Taniqli FIFA hamda OFK instruktori Islom Ahmedov bir hafta mobaynida Hindistonda mahalliy murabbiylar uchun tashkil etilgan seminarda ishtirok etdi. Hamyurtimiz FIFA Youth Coaching Course India deb nomlanuvchi mazkur seminarda hindistonlik murabbiylarga saboq berdi. Rejaga ko'ra, Ahmedov 16 dekabr kuni endi o'zimizning oliy liga murabbiylari uchun tashkil etiladigan bir kunlik seminarda yo'riqchilik vazifasini bajaradi. Biz safar taassurotlari va rejalar xususida Islom Ahmedovdan intervyu oldik.
- Islom aka, suhbatimiz avvalida Hindistondagi o'quv-kurslari haqida ma'lumot bersangiz.
- Bu men uchun FIFA tomonidan tashkil etilgan birinchi seminar edi. Juda katta taassurotlar bilan qaytdim. Ochig'i, hind futbolida sezilarli o'zgarishlar ko'zga tashlanyapti. Ular tashkiliy masalalar bo'yicha ancha ilgarilab ketishibdi. Bolalar va o'smirlar futboliga professional darajada yondashayotganiga guvoh bo'ldim. Murabbiylarni qayta o'qitish, ular orasidan eng saralarini tanlab olishga e'tibor berilyapti. Men rahbarlik qilgan kursda ham Hindistonning turli hududlaridan kelgan eng sara murabbiylar ishtirok etishdi. Ularning aksariyati ayni paytda o'smirlar va yoshlar bilan ishlashyapti. Kezi kelganda aytish kerak, ushbu mutaxassislarning bari oliy ma'lumotli va bolalar futbolida ishlash bo'yicha katta tajribaga ega. Ular bilan birga ishlash menga ishtiyoq va maroq baxsh etdi.
- Mamlakat futboli bilan tanishishga ulgurdingizmi?
- Albatta. Bir paytlari Hindistonda murabbiy sifatida ishlaganman. O'sha davr bilan hozirgisini taqqoslaganda, er bilan osmonchalik farq ko'zga tashlanyapti. Hindiston futboli barcha yo'nalishlar bo'yicha professionallikka erishmoqda. Bu taraqqiyot yo'lida yirik mablag' sarflanyapti. Sarmoyadorlar katta pul tikishyapti. Mamlakat superligasining barcha klublari qoshida akademiya va futbol maktablari faoliyat yurityapti. Har bir yosh toifasida mamlakat birinchiliklaridan tashqari, turli turnirlar o'tkaziladi. Hindistondek katta davlatda bunday keng miqyosdagi musobaqalarni o'tkazish oson emas. Lekin mamlakat futbol federatsiyasi bu ishlarning uddasidan chiqyapti. Murabbiylarni tayyorlash va ular orasidan eng saralarini ajratib olishga alohida e'tibor berilmoqda. Kim xohlasa murabbiy bo'lib ketavermas ekan. Shu narsa meni hayron qoldirdi. Nafaqat futbol, balki boshqa barcha sohalarda ham aynan kadrlar muvaffaqiyatning zamiri va kaliti hisoblanadi. Qaerda malakali murabbiy va ustozlar bo'lsa, o'sha sohada rivojlanish, o'sish, taraqqiyot ko'zga tashlanadi. Bu qoidani hali hech kim inkor qilgani yo'q. O'zbek futbolida ham shu haqida bosh qotirsak yomon bo'lmasdi.
- Sir emas, ayni paytda Hindiston chempionatida legionerlar ko'pchilikni tashkil qiladi. Ular orasida anchagina mashhurlari ham bor. Lekin terma jamoasi kuchli emas. Buni Angliya misolida ko'rish mumkin. Chempionati legionerlar hisobiga kuchli, ammo terma jamoasi haqida bunday deyish noo'rin. Bu borada nima deysiz?
- Fikringizga to'liq qo'shilaman. Bejiz yuqorida hindlar murabbiylar masalasiga jiddiy e'tibor qaratishayotganini aytmadim. Ular avval bolalar bilan ishlaydigan murabbiylar masalasini tartibga solib, keyin shu yo'l orqali natijaga erishishga umid qilyaptilar. Bu to'g'ri yo'l. Mahalliy futbolchini kim tarbiyalaydi, albatta, murabbiy. Hindiston futbol federatsiyasi rasmiylari bilan gaplashganimda, ular legionerlarga bosqichma-bosqich cheklov e'lon qilib borishlarini aytishdi. Ko'proq mahalliy futbolchilarga e'tibor berishmoqchi. Lekin kuchli legionerlar ham kerak. Mahalliy o'yinchilar kimdandir o'rganishi kerak-ku! Ayrim klublarning futbol maktablari va akademiyalari bilan tanishishga muvaffaq bo'ldim. Bu maktablarda hind futbolining ertangi egalari saboq olishyapti. Yaqin 5-10 yil ichida Hindiston futboli ham Osiyodagi elit davlatlar qatoriga qo'shiladi. Shaxsan men buni ishonch bilan ayta olaman. O'sha maktab va akademiya tarbiyalanuvchilarini yorqin kelajak kutyapti. Bolalar futboliga juda katta sarmoya yo'naltirilyapti.
- Hozir Hindiston oliy dvizioni futboldan ko'ra shouga o'xshab qolmayaptimi?
- Gapingizda jon bor. Yulduz futbolchilarning taklif etilishida ham siz aytgan fikr o'z tasdig'ini topyapti. O'yinlarni boshqarish uchun mashhur hakamlar taklif etilmoqda. Ikki yildan beri Hindiston superligasining  «pley-off» o'yinlarini hamyurtimiz Ravshan Ermatov va uning brigadasi boshqarib kelayotgani ham fikrimga yaqqol misol bo'la oladi. Ma'lumki, Hindistonda futbol birinchi raqamli sport turi emas. U erda kriket o'yinlarini sevib tomosha qilishadi. Stadionlari to'lib-toshadi. Yulduz futbolchilarni chaqirish orqali ham hindlar stadionga kelayotgan futbol muxlislar sonini oshirish, ommaviylikka erishishni maqsad qilishgan.
Davomi InterFUTBOL gazetasi blogida.
— deya xabar beradi uff.uz nashri.