Sardor Rashidov Qatar chempionatining navbatdagi turida ham to'p kiritdi. Bu safargi golning qiymati ham ancha baland - «Al-Jaish» kimsan Xavi va Ibrohim Xalfan kabi futbolchilari bor «Al-Sadd»ga qarshi maydonga tushib, 4:2 hisobida g'alabaga erishdi. Mana shu to'rt golning biri Sardor Rashidovga tegishli. Qolaversa, u jamoasining birinchi golida ham ishtirok etib, jamoadoshini aniq «pas» bilan ta'minladi.
Bu o'yinni ko'ra olmaganlar, Sardor kiritgan to'p va amalga oshirgan golli uzatmani osongina tasavvur qilib olishlari mumkin. Uning deyarli barcha muvaffaqiyatli yurishlari bir-biriga juda o'xshaydi - bir zumda qarshi hujumga o'tib ketish, tezligi va texnikasi evaziga raqibni ortda qoldirish va uzoqdan zarba yo'llab, gol urish Rashidovning «tashrif qog'ozi»ga aylanib bo'lgan. Quvonarli tomoni, O'zbekiston terma jamoasi futbolchisi «Al-Jaish»da ham mana shu iqtidorini namoyish etmoqda. Buni qarangki, yarim himoyachi Qatar chempionatida o'tkazgan 8ta o'yinida 8ta gol uribdi. Shunday ekan, Sardor «Al-Jaish» o'zi uchun sarflagan pullarning har bir tsentini oqlamoqda, deyish mumkin. Qatarliklar esa bunday tsentlardan ancha-munchasini sarflashgan - naqd 2 million dollar! Futbolchini tarbiyalab bergan «So'g'diyona» uchun to'langan mablag'ni ham inobatga olsak, bu qiymat yana 100 ming dollarga ko'payadi.
Ammo Sardor Rashidovning joriy mavsumdagi o'yini har doim ham birdek silliq kechmadi. Yarim himoyachi yil boshida Osiyo kubogida yorqin o'yin namoyish qilgach, «Bunyodkor»da ham mavsumni ajoyib tarzda boshlagan edi. Biroq keyinchalik asta-sekin shashti pasayib bordi va hatto zaxirada qolishni ham boshladi. Sergey Lushanning o'yin uslubi Rashidovga uncha mos kelmadi shekilli, ba'zi uchrashuvlarda almashtirilgan bo'lsa, bosh-qasini zaxira o'rindig'ida boshlashiga to'g'ri keldi. Ammo Qatar chempionatiga o'tdi-yu, qayta porlay boshladi. Xo'sh, buning sababi nimada?
Shu o'rinda eng avvalo, «Al-Jaish» bosh murabbiyi Sabri Lyamushi haqida ikki og'iz fikr bildirsak. Ko'pchilik muxlislar bu murabbiyni Frantsiya terma jamoasidagi o'yini orqali taniydilar. «Al-Jaish»dagi ishi timsolida shuni ham bilib olish mumkinki, Lyamushi murabbiylik sohasida ham yaxshi ish olib borayotgan ko'rinadi. Ayni vaqtda u boshchilik qilayotgan klub Qatar yulduzlar ligasida ikkinchi o'rinda bormoqda. Bu esa dunyo bo'ylab iqtidorlarni jamlayotgan chempionat uchun yomon natija emasligi turgan gap. O'zbek futboli muxlislari esa bu murabbiyga Sardor Rashidovning iqtidorini qayta ochib berayotgani uchun minnatdorchilik bildirishlari lozim. Gap shundaki, Sardor «Al-Jaish»ga o'tgach, yangi jamoasiga moslashish davomida qisqa, ammo murakkab davrni boshidan o'tkazdi. Dastlabki o'yinlarning birida murabbiy uni almashtirgach, zaxira o'rindig'i emas, darhol kiyinish xonasi tomon yo'l olgani ham shundan dalolat bersa kerak. Aksariyat murabbiylar futbolchining bunday «qilig'i»ni o'zi uchun haqorat deb bilgan va unga qarshi chora ko'rgan bo'lar edi. Biroq Lyamushi shogirdini yaxshi tushundi va uni qo'llashda davom etdi. Mana endi Sardor bor iqtidorini ko'rsatmoqda.
Ammo Lyamushi faqat shu bilan yaxshi murabbiy bo'lib qolmaydi. Bizni hayron va qoyil qoldirgan jihat - frantsiyalik murabbiyning qisqa vaqt ichida Rashidovning potentsialini ilg'ay olgani va undan maksimal tarzda foydalanayotgani bo'ldi. Sardor shunday futbolchiki u qora ishni uncha xush ko'rmaydi va ko'proq ijodkorlikni yoqtiradi. Lyamushi futbolchining mana shu sifatini o'rinli qo'llayotganiga tasanno. Masalan, «Bunyodkor»da buning uddasidan chiqmagandilar. Sardor yaqinda bergan intervyusida «Al-Jaish»da erkin ijodkor sifatida to'p surayotganini aytgan edi. Ya'ni, u hujumni rivojlantirish davomida o'zi istagan qarorni qabul qilish huquqiga ega: istasa, raqibini aldab o'tadi, xohlasa, uzoqdan zarba beradi. «Al-Jaish» qayd etayotgan natijalar esa bu qaror qay darajada to'g'ri ekanligidan dalolat.
E'tibor bering, Lyamushi Qatar chempionatida texnik jihatdan kuchli bo'lgan arab futbolchilari orasidan Sardorni erkin ijodkor sifatida tanlab olmoqda. Demak, u shunga arziydigan futbolchi. Bundan esa quyidagicha xulosa chiqarsa bo'ladi: ko'proq taktik jihatdan kuchli sanaluvchan Sergey Lushan Rashidovdan o'z o'rnida foydalana olmagan ekan. «Bunyodkor» Lushan qo'l ostida «ommaviy hujum va ommaviy himoya» uslubida to'p surgan edi. Ya'ni, hech bir futbolchi «qora ish»dan bosh tortmasligi va raqibni pressing qilishda muntazam ishtirok etishi ko'zda tutilgan. Shu bilan birga, hujumda ham. Albatta, bu uslubning foydali jihatlari ko'p.  Aytaylik, Lushan va «Bunyodkor» ko'plab g'alabalarga erishdi. Ammo ba'zi futbolchilarga boshqacharoq yondoshish lozim bo'larkan.
Sardor Rashidovning bu jihatini ilg'agan faqat Sabri Lyamushi emas. Yaxshi bilamiz, yarim himoyachi O'zbekiston terma jamoasi safida ham deyarli shunday o'yin namoyish qilmoqda. Rashidovga o'z iqtidorini namoyish etishi uchun ko'proq hudud kerak. U o'yin uslubiga ko'ra, Krishtianu Ronalduga yaqin.
Davomi InterFUTBOL gazetasi blogida.
— deya xabar beradi uff.uz nashri.