Keyingi vaqtlarda turli ommaviy axborot vositalarida, ayniqsa, veb saytlarda millionlar o'yini haqida jiddiy bahslar kuzatilmoqda. Vaholanki, bunday qizg'in muhokamalar, agar axloq va adolat mezonlari buzilmasa, judayam zarur, buning hech bir yomon joyi yo'q. Afsuski, ba'zan yuzer (saytda ro'yxatdan o'tgan va materiallarga izoh qoldirayotgan foydalanuvchi)larning be'mani fikrlariga, ochiq-oshkora tahdidli, tahqirli mulohazalariga ko'zimiz tushib o'ylanib qolamiz. Shunday muxlislarimiz ham bormi?
Futbol er yuzidagi aksariyat odamlar uchun eng qiziqarli o'yin, eng ko'ngilochar tomoshaga aylanib ulgurdi. Endi muxlislar to'rtburchak maydonda to'pning shunchaki yumalashini ko'rish uchun emas, balki havoda va erda shiddatu go'zallik kasb etayotgan to'p va oyoqlar falsafasini, o'yinchilarning yuz ifodasiyu, tabassum va afsuslarini, xullas, hissiyotlarini ko'rish, anglash uchun musobaqalarga keladigan bo'ldilar. Chunki inson tabiati azaldan hissiyotlarga, ifodalarga o'ch bo'lgan. Futbolni esa hissiyot va ifodalar o'yini, deyish mumkin.
Futbolning rivojlanish jarayonlari bilan birgalikda muxlislikning turli xil ko'rinishlari ham paydo bo'la boshladi. Endi tez-tez «Fanat» so'zini eshitishga o'rganib qoldik. «Fanat» so'zi lotinchada «Ko'r-ko'rona ishonuvchi», «Asabiy» degan ma'nolarni bildiradi. Ma'lumki, mohiyati anglanmay qilingan xatti-harakat intihosi har gal noxush tugaydi. Asabiylik esa shundan boshlanadi. Bugungi dunyo futbol «Fanat»larini ham shu holat yo toifaga tenglash mumkinmikin? Afsuski, o'xshashi yo'q ohang va ma'nosiz qo'shiq so'zlariga jazavaga tushayotgan «san'at shaydolari»ni ko'p kuzatmoqdamiz. Ayrim rivojlangan davlatlarda o'tkazilayotgan futbol uchrashuvlaridagi muxlislarni ko'rib hayron qolasan kishi. Ba'zilari yalang'och badanidagi turfa yozuv va beo'xshov tatuirovkalarni ko'z-ko'z qilib, bachkana bezak va taqinchoqlarini shaqirlatib, junbushga tushadi. Ularning asl maqsadi nima ekan? degan savol o'ylantiradi. Bu futbolga muhabbatmi yo o'zaro totuvlikka, ham sport, ham san'atga aylangan futbol jozibasiga putur etkazish, turli nizolar keltirib chiqarish maqsadida atay o'ylangan usulmi? Ehtimol, bu bugun dunyo bo'ylab shahdam odimlayotgan «Ommaviy madaniyat»ning muxlislik niqobi ostidagi yolg'on ko'rinishidir?
Yurtimizda futbol muxlislari uchun barcha qulayliklar muhayyo. Shaharu qishloqlarimizda qurilayotgan muhtasham sport inshootlari, futbol stadionlarida tomoshabin-muxlislar uchun eng qulay sharoitlar yaratilgan. Endilikdagi vazifa esa futbol klublari va muxlislar o'rtasidagi aloqalarni kuchaytirish, stadionlarda muxlislik madaniyati tartib-qoidalariga rioya etilishini ta'minlash, ayni shu maqsad yo'lida yosh va barkamol avlodimizni vatanparvarlik, bag'rikenglik, vazminlik ruhida tarbiyalash barchamizning burchimizdir.
Xayrullo VASIEV blogidan olindi.
— deya xabar beradi uff.uz nashri.