O'zbekiston chempionati oliy ligasining ortda qolgan joriy mavsumi o'tgan yil bilan taqqoslaganda ancha qiziqarli kechdi. Ham sovrinli o'rinlar uchun kurash, ham kuchlilar safida o'z o'rnini saqlab qolish uchun bahs so'nggi turgacha davom etdi. Ikkala yo'nalishda ham aynan oxirgi turda o'rinlar taqsimlandi.
Masalan, mavsumni o'ta omadsiz o'tkazgan va chempionatning kattagina qismida turnir jadvalining so'nggi pog'onasida peshqadamlik qilgan «Buxoro» jamoasi mo''jiza evaziga elitadagi o'rnini saqlab qoldi. Oxirgi turda «Dinamo»ning o'z maydonida «Olmaliq»ni mag'lub eta olmagani va o'z o'rnida «Buxoro»ning Jizzaxdagi muvaffaqiyati buxorolik futbolchilar joniga oro kirdi. Albatta, bunda ikkinchi davrada katta hajmdagi ishni amalga oshirgan futbolchilar, xususan, Aziz Ibragimovning xissasi katta bo'ldi. Biz bu yilgi mavsumda to'purarlik mahoratini namoyish etgan yarim himoyachidan chempionat yakunlari mavzusida intervyu oldik.
- Ayni paytda Pragada hordiq chiqaryapman, - deya so'z boshladi A.Ibragimov. - Shu orqali yangi mavsumga tayyorgarlik ko'rmoqdaman.
- Toshkentga qachon qaytasiz?
- Bilmadim. Bu savolingiz hozircha ochiq qoladi. Chunki takliflar bisyor, savolga aniq javob berishim qaysi jamoa variantida to'xtalishimga bog'liq.
- Chexiyada qolish variantlari ham bormi?
- Xuddi bizda bo'lgani kabi Chexiyada ham mavsum yakunlangan. Hamma ta'tilga chiqqan. Bu bilan takliflar ham yo'q, deya olmayman.
- Mavsumni «Dinamo»da boshlab, «Buxoro» jamoasida tugatdingiz. Menimcha, bunday bo'lishini o'zingiz ham kutmagan bo'lsangiz kerak?
- Bilasizmi, «Dinamo»da mavsumning oxirigacha o'ynayman, deb o'ylagandim. Shunday ezgu istak bilan shartnomaga imzo chekkan edim. Ochig'i, bunday yakun bo'lishini kutmagandim. Ikkinchi davrada «Buxoro»ga o'tib, shu jamoada chempionatni yakunlashim siz aytgandek, men uchun kutilmagan holat bo'ldi.
- «Buxoro» jamoasining oliy ligada qolishini ko'pchilik kutmagandi. Shaxsan o'zingiz bunga oxirigacha ishonganmidingiz yoki...?
- Bunga mendan ko'ra «Buxoro» muxlislari ishonishgan va umid qilishgan bo'lsa kerak. Haqiqatan ham, jamoamiz qiyin va murakkab ahvolga tushib qolgandi. Ikkinchi davrada ro'y bergan o'zgarishlar esa klubning oliy ligada o'z o'rnini saqlab qolishiga zamin yaratdi. Shu o'rinda bizni qiyin vaziyatda ham qo'llab-quvvatlagan, oxirigacha ishonch bildirgan jamoamiz muxlislariga futbolchilar nomidan minnatdorchilik bildiraman.
- «Buxoro» jamoasi rahbariyati joriy mavsum bo'yicha barcha futbolchilar bilan va xususan, siz bilan hisob-kitobni to'liq amalga oshirdimi?
- Yangi yil bayramigacha barcha qarzlarni to'lashga va'da berishgan. O'ylaymanki, ular o'z so'zlarining uddasidan chiqishadi.
- Jamoa bilan shartnomangiz yakuniga etdi. Yangi mavsumni katta ehtimol bilan «Buxoro»da boshlasangiz kerak?
- Bilmadim, balki shunday qilarman. Qaror chiqarishga shoshilmayman. Takliflarni ko'rib chiqib, yakuniy qarorga kelaman. Bu borada xato qilmasligim kerak. Hozir dam olyapman va kelasi mavsum haqida o'ylash uchun hali fursat bo'ladi.
- Bu yil ancha sermahsul o'yin namoyish etdingiz. Tabiiyki, bunday holatda takliflar bo'lsa kerak?
- Albatta. Takliflar etarli. Lekin yuqorida aytganimdek, qaror chiqarishga shoshilmayman.
- Yangi mavsumda ham oliy ligamizda o'ynash niyatingiz bormi?
- Bo'lishi mumkin. Oliy liganing bir nechta jamoasidan takliflar bor. Ammo xorij klublaridan ham taklif yo'q emas.
- Umuman, bu yilgi mavsum yuzasidan umumiy fikr va xulosalaringiz qanday bo'ldi?
- Bu yilgi chempionat barcha uchun hayajonli kechdi, deb aytish mumkin. Chempionlik masalasi va oliy ligada qoladigan klub nomi ham so'nggi - 30-turda aniq bo'ldi. Shuning o'ziyoq chempionatimizning qanday o'tganligini ko'rsatib turibdi.
- Tez orada mavsumning eng yaxshi futbolchisi aniqlanadi. Kimlarni kuchli uchlikda ko'rishni istardingiz?
- Igor Sergeev, Marat Bikmaev, Aleksandr Lobanov. Menimcha, chempionat to'purari bo'lgan «Paxtakor» hujumchisi 2015 yilgi mavsumning eng yaxshi futbolchisi, deb topilsa kerak. Shunday bo'lishini istardim.
- Taxminingizcha, murabbiylarning kuchli uchligi qanday ko'rinishda bo'ladi?
- Jamshid Saidov, Samvel Babayan, Ro'ziqul Berdiev. Yilning eng yaxshi futbolchisi va murabbiyini jurnalistlar aniqlab berishadi.
Davomi InterFUTBOL gazetasi blogida.
— deya xabar beradi uff.uz nashri.