Yaqinda jahon miqyosidagi eng yirik voqealardan biri - 2015 yilgi Nobel mukofoti egalarini aniqlab, ularni munosib taqdirlash marosimi o'tkaziladi. Championat.com esa ushbu anjumandan so'ng futbol olamidan ham mazkur e'tirofga loyiq charm to'p ustalari va murabbiylarni aniqladi. Quyida ularning ro'yxati bilan tanishishingiz mumkin.
Adabiyot bo'yicha: Zlatan Ibragimovich
Jahon va Evropa chempionatlarida bir oz bo'lsada maydon egalariga yon bosish kuzatiladi. To'g'ri, bu qoidalarga zid, ammo shunga qaramay, haqiqatan shunday holatlar ro'y beradi.
Biroq bugungi mukofotni topshirish chog'ida hay'at a'zolari adolatparvar ekanliklarini ko'rsatishdi. Stokgolmda g'olib nomi aniqlangach, ko'plab savol va munozaralar tug'ilishi tabiiy. Ammo qahramonimiz bunday holatlarga tez-tez ro'baru bo'ladi, shunday ekan, maqsadga ko'cha qolaylik: «Adabiyot bo'yicha Nobel mukofoti... Zlatanga topshiriladi!». Shvetsiyalik adibning nomi ko'p narsani anglatadi. Buyuk ser Aleks Fergyuson hamda RF Madaniyat vaziri Vadim Evseevga ovoz berganlar uchun tushuntirish bermoqchimiz. Ushbu tanlovimiz quyidagi uchta muhim omilga asoslandi: 1) qissaning noodatiyligi va sifati, 2) syujetlarning qiziqarliligi, 3) yakunning shov-shuvli ko'rinish olishi. Dastlabki ikkita jihat bo'yicha barcha da'vogarlar tengsizlar, albatta. Biroq Fergyuson va Evseevning ijodlari asosiy mutaxassisliklariga hamohang ravishda yakun topdi (aytishlaricha, ular avvallari futbol sohasida faoliyat yuritishgan). Zlatanda «ochiq final»ning borligi tanqidchi adabiyotshunoslar uchun yoqib tushdi.
«Men Zlatanman! Balki bu mening Nobel mukofotini olish borasidagi so'nggi imkoniyatimdir. Mazkur e'tirofga loyiq ko'rilgan ekanmanmi, demak endi bemalol ayta olaman: bu erda mendan-da ko'rkamroq odamni ko'rmayapman, demak mazkur masalada boshqa nomzodni kutmanglar!», - dedi Ibragimovich mukofotni olarkan.
Ximiya bo'yicha: Lui van Gal
«Futbol jamoasidagi eng muhim narsa - o'yinchilarning darajasi yoki bosh murabbiyning mahorati emas. Asosiysi - klubdagi «ximiya». Muvaffaqiyat qozonish uchun eng avvalo, barcha bir-biri bilan iliq munosabatda bo'lishi, hamjihatlikka e'tibor qaratishi lozim. Bu bazadagi farrosh va oshpazdan tortib, futbolchi hamda murabbiylargacha taalluqli. «Manchester Yunayted»da aynan shu «ximiya»ning mavjudligini ta'minlashga intilyapman».
Mazkur jumlalarga astoydil e'tibor bersangiz, ximiya bo'yicha Nobel mukofotining kimga nasib etishiga amin bo'lasiz. To'g'ri, u Gollandiyadan, o'zini juda yaxshi ko'radi, faylasuflarga xos tarzda fikr yuritishni yoqtiradi. Biroq adabiyot bo'yicha mukofot o'z egasini topdi, shunday ekan, Lui van Gal ximik sifatida taqdirlanadi. Chunonchi, u «MYu»da mazkur fan borasida inqilob qildi.
Avvallari ximiyaning butun dun­yoga bunday ta'siri kuzatilmagandi. Gollandiyalik daho o'z tajribasi orqali yangicha ko'rinishdagi olimga aylandi. Kutib oling, Lui van Gal - kurrai zamin tarixidagi dastlabki anti-alximik. U oltinni hech kimga keraksiz oddiy unsurga aylantira olishni o'rgandi. Uning «ximiya»si sharofati bilan hamisha oltin medallar uchun kurashgan jamoa nursiz o'yin ko'rsatmoqda, boz ustiga, Chempionlar Ligasidan chiqib ketdi. Van Gal o'tkazgan tajriba «MYu»ning millionlab ishqibozlari kayfiyatini o'zgartirdi. Bu sizningcha, ximiya fanida ulkan muvaffaqiyat emasmi?
Tinchlik bo'yicha: Devid Bekxem
U Buyuk Britaniyaning kelishgan yigiti, po'rim jentlmen bo'lishdan tashqari, bag'rikeng va oqko'ngil hamdir. Devid nafaqat o'z hayotini ta'minlash, balki 769 nafar turli qarindoshlariga yordam ko'rsatishga qodir ekanini ko'rsatdi.
Endilikda angliyalik futbolchi o'z pullarini oqilona ravishda sarf­lamoqda. Bekxem xayriya ishlari bilan shunchaki xo'jako'rsinga shug'ullanmaydi. Nochorlarni moddiy jihatdan qo'llab-quvvatlashdan maqsad muxlislarning e'tiborini qozonish emas. Bu bilan nimagadir sha'ma qilmoqchimasmiz. «MYu»ning sobiq sardori o'zgalarga yordam ko'rsatishda samimiylikka urg'u beradi. Shu, xolos.
Devid so'nggi yillar mobaynida o'nlab xayriya aktsiyalarida qatnashdi. Butun dunyodagi bemor bolalarga yordam qo'lini cho'zdi, Fillippindagi tabiiy ofatdan zarar ko'rganlarga ko'maklashish maqsadida bir necha million funtlik buyumlarini sotdi. «PSJ»dagi maoshini nochorlarga tarqatdi, oddiy xalq, kam ta'minlangan oilalarga tashrif buyurib, ularga qimmatbaho sovg'alar ulashdi. So'ngra bolakaylar bilan hovlida futbol o'ynadi. E'tiborlisi, bu kichkintoylar begonalarning farzandi bo'lishiga qaramay, xuddi o'z zurriyodidek g'amxo'rlik qildi. Bekxemning ibratga arzigulik ishlari haqida uzoq gapirish mumkin. Demak, Devid - ushbu nomga eng loyiq nomzod. Uning jam­g'armasida Chempionlar Ligasi oltin medali bor edi, mana, endilikda yana bir muhim sovrin - Nobel mukofoti ham qo'shildi.
Fizika bo'yicha: Manuel Noyer
Bir necha yillardan buyon bu nominatsiyadagi mukofot ilmiy yuksalishga erishgan, bizga dunyoni yanada yaxshiroq tanishimiz, fizika qonunlarini o'rganishimizga zamin hozirlagan kishilarga topshirib kelinmoqda. Ajoyib olimlar, Nobel mukofotining avvalgi sohiblari, bizni ma'zur tutasiz, siz bu sovringa loyiq emasdingiz. Yaqin orada maxsus komissiya uyingizga borib, sizga nohaq ravishda topshirilgan mukofot puli - 953 ming dollarni musodara qilishadi.
Barchasiga sabab - sizlarning tad­qiqotlaringiz, ilmiy kashfiyotlaringiz qalbaki va aldamchi bo'lib chiqdi. Siz hech nimaga erisholmadingiz, kurrai zamin, uning tuzilishi, harakati borasida hech nimani tushunmadingiz. Bu boradagi farazlaringiz, teoremalaringizni germaniyalik oddiy yigitcha - Manuel No­yer inkor qildi.
Hurmatli olimlar, uyalishingiz kerak. Manu fizika bo'yicha oliy ma'lumotga ega emas, tunlarni kitoblar o'qish va formulalar tuzish bilan o'tkazmaydi. Noyer futbol o'yini paytidagi xatti-harakatlari orqali fizikaning barcha qonunlarini inkor etadi. Aynan siz bizga asrlar mobaynida isbotlashga urinayotgan qoidalarning noto'g'ri ekanini namoyish qiladi.
Materiya Manuel kabi tez harakatlana olmaydi. Inson Manuel singari vaziyatga bu qadar tez ta'sir ko'rsata olmaydi. To'p Manuelning qo'liga borganda darhol to'xtaydi, boshqa holatda buni kuzatmaymiz. To'g'rimi, muhtaram olimlar? Endilikda Noyerning intilishlari samarasi o'laroq, dunyoga boshqacha ko'z bilan qarayapmiz.
Fizika qonunlarini bir chetga suring, yashasin Manuel Noyer! Marhamat, janob Noyer, zal markaziga chiqing, biz sizga atayin orqa o'rindiqlardan joy ajratdik. Yuguring, odatiy 52,5 metrni bosib o'ting - navbatdagi mukofot sizniki.
Tibbiyot va fiziologiya bo'yicha: Eva Karneyro
Ha, biz Stokgolmda mukofotni shvetsiyalik adibga topshirdik, xo'sh, keyin-chi? Hay'at a'zolarini adolatsizlikda ayblamaslik kerak. Bizga hech kim pul bermadi - shunchaki, faktlar tahliliga asoslanyapmiz. Misol uchun, ish joyini mojarolar tufayli tark etgan xodimni maqtaymiz. Eva Karneyroning sharofati bilan futbol ishqibozlari tibbiyot borasida etarlicha tasavvurga ega bo'ldilar. «Chelsi»ning 42 yoshli sobiq shifokori ham tibbiyot, ham fiziologiya rivojiga salmoqli hissa qo'shdi.
U kimsan Joze Mourinoga qarshi chiqdi, portugaliyalik mutaxassis uning professionalligiga shubha ostida qaragani Evaga yoqmadi. «Chelsi» ustidan sudga shikoyat qilishdan cho'chimadi, maydonga chiqishi orqali tibbiyotni mashhur qildi. Rahbari qarshi bo'lishiga qaramay, futbolchilarning sog'lig'ini tiklashda davom etaverdi. Bu xatti-harakatlari Nobel mukofotiga loyiq ko'rildi.
Davomi InterFUTBOL gazetasi blogida.
— deya xabar beradi uff.uz nashri.