«Paxtakor» qatorasiga ikki yil chempionlikni qo'lga kiritdi. Joriy mavsumdagi g'oliblikka esa No''mon Hasanov bosh murabbiyligida erishildi. Ammo hammasi oson kechgani yo'q. Mavsum davomida jamoa haqida turli gap-so'zlar tarqaldi. «Metallurg»ga qarshi kechgan o'sha «mashhur» uchrashuvdan so'ng esa kelishilgan o'yinlar haqidagi xabarlar avj oldi. Shu qadar avj oldiki, hatto bu haqda O'FF prezidenti Mirabror Usmonov ham bayonot bilan chiqish qildi. No''mon Hasanov bilan mavsum yakunlari haqida qilgan suhbatimiz shu va boshqa mavzular haqida bo'ldi. Intervyu avvalida esa «Paxtakor» ustozini InterFutbol talqinida noyabr oyining eng yaxshi murabbiylari qatorida zikr etilgani bilan tabrikladik.
- No''mon aka, siz InterFutbol tomonidan noyabr oyining eng yaxshi murabbiylari qatorida tan olindingiz. Sizdan oldinda faqat milliy terma jamoa bosh murabbiyi Samvel Babayan bor. MTJ qo'lga kiritgan yutuqlarni inobatga olsak, bu tabiiy hol. Avvalo, sizni shu e'tirof bilan tabriklasak...
- Rahmat. Bunday e'tirof biz uchun ham katta narsani anglatadi. Sportchi hech qachon o'zini maqtay olmaydi, u qilgan ishlarni boshqalar gapirishi kerak. Gazetangiz mehnatlarimizni tan olgan ekan, balki shunga yarasha biror ish qilgandirmiz. E'tirof uchun yana bir bor katta rahmat.
- Bu yil «Paxtakor» chempionlikni qo'lga kiritdi, siz esa jamoani mavsum o'rtasida qabul qilib oldingiz. Qiyin bo'lmadimi?
- Yo'q, aslo. Jamoani mavsum o'rtasida qabul qilib olganim bilan yil boshidan buyon hamma bilan birga ishlab kelayotgan edik. Mavsumoldi tayyorgarligini ham birga o'taganmiz. Shuning uchun hech qanday qiyinchilik bo'lgani yo'q. Men shunchaki jamoadagi ishni davom ettirdim, xolos.
- O'tgan mavsumdan ko'nglingiz to'lmagan jihatlar bo'ldimi?
- Ha, albatta. Chempionlar Ligasida munosib ishtirok eta olmadik. Biz uchun guruhda qolib ketish juda yomon natija. Iloji boricha yaxshiroq o'ynashga harakat qildik, kuchli raqiblardan safarda ochko oldik, ammo oxirgi turlarda omadimiz kelmay, guruhda qolib ketdik. Bu yil mana shu xatolarni to'g'rilamoqchimiz. Maqsadimiz - O'zbekiston chempionati bilan bir qatorda Chempionlar Ligasida ham yaxshi natijalarga erishish.
- Xatolarni to'g'rilash uchun aynan qanday ishlarni amalga oshirmoqchisiz?
- Jamoa o'yin uslubida o'zgarish qilish niyatimiz bor. O'yinimizga tezlik kiritishimiz kerak. Bu bilan faqat tez yugurishni nazarda tutmayapman, futbolchilarga tez fikrlashni singdirishimiz lozim. Futbol nafaqat yil, balki oy sari rivojlanib bormoqda, yangiliklardan boxabar bo'lib turish shart. Jamoada «devor» uslubida o'ynashni tashkil etish kerak, himoyadan hujumga tez o'tishni shakllantirish lozim. Ilgari besh-olti to'p oshirish bilan hujumga o'tgan bo'lsak, endi uch-to'rt uzatma bilan himoyadan hujumga o'tib ketishni o'rganishimiz shart. Zamonaviy futbol shuni talab qilmoqda. Yaqinda yig'inlarimiz boshlanadi. 20 dekabrda Toshkentda yig'ilamiz, 10 yanvardan esa Dubayda yig'in o'tkazamiz. Mana shu yig'inlar davomida yangi o'yin uslubimizni shakllantirishimiz lozim. Buning uchun kerakli futbolchilarni ham tarkibga jalb etish zarur. Selektsiya ishlarini boshlab yuborganmiz.
- Yangi futbolchilar kerakligi haqida gapirdingiz. Ammo avvalo, «Paxtakor»dan ketadiganlar haqida gapirib o'tsangiz...
 - Shunday ehtimol yo'q emas. Har qanday jamoa ham o'zgarib, yangilanib turadi. Bizning tarkibimizdan ham ketadigan futbolchilar chiqishi mumkin. Ammo imkon qadar ularni jamoada olib qolishga harakat qilamiz. Bugun (suhbat seshanba oqshomida bo'lib o'tdi - tahririyat izohi) klubda yig'ilish bo'lib o'tdi va o'tgan yilgi tarkibni imkon qadar saqlab qolishga qaror qildik. Ba'zi o'yinchilarimizga xorij klublaridan takliflar bor va klub ularni ko'rib chiqmoqda. Biroq aytib qo'yay, kimlar ketishini oldindan ayta olmayman...
- Ammo matbuotda bir qator xabarlar tarqab ulgurgan. Xususan, Igor Sergeev jamoadan ketishi deyarli aniqligi aytilmoqda...
- Yo'q, Igor masalasida ham hali hech narsa aniq emas. Matbuotda esa xabarlar tarqayveradi, har doim shunday bo'lib kelgan. Masalan, Sergeev Yaponiyaga ketishi haqida aytishibdi. Biroq bu xabarda hech qanday asos yo'q. To'g'ri, hujumchimizga bir qator klublardan qiziqish bo'lgan, ammo hozircha biz hech birini qabul qilmadik. Klub bu takliflarni ko'rib chiqishda davom etmoqda. Shaxsan o'zim esa bosh murabbiy sifatida Sergeevni tarkibda saqlab qolishni istayman. Bu hujumchi biz uchun juda qadrli. Albatta, xorijga ketsa katta tajribaga ega bo'ladi va bu holat terma jamoamiz uchun juda foydali. Ammo men o'z klubim manfaatidan kelib chiqib, Sergeevni jamoada olib qolishni istayman. Juda bo'lmaganda ijaraga ketar. Biroq bu masalani klub rahbariyati hal qiladi, men oldindan hech narsa deyishni istamayman. Ko'ramiz, vaziyatga qarab ish tutamiz.
- Igor Sergeevga qaysi klublardan taklif bo'lganini ayta olasizmi?
- Yo'q.
- Bu takliflar orasidan Evropa klublari bor yoki yo'qligini-chi?
- Bu haqda ham hech narsa deya olmayman.
- Unday bo'lsa jamoa sardori Kaxi Maxaradze haqida nima deysiz? Bu futbolchining ham «Paxtakor»dan ketishi haqida  xabarlar paydo bo'lgan edi...
- Kaxi masalasida ish olib borilyapti. U bilan shaxsan o'zim qo'ng'iroqlashib, gaplashib olishni rejalashtirib turibman. Maxaradze biz uchun juda kerakli futbolchi. U jamoamizning ko'p yillik etakchisi va sardori. Bunday o'yinchi tarkibda bo'lishi juda muhim. Bugun bo'lib o'tgan majlisda shu masala ham ko'tarildi va Kaxini qanday qilib bo'lmasin jamoada olib qolishga qaror qildik. Buning uchun u qo'yadigan talablarni qabul qilishga tayyormiz.
- U klub oldiga qanday talablarni qo'ymoqda?
- Tafsilotlarini aniq ayta olmayman, ammo Maxaradze istayotgan shartlarni klub qabul qila oladi. U albatta, kuchli futbolchi va o'zi istagan shartlar asosida shartnoma talab qilishga haqli. Boz ustiga, u klub ko'tara oladigan talablarni qo'ymoqda. Bu talablar - odatiy, har qanday futbolchi so'raydigan narsalar. Shunday ekan, Kaxi bilan yangi shartnoma imzolash borasida hech qanday muammo bo'lmaydi, deb hisoblayman.
- Futbolchining o'zi nimani istamoqda?
- Hammaning ham o'ziga yarasha muammosi bo'ladi. Biz Kaxini to'g'ri tushunamiz, uzoq yillardan buyon uyidan uzoqda o'ynab kelmoqda. Har qanday inson uyiga qaytishni istaydi. Unda hozir bir nechta klublardan takliflar bor, ammo hozircha hech birini qabul qilgani yo'q. «Paxtakor» ham unga juda yaxshi shartnoma taklif qilmoqda. Shu bilan birga, Kaxi uchun ham klubimizning o'rni, qadri boshqacha. Ishonamanki, u bilan tezda kelishuvga erishamiz...
- «Paxtakor» futbolchilari iyul oyidan buyon maosh olmagani haqida xabarlar bor. Balki muammoning ildizi shundadir?
- Maosh masalasi ko'tarilar ekan, bir narsani inobatga olishingizni so'rayman - «Paxtakor» hali hech bir futbolchidan qarz bo'lib qolmagan. To'g'ri, balki maosh kechikishi mumkin, ammo hech kimning puli klubda qolib ketmaydi. Hamma o'z haqini albatta oladi va buni futbolchilar ham, murabbiylar, ham juda yaxshi biladilar. Shu sababli hech kim buni muammo sifatida ko'rmaydi. Pul masalasida hammaning ko'ngli to'q.
- Demak Maxaradzening muammosi ham pulda emas?
- Mutlaqo.
- Yangi futbolchilarni tarkibga jalb qilish haqida gapirdingiz. Aynan qaysi chiziqlarni mustahkamlamoqchisiz?
- Eng avvalo, hujum va himoyani. Umuman, jamoadagi raqobatni kuchaytirish kerak. Zaxira o'rindig'i qancha mustahkam bo'lsa, muammo ham shuncha kam bo'ladi. Yaxshi bilasiz, o'tgan mavsum bizni jarohatlar juda qiynadi. Ba'zi o'yinlarda zaxiradan maydonga tushib, o'yinni kuchaytiradigan futbolchi ham kamyob bo'lib qoldi. Biz mana shu holatni bartaraf etmoqchimiz. Zaxira o'rindig'ida ikki yoki uch emas, balki besh, olti yoki etti nafar kuchli futbolchi o'tirsa, jamoa o'yini ham boshqacha bo'ladi. O'yin davomida vaziyatni o'zgartirish imkoniyati ham ko'payadi. Biz mana shunga erishmoqchimiz.
- «Paxtakor» oliy ligada g'olib chiqqani uchun PFL tomonidan mukofot pulini olishi lozim. Mana shu pul klub hisob-raqamiga o'tkazib berildimi?
- Bu ishlarga aralashmayman. Mazkur masalani hal qilish klub rahbariyati va menejment bo'limi vakolatida. Men faqat sport sohasidagi ishlarga javob beraman. Aytishim mumkin, bu borada hammasi joyida. Oliy ligada g'olib chiqdik. Endi yil oxiridagi taqdirlash marosimida medallarimizni topshirishsa bo'lgani, biz uchun ish oxiriga etkaziladi (kuladi).
- Demak, pul haqida mutlaqo o'ylamayapsiz?
- Yo'q. Bu masalada qayg'uradiganlar bor.
Davomi InterFUTBOL gazetasi blogida.
— deya xabar beradi uff.uz nashri.