2ta JCh va 3ta Evropa chempionatida o'z mamlakati sharafini himoya qilish hamda Frantsiya, Angriya, Italiya, Gollandiya  kabi davlatlar oliy divizionida o'ynashga ulgurgan har qanday futbolchi quyidagi iboralarni ishonch bilan aytishga haqli: «Faoliyatim muvaffaqiyatli kechdi».
Shvetsiyalik golkiper Andreas Isaksson ham xuddi shunday deya oladi. Biroq uning futbol hayotida ayrim alamli lahzalar ham kuzatildi. Deylik, u «Yuventus»dagi 2 yil davomida biror marta boshlang'ich tarkibda maydonga tushgani yo'q. «Manchester Siti» safidagi 2 yillik faoliyati esa klubning oltin erasi hali boshlanmagan vaqtga to'g'ri keldi. Qolaversa, PSV darvozasini 4 yil davomida qo'riqlagan bo'lsada, bu davrda chempionat g'olibi rutbasiga erisholmadi.
Shuningdek, xalqaro arenadagi ishtiroki ham sovrin bilan bezangani yo'q. Shunga qaramay, shved posboni hammasidan xursand. «O'ylaymanki, hamon o'ynayotgan bo'lsamda, hozirdanoq faoliyatim omadli kechdi, deya olaman. To'g'ri, yanada yorqinroq o'ynashim mumkin edi. Ammo bu haqda o'ylamayman. Umuman, hammasi aynan shunday rivojlanganidan mamnunman»-, deydi ayni payt Turkiyaning «Qosimposho» klubi sharafini himoya qilayotgan faxriy darvozabon. Qisqasi, Shvetsiya termasi posboni FIFA.com saytiga bergan intervyusida faoliyatidagi muhim voqealarni yodga oldi.
- Aytishlaricha, darvozabonlar 30 yoshdan keyingina saviya bobida eng yuqori cho'qqiga chiqishadi. Siz haqingizda ham shunday deyish mumkinmi?
- O'ylaymanki, ha. Hozir 34 yoshdaman va avvalgi mavsumni ancha yaxshi o'tkazdim. Qolaversa, o'yindan o'yinga o'zimni ishonchliroq sezyapman. Shuni nazarda tutib tasdiqlay olaman: 30-35 yosh darvozabon uchun ideal davr. Ehtimol, ayni payt faoliyatimdagi eng yaxshi o'yinlarimni ko'rsatayotgandirman. Ha, boshqa kiperlar haqida ishonch bilan gapirolmayman, lekin o'zim hamon yaxshi sport formasida ekanligimni ta'kidlashga asoslarim etarli.
- Ha, «Qosimposho» safidagi o'yinlaringiz fikringizga isbot bo'lyapti. Harqalay, «Qosimposho» turk chempionatida eng kam gol qo'yib yuborgan jamoalardan biri...
- Shunday. Bunda mening xizmatlarim ham bor, albatta. Ammo dunyoning eng yaxshi darvozaboni ham jamoasi tartibli himoyalanolmasa, hech narsa qilolmaydi. Xayriyatki, «Qosimposho»da himoya bo'yicha muammo yo'q va bu men uchun katta plyus. Har holda, jamoadoshlarimning orqa chiziqdagi harakatlaridan to'liq qanoatlanyapman.
- Odatda turk futboli xususida gap ketganida, asosan Istanbulning 3ta gigant klubini tilga olishadi. Xo'sh, «Qosimposho»ni qanday tavsiflab berasiz?
- Jamoamiz hali yosh. To'g'ri, klubning o'zi uzoq tarixga ega. Ammo stadion va mashg'ulotlar bazasi, umuman, infratuzilma mutlaqo yangi. Klubimiz avvalo, Turkiya chempionatida cho'qqiga ko'tarilishni maqsad qilgan. Buning uchun yaxshigina tarkib shakllantirildi. Aytish joiz, turk futboli jadal sur'atlarda rivojlanmoqda va milliy chempionatda aytishga arzirli klublar soni 3tadan ko'p. Demoqchimanki, birinchilik faqat «Fenerbaxche», «Galatasaroy» hamda «Beshiktosh»dan iborat emas. Boshqacha aytganda, qolgan jamoalar safida ham yaxshi ijrochilar bor. Misol uchun, «Antaliyaspor» tarkibidagi Samuel Eto~Oni olaylik. Xullas, kichik klublar ham oxirgi vaqtlarda yuqori maqsadlarni ko'zlashyapti. «Qosimposho» shulardan biridir.
- Hozir shunday yoshdasizki, ortga nazar solib, faoliyatingizni sarhisob qilishingiz mumkin. Agar imkon berilganida, nimanidir o'zgartirishni xohlarmidingiz? Misol uchun, «Yuventus» safiga Edvin van der Sar bilan bir vaqtga qo'shilib, naq 2 yil zaxira o'rindig'ida o'tirgansiz...
- Yo'q, hammasi shundayligicha qolishini istardim. Ya'ni hech narsadan afsuslanmayman. Deylik, «Yuve»dagi o'sha davr men uchun yaxshigina maktab vazifasini o'tagandi. O'zingiz o'ylang, Shvetsiyaning kamtarin klubidan dunyo futbolining eng buyuk jamoalaridan biri safiga o'tgandim. Men uchun hammasi mutlaqo yangi tajriba bo'lgan va Turinda ko'p narsalarni o'rganganman. To'g'ri, ancha qiynalganim rost. Axir 18 yoshimda ota-onamdan uzoqlashib, o'zga mamlakat, notanish muhitga yo'l olgandim. Aynan o'sha qiyinchilik davri ham o'yin saviyasi, ham shaxs sifatida o'sishimga yordam bergan. Deylik, Alessandro Del Pero, Zayniddin Zidan va David Trezege kabilar bilan birga shug'ullanish... Yosh futbolchi uchun bundan ortiq baxt bormi?
Davomi InterFUTBOL gazetasi blogida.
— deya xabar beradi uff.uz nashri.