Rossiya Premer-ligasining “Ufa” klubida to'p surayotgan futbolchimiz Vagiz Galiulin mavsum oralig'idagi tanaffusdan foydalanib,  Andijonda bo'lib turibdi. Muxlislar istaklariga binoan legioner futbolchimizdan mo''jaz intervyu oldik.  
 
- Vagiz, Andijonga xush kelibsiz?
- Rahmat. Mavsum oralig'idagi muddat sabab ona yurtimga keldim. Hozir oila a'zolarim,  qadrdonlar davrasida dam olyapman. Bilasiz, futbolchi hayotida bo'sh vaqt juda kam bo'ladi. Shunday bo'lsada fursat topishim bilan O'zbekistonga oshiqaman. Tug'ilib o'sgan qadrdon shahrim Asakaga yurak talpinaveradi.    
- “Ufa” klubida faoliyatingiz qanday ketyapti?
- Klubimiz hozir ta'tilda. Mavsumni turnir jadvalidagi o'rnimizga qarab baholaydigan bo'lsak, o'tgan chempionat “Ufa” uchun omadli kechdi deya olmayman. O'zim ham jarohatlar bois birinchi davra mobaynida asosiy tarkibda kam ko'rindim. Lekin, har safar maydonga tushganimda bor kuchimni berib o'ynashga harakat qildim. Jamoamiz kelgusi yil o'z oldiga katta maqsadlarni qo'ygan. Murabbiy va muxlislarni menga bo'lgan munosabatlari yaxshi. Ularni ishonchini oqlash esa men uchun juda muhimdir. Demak o'z ustimda muntazam ishlab jamoaga foydali o'yinchi bo'lishga harakat qilaman.
- Klubdagi raqobatchingiz Marsinoga ko'p hollarda o'rningizni berib qo'ydingiz?..
- Premer-ligada mavjud raqobatga bardosh berish uchun ko'p mehnat qilish zarur. Bu menimcha yaxshi jihat. Chunki, mana shu omil futbolchini tinimsiz izlanishga majbur qiladi. Yuqori saviyada o'ynash uchun hali etarli kuch-quvvatim bor. Demak, yaxshi o'yin ko'rsatishga intilishim zarur. Kelgusi mavsumdan esa umidlarim juda katta.
- Andijonda yana necha kun bo'lasiz?
- Yurtimda shu oyining oxirigacha bo'lib qaytib ketaman. Ungacha viloyat futbol federatsiyasining taklifi bilan Andijondagi futbol maktablari o'quvchilari ishtirokida bir nechta uchrashuv o'tkazishni rejalashtirganmiz. 26- dekabr kuni yana qadrdon klubim safiga  jo'nab ketaman.
Yanvar oyida esa  jamoamiz bilan Kipr davlatida o'tkaziladigan  o'quv-yig'inga boramiz. Maqsadim doimgidek, u ham bo'lsa - futbolda nimalarga qodir ekanligimni ko'rsatishdir.
      Elmurod ERMATOV suhbatlashdi
— deya xabar beradi uff.uz nashri.