Yakuniga etgan joriy yilgi chempionat davomida jami 54ta qizil kartochka ko'rsatildi. Bu har bir o'yinga 0,22ta chetlatish degani. Ularning 32tasi ikkinchi sariq kartochka tufayli yuz berdi. 1, 6, 14, 22, 23, 25, 26-turlar doirasidagi bahslarda hakamlar birorta ham qizil kartochka ko'rsatmadilar.
Chempionat davomida maydondan eng erta chetlatilgan futbolchi - bu Jalol Kimsanov. U maydonni majburan tark etgan paytda o'yin («Qizilqum» - «Qo'qon-1912» (3:1), 9 may)ning endigina 17-daqiqasi o'tib borayotgan edi.
Jami chetlatishlarning 9tasi 1-bo'limga, 44tasi 2-bo'limga va yana 1tasi o'yindan keyinga to'g'ri keldi. Uchrashuvga qo'shib berilgan daqiqalarda chetlatish esa 10 marta uchradi.
14-turda Ravshan Ermatov («Qizilqum» - «Bunyodkor») futbolchilarga jami 10ta sariq (shularning 3tasi yakunda qizil kartochkaga aylangan) ko'rsatdi. Urilgan gollar va qizil kartochkalarning daqiqalariga e'tibor bersak, unga o'yin tizginini ushlash naqadar qiyin bo'lganligi ayonlashadi.
15-turdagi «Qizilqum» - «Neftchi» bahsida ikki futbolchi maydondan chetlatildi. Uchrashuv hakami Hasan Ro'ziev qat'iy ravishda qaror qabul qildi. Qiziq tarafi shundaki, bu hakam so'nggi to'rt yil davomida bir bahsda bir daqiqaning o'zida ikki futbolchini chetlatishga jazm etmoqda. Bu borada u raqobatdan xoli.
Xuddi shunday holat 29-tur doirasidagi «Sho'rtan» - «Navbahor» bahsida ham ro'y berdi. Andijonlik hakam Temur To'xtasinov 68-daqiqada ikki futbolchini chetlatdi va zaxira o'rindig'idagi ikki futbolchiga sariq kartochka ko'rsatdi.
Eng ko'p «qizil» - «Olmaliq»da
«Sho'rtan» klubi futbolchisi 2-davradagina qizil kartochkaga ro'baro' bo'ldi. «Metallurg»dan esa joriy mavsumda hech kim maydondan chetlatilmadi. «Olmaliq» esa mavsumning eng intizomsiz jamoasiga aylandi - 6ta qizil kartochka. Vaholanki, bundan avvalgi chempionatlarda Igor Shkvirin shogirdlari chempionat yakuniga ko'ra, «feyr-pley» sovrinini qo'lga kiritib yurishgandi. Aynan shu jamoa vakili Evgeniy Gogol «Andijon» (2 marta) va «Sho'rtan» klublariga qarshi bahslarda maydondan chetlatilgan. 6 nafar futbolchida esa 2tadan qizil kartochka bor.
Davomi InterFUTBOL gazetasi blogida.
— deya xabar beradi uff.uz nashri.