Yaqinlashib kelayotgan yil yurtimiz sporti tarixida yangi sahifa ochilajak.
Nasib etsa, Rio-de-Janeyroda o'tadigan yozgi Olimpiya o'yinlarida yurtdoshlarimiz shoda-shoda medallar bilan Vatanimizga qaytib kelishadi. Bu borada kurashchilarimizdan, ayniqsa, umidimiz katta. XXI asrda o'tkazilayotgan har bir yozgi Olimpiya o'yinlarida o'zbekistonlik kurashchilar shohsupaga ko'tarilishmoqda.
O'ziga xos bunday yoqimli an'anani davom ettishi barchaga birdek manzur. Ayni kunga kelib Braziliya Olimpiadasi uchun 2 nafar kurashchimiz yo'llanmani qo'lga kiritib ulgurishdi. Bu esa poyoniga etib borayotgan yilning eng katta yutug'idir. Keling, bugun sport kurashi bo'yicha terma jamoamiz a'zolarining 2015 yilgi ishtiroklariga bir nazar tashlasak.
Yil davomida sport kurashlari bo'yiicha juda ko'p xalqaro musobaqalar bo'lib o'tdi va unda yurtdoshlarimiz qator medallar bilan ortga qaytishdi. Shu boisdan ham yirik musobaqalarga to'xtalib o'tsak. Kurashchilarimizning dastlabki yirik muvaffaqiyatiga erkin kurashchimiz Rashid Qurbonov mualliflik qildi. Fevralda o'tkazilgan Parij Gran-prisida vakilimiz oltin medalga sazovor bo'ldi. Aprel oyida navbatdagi Gran-pri musobaqasi bo'lib o'tdi. Turkiya mezbonligida kechgan bellashuvlarda Rustam Assakalov shohsupaga ko'tarildi.
May oyida esa vakillarimiz qit'a chempionatida sermahsul qatnashdilar. Qatarda o'tgan Osiyo chempionatida vakillarimiz 3 ta oltin va 6 ta bronza medallariga ega bo'lishdi. Quvonarlisi, finalda kurashgan barcha sportchilarimiz g'alaba qildi (Bekzod Abdurahmonov, Elmurat Tasmuradov, Rustam Assakalov).
 
Yil qaytishi. Olimpiya o'yinlari sovrindori Soslan Tigiev yozda o'z muxlislarini bir xursand qilgandek bo'ldi. Armanistonda o'tkazilgan xalqaro turnirda qatnashib, kumush medal egasiga aylandi. Biroq shundan keyin biror musobaqada ko'rinish bermadi.
 
Iyun oyida asosiy e'tibor Hindiston poytaxtida o'tgan yoshlar o'rtasidagi Osiyo chempionatiga qaratildi. Boisi, ushbu musobaqa kelajagimiz egalarining dunyo birinchiligi oldidan qanday formada ekanliklarini ko'rsatib berishi kerak edi. Musobaqa davomida ayon bo'ldiki, mahoratli yosh kurashchilarimiz bir necha yildan keyin kuchli avlod vakillari bo'lib kamol topishadi. Kerak bo'lsa, ular hozirgi akalaridan ham o'tadigan bo'lib etishadi. Buni ular Saraevoda o'tgan yoshlar o'rtasidagi jahon chempionati isbotladi. Yunon-rum kurashi bo'yicha yurtimiz sharafini himoya qilgan To'rabek Tirkashev -46 kilogramm vaznda barcha raqiblarin mag'lub etib, yurtimiz bayrog'ini yuksaklarga ko'tarilishiga sababchi bo'ldi.  Shuningdek, egizaklarimiz Hasan va Husan Rahimovlar eng yuqori vaznda erkin kurashchilar orasida kumush medal bilan yurtimizga qaytib kelishdi.
 
Endi navbat kattalar o'rtasidagi jahon chempionatiga. Sentyabrning dastlabki yarmini ko'pchilik yurak hovuchlab o'tkazgan bo'lsa ajab emas. Las-Vegasdagi jahon chempionatida erkin kurashchimiz Ixtiyor Navro'zov (-65 kg) va klassik kurashchimiz Rustam Assakalov (-85 kg) o'z vazn toifalarida finalgacha etib borib, jahon chempionatining kumush medali bilan birga Rio Olimpiadasiga yo'llanmani ham olib kelishdi. Biz uchun quvonarlisi, ularning vazni Olimpiya o'yinlari dasturiga kiritilgani bo'ldi. Mana shu narsa bizni yana bir karra xursand qildi. Afsuski, qolgan vakillarimiz asosan chorak finalda o'z yurishlarini to'xtatishdi.
 
Jahon chempionatida yo'llanmani ololmagan vakillarimiz yangi yilda bo'lib o'tadigan litsenzion musobaqalarda omad tilab qolamiz. Buning uchun ularda imkon va qobiliyat etarli. Noyabrda o'tgan oltin Gran-pri buni ko'rsatib qo'ydi. Ayniqsa, Tasmuradov va Abdurahmonovning ajoyib sport formasida ekani yanada yaxshi. Bekzod Abdurahmonov haqida gap ketar ekan, endi bu kurashchimiz Olimpiada dasturiga kiritilgan vaznda kurashishini alohida ta'kidlash kerak.  
 
Kelasi yili bo'lib o'tadigan navbatdagi kvalifikatsiya musobaqalarida, ayniqsa, Olimpiadaga yo'llanma ola olmagan kurashchilarimizga omad tilab qolamiz. Umid qilamizki, ular delegatsiyamiz safini yana anchaga kengaytirishadi.
Manba: www.sports.uz
— deya xabar beradi uff.uz nashri.