«UZREPORT TV» Angliya Premer ligasi o'yinlari translyatsiyasini davom ettiradi. 12 dekabr kuni futbol muxlislarini haqiqiy futbol kechasi kutmoqda, desak mubolag'a bo'lmaydi.
 Toshkent vaqti bilan soat 20:00da «Manchester Siti» va «Suonsi Siti» jamoalari o'rtasidagi o'yin muxlislar e'tiboriga «jonli» efirda namoyish qilinadi.
Ushbu o'yin yakunlanganidan keyin «UZREPORT TV» telekanalida Evro-2016 musobaqasiga qur'a tashlash marosimi translyatsiyasi boshlanadi. Evropaning eng kuchli 24ta terma jamoasi 6ta guruhlarga bo'linib, o'zlarining raqiblari nomini bilib olishadi.
Qur'a tashlash marosimi yakunlanishi bilan muxlislar e'tiboriga «Bornmut» va «Manchester Yunayted» jamoalari o'rtasidagi o'yin havola etiladi. Mazkur uchrashuvda Chempionlar ligasi musobaqasida guruhdan chiqa olmagan Lui van Gal shogirdlari o'z muxlislari oldida «ayblarini» bir oz bo'lsa-da yuvishga harakat qilishlari tabiiy. O'z o'rnida «Bormut» ham avvalgi turda anoyi jamoalardan emasligini isbotladi. Ular «Chelsi»ni mag'lub etishga muvaffaq bo'lishgandi.
13 dekabr kuni esa futbol ishqibozlari 18:30dan boshlab «Villa Park» stadionida bo'lib o'tadigan «Aston Villa» va «Arsenal» jamoalari o'rtasidagi o'yinni tomosha qilish imkoniga ega bo'lishadi. Shu kuni soat 21:00dan boshlab esa «Tottenxem» va «Nyukasl Yunayted» jamoalari o'rtasidagi o'yin to'g'ridan to'g'ri efirga uzatiladi.
14 dekabrdan 15 dekabrga o'tar kechasi tunggi soat 01:00da «Lester Siti» va «Chelsi» jamoalari o'rtasidagi o'yin translyatsiyasi boshlanadi.
Eslatib o'tamiz, «UZREPORT TV» telekanali shu yilning 1 dekabridan boshlab Yamal 401 sputniki orqali efirga uzatila boshlagandi.
— deya xabar beradi uff.uz nashri.