Yurgen Klopp va “Liverpul” klubi rahbariyati germaniyalik mutaxassisning ish shartlarini muhokama qilishda davom etishmoqda. Bild nashrining ma'lumotiga ko'ra, 48 yoshli mutaxassis agenti Mark Kosichke bilan ish shartlarining so'nggi masalalarini hal etish va shartnoma imzolash uchun bugun Angliyaga etib keladi. Ertasi kuni esa Klopp “Liverpul” bosh murabbiyi sifatida ommaga tanishtiriladi. Murabbiyning yillik maoshi esa 10 million evroni tashkil qiladi. Xabar qilinishicha, “Liverpul” rahbariyati Klopp Brendan Rojersning yordamchilari Shon O’Driskoll va Geri Makallister bilan ishlashini talab qilmoqda. Klopp esa o'z navbatida o'zining Dortmundning “Borussiya” jamoasidagi yordamchilari Jelko Buvach va Peter Kravetslar bilan birgalikda ish olib bormoqchi.
— deya xabar beradi uff.uz nashri.