«Bavariya»ning polshalik hujumchisi Robert Levandovski yangi mavsumda rekordlar shodasini uzaytirishda davom etmoqda. Polshalik novcha yigit 22 sentyabr kuni «Volfsburg» darvozasini 9 daqiqa ichida 5 marta ishg'ol etib, eng tezkor «penta-trik» muallifiga aylangandi.
Yangi «gol mashinasi» keyingi turda «Maynts» maydonidan «dubl» qayd etgan holda qaytdi. Shu tariqa Robert bundesliganing startdagi 7ta uchrashuvida 10ta gol urgan futbolchi sifatida yana bir rekordni o'rnatdi. Levandovskiga yopishtirilgan «gol mashinasi» maqomi hali keng yoyilmasdan turib, u navbatdagi reaktiv merganlikni amalga oshirdi: ChL doirasida «Dinamo» (Zagreb) darvozasini 3 marta nishonga oldi. Xullas, atigi 1 hafta ichida 10ta gol! Yakshanba kuni esa, qadrdon klubi - «Borussiya»ni 2ta gol bilan «siyladi».
Demak, oxirgi 4ta uchrashuvda 12ta gol! ChLdagi o'yingacha shogirdining samarali o'yinlaridan «erib» ketgan Xosep Gvardiola unga Oktoberfestda sayr qilib kelish huquqini bergandi. «Men unga o'z rafiqasi bilan sayrga chiqishi mumkinligini aytdim», - dedi Gvardiola «Kofas-Arena»da jurnalistlar bilan uchrashuv chog'i. ESPN muxbiri esa vaziyatdan unumli foydalanib, sermahsul hujumchi bilan muloqotga kirishdi.
- Albatta, oqshomni o'z uyimda o'tkazdim. To'g'ri, murabbiy meni qo'yib yuborish orqali ajoyib iltifot ko'rsatdi, - deya Gvardiolani maqtadi hujumchi. - Vaholanki, seshanba oqshomi bizni «Dinamo» (Zagreb)ga qarshi muhim o'yin kutib turardi (takrorlaymiz, miriqib dam olgan hujumchi o'sha o'yinda «xet-trik»ka erishdi). To'pning tez-tez darvoza to'ridan joy olayotgani - ko'ngilli voqea. Ammo bu izlanishdan to'xtab qolishimga sabab bo'lolmaydi.
Robertning fikricha, Gvardiola tomonidan yaratilgan yangi taxtik sxema uning yanada sermahsul to'p surishiga imkon beryapti. Ma'lumki, hozir maydonga tusha olishmayotgan Aren Robben va Frank Riberi hujumchilarga yordam berish barobarida o'zlari ham darvozaga ko'p zarba yo'llashardi. Endi ular jarohat tufayli chetda qolishyapti. Gvardiola esa bo'sh joyga Duglas Kosta va Kingsli Komanni qo'ygach, vaziyat tamomila o'zgardi. «Kosta va Komandek yarim himoyachilarning qanotlardan to'p uzatishlari evaziga darvozani ishg'ol etish uchun ko'proq imkoniyatga ega bo'la boshladim. Shuningdek, Tomas Myuller ham menga faol yordam bermoqda. Oldinroq 4 nafar himoyachi va 2 nafar tayanch yarim himoyachisini ortda qoldirish yolg'iz o'zimga og'irlik qilayotgandi. Endi yonimda Myuller bor. U bilan hamkorlikda himoya chizig'ini yorib o'tish ancha oson», - dedi Robert.
Dortmund «Borussiya»sidan Myunxenga ko'chib o'tgan hujumchi va Myuller juftligi o'tgan mavsum dastlabki 7ta o'yinda 8ta gol urgandi. Bu yil esa 16ta! Xo'sh, Levandovski murabbiy va jamoadoshlarining ishonchlari tobora ortib borayotganini his etyaptimi? «Menimcha, sezyapman. Tajribamdan shunga amin bo'ldimki, ikkinchi mavsum debyutdagidan ancha osonroq. Chunki jamoa bilan to'la tanishib ulgurdim, mendan nima talab qilinishini yaxshi bilaman. Qolaversa, o'tgan yilgi xatolardan to'g'ri xulosa chiqarganim yanada yaxshiroq to'p surishimga imkon beryapti. To'purarlik sabr-qanoatli bo'lishni va o'ziga ishonishni talab etadi. Hujumchida yarim himoyachi kabi to'pga 100 marta teginish imkoniyati yo'q. Masalan, «Maynts» bilan o'yinda to'pni egallab olish uchun maydon markaziga qadar chekinishimga to'g'ri keldi. Lekin shu bilan birga oldingi chiziqdagi holatdan doimo xabardor turish lozim.
«Bavariya»dek kuchli jamoa har qanday vaziyatda 3-4ta qulay sharoit yarata oladi. Ulardan unumli foydalanish shart. Imkoniyatlardan samara chiqarish - to'purarning asosiy fazilati. Bunga tajriba orqali erishiladi. Avvalgi mavsumda «Volfsburg» darvozasiga 5ta gol urganimdek sermahsul emasdim. Lekin muntazam ravishda samarali o'ynab, 17ta gol hosil qildim. Murabbiyimizning avvalgi jamoalarida hujumchilar bilan qanday munosabatda bo'lganidan xabardor emasman. Men uchun buning qizig'i ham yo'q. Aytishim joiz, «Bavariya»da hujumchilar uchun alohida mashqlar ishlab chiqilgan. Ularni mamnuniyat bilan bajaramiz. Gvardiola bilan maqsadimiz bir - jamoa muvaffaqiyati. Munosabatlarimiz ham chakki emas».
Levandovski «Bavariya»ning joriy mavsum ChLda yuqoriroq ko'tarilib, Milanda o'tadigan finalda qatnashishidan umidvor: «Biz endi guruh bosqichidan o'tyapmiz. Butun turnir davomida yaxshi o'ynab, bitta bellashuvda sustkashlikka yo'l qo'ysang - tamom! Hammasi chippakka chiqadi. Shunday ekan, hushyorlikni pasaytirmaslik lozim.
Suhbat jarayonida bundesliganing 8-turidan o'rin olgan «Bavariya»-«Borussiya» D. o'yini xususida ham gap bordi. Dortmund klubining sobiq goleadori jumladan, shunday fikr bildirdi: «Men «Bavariya» safida «Borussiya»ga qarshi bir necha marta maydonga tushishga ulgurdim. Lekin har bir o'yin arafasida o'zgacha hissiyotlar og'ushiga tushaman. Chunonchi, bu o'yin men uchun nihoyatda muhim. Axir Dortmundda unutilmas 4 mavsum o'tkazib, bir qator sovrinlar yutdim, ko'plab gollar urdim. Eng asosiysi, klub bilan men yaxshi holatda xayrlashdiki, bunga doimo hurmat bilan yondashaman. «Signal Iduna Park»dagi oxirgi o'yinimda «Borussiya» fanatlari meni shunday qizg'in qo'llab-quvvatlashdiki, ta'riflashga ojizman.  Ha, «Bavariya»ga o'tishimga qadar «Borussiya»da borimni berib to'p surdim. «Iduna Park»da xizmatlarimni haligacha eslashlari va qadrlashlaridan nihoyatda xursandman. «Borussiya» ayni payt ajoyib holatda. Sobiq jamoam chiroyli futbol ko'rsatish barobarida ko'p gol uryapti. Ishonchim komil, oldinda bizni ajoyib bahs kutyapti» (mazkur bahsda «Bavariya» 5:1 hisobida ustun keldi).
Shu kungacha Robert Levandovski bundesliga doirasida 168 marta maydonga tushib, 103ta gol urdi. Bu statistikasi hali sezilarli darajada o'sishiga aslo shubha yo'q. Axir u endi shunchaki, hujumchi emas, «gol mashinasi»-ku!
E'tirof
- Levandovskining qaysi libosda o'ynayotganiga e'tibor qaratmayman. Shunchaki, uning timsolida buyuk to'purarni ko'ryapman. Mats Xummels («Borussiya» D. a'zosi).
Manba: "InterFUTBOL" gazetasi
— deya xabar beradi uff.uz nashri.