p bora yoritilsa-da, mazkur musobaqani o'tkazishga mas'ul mutasaddilar bunga e'tibor qaratishmadi. Oqibatda, ikki guruh va ikki bosqichda tashkil etilayotgan birinchi liga  nufuzini deyarli yo'qotib qo'ydi, muxlislarning ushbu musobaqaga bo'lgan qiziqishi susaydi. Bu hol ishqibozlarning stadionga tashrifida  ham yaqqol ko'zga tashlandi.
Ma'lumki, nihoyasiga etgan mavsumni 20ta jamoa «G'arb» va «Sharq» mintaqalarida boshlashdi. Boz ustiga, oldingi yillardagi kabi dastlabki bosqichdan so'ng o'z mintaqalarida oxirgi ikki o'rinni egallagan jami to'rtta jamoa g'alvirdan tushib qolib, futbol mavsumi ayni qizigan pallada boshi berk ko'chaga kirib ketishdi. Achinarlisi, yaxshi niyatlar bilan ushbu klublar safiga qo'shilgan, mahorat va tajriba bobida o'sishga erishayotgan o'nlab yosh charm to'p ustalari kutilmagan to'siqqa duch kelib, endigina ochilayotgan qirralarini namoyon etishdan mosuvo qolishdi. Qizig'i shundaki, ikkinchi bosqich yakuniga ko'ra, so'nggi ikki pog'onani egallagan - «Lokomotiv-BFK» va «G'ijduvon» g'ovga yo'liqib, «pulka»ga jo'nashdi. Axir ular birinchi bosqichdan muvaffaqiyatli o'tgan edilar-ku! Nahotki, ushbu ikki jamoa  birinchi liganing autsayderi hisoblanishsa. Mayli, shunday bo'la qolsin. Unda birinchi bosqichdan keyin musobaqadan chiqarib yuborilgan to'rtta jamoani qanday atash mumkin? Mana, mantiq, mana, birinchi liga.
Bu yilgi tizimning yana bir ajabtovur jihatiga nigoh tashlaymiz. Joriy yilgi reglament  bo'yicha oliy liganing autsayderi, ya'ni Samarqandning «Dinamo» klubi birinchi liga peshqadami - Toshkent shahrining «Obod» jamoasi bilan haqli ravishda o'rin almashdi. Aksincha, kuchlilar safida 15-o'ringa joylashgan «So'g'diyona» esa quyi ligada ikkinchi pog'onani band etgan «Oq-tepa» bilan o'ziga xos o'tish uchrashuvida kuch sinashdi. Kutilganidek, oliy liga vakili o'z o'rnini saqlab qoldi. Aslida, bunday bo'lishini oldindan bashorat qilish mushkul emasdi. Shu o'rinda savol tug'iladi: nima uchun birinchi liganing ikkinchi jamoasiga  ham to'g'ridan-to'g'ri oliy ligada ishtirok etishga ruxsat berilmadi?...
Umuman, har yili bo'lgani kabi joriy mavsumda ham ayrim jamoalarning safar uchrashuvlariga bormaslik holatlari kuzatildi. Ba'zilari esa bor-yo'g'i 11 nafar futbolchi bilan manzilga etib kelishdi. Ular safida massajchi u yoqda tursin, hatto shifokorning yo'qligi dilni xijil qildi. Darvoqe, ba'zi klublarning rahbarlari pulni tejash maqsadida tibbiyot xodimlaridan voz kechganligi ayni haqiqat. Jamoalarning aksariyatida matbuot kotibi ham yo'q. Hatto, qaysidir klublarning bosh murabbiylari yordamchisiz faoliyat yuritishdi. Albatta, bu professional futbolga zid. Ammo negadir, futbolimizda yuzaga kelayotgan muammolarni bartaraf etishga hech kim oshiqmayapti.
Bizningcha, O'zbekiston professional futbol ligasi (PFL) mutasaddilari musobaqa o'tkazish bilan cheklanib qolmay, joylarga chiqib, tegishli hokimliklar, klublar prezidentlari va homiylar bilan uchrashib, mavjud kamchiliklarni bartaraf etish bo'yicha tegishli taklif va istaklarini bildirsa, maqsadga muvofiq bo'lardi. Vaholanki, buni davr taqozo etyapti. Axir jamoa boshlig'isiz, shifokorsiz, yordamchi murabbiysiz, matbuot kotibisiz klub klubmi? Birinchi liga oldinga siljish o'rniga orqaga chekinayotganidan dalolat bu. Ochig'i, uning islohotga muhtojligi sezilyapti.
Endi esa birinchi ligani o'tkazish tizimini yangilash bo'yicha takliflarimizni kiritamiz.
Davomi InterFUTBOL gazetasi blogida.
— deya xabar beradi uff.uz nashri.