EChLda «Zenit»ning muvaffaqiyatli ishtirokiga salmoqli hissa qo'shib kelayotgan hujumchi Rossiyada «yil jentlmeni» unvoniga loyiq topildi. Taqdirlash marosimini olib borgan Otar Kushanashvili bilan Sovsport.ru sayti sharhlovchisi Evgeniy Lovchev Dzyubaga ajoyib smokingni topshirishgach, g'olib qarshisida cho'kkalagan holda yuksak unvon bilan muborakbod etishdi. Yuksak ehtirom yosh futbolchini to'lqinlantirib yubordi.
- Lovchev va Kushanashvili qarshingizda tiz cho'kib, ta'zim bajo aylaganlarida qanday hissiyotlarni boshdan kechirdingiz? Xijolatmi yoki faxr?
- Hangu-mang bo'lib qoldim. Men ham cho'kkalamoqchi edim.
- Evgeniy Serafimovich bunday qilmaganingizdan hayron bo'lganini tabassum bilan ta'kidladi.
- Aslida, shunday qilmoqchi edim. Lekin ularni o'rinlaridan turg'azib qo'yishni afzal bildim. Obro'li shaxslarni shunday holatda qoldirish odobdan emas.
- Sizning nufuzingiz ham chakki emas.
- Ulardek mashhurlik darajasiga ko'tarilishim uchun ancha mehnat qilishim kerak.
- Odatda, «kapalaklar» ko'proq darvozabonlarga yarashadi. Ularga qanday munosabatdasiz?
- Ularni «taqish» darvozabonlardan ko'ra, men uchun yoqimliroq. Avval ham bir necha marta «kapalak» taqishimga to'g'ri kelgan. Ochig'i, bu kabi oliftagarchilikka tobim yo'qroq - tash­qi ko'rinishga o'zgacha ko'rk bag'ishlasada, didimga mos libos emas.
- Smokingda avval ham yurganmisiz?
- Ha. Yaqinda kasbdoshlarim - Igor Smolnikov va Oleg Shatovning turmush o'rtoqlari xayriya oqshomini tashkil etib, meni ham taklif qilishdi. Murabbiylar shtabi, barcha futbolchilar bashang kostyumlarda edilar. Hatto shaxsan Leonid Slutskiy ham tashrif buyurdi. Ulardan ajralib qolmaslik uchun smoking bilan «kapalak» xarid qilishga to'g'ri keldi. Xullas, oliftalikni o'rniga qo'ydim. Endi bashang kostyumim bittaga ko'paydi.
- «Kapalak» - smokingning ko'rki, chandiq - erkakning ko'rki! Ko'zingiz ostidagi chandiq qaerdan keldi? «Gent»ga qarshi o'yindan esdalikmi?
- Yo'q, o'yin arafasidagi mashg'ulot paytida Niko Lomberts bilan to'qnashib ketdim. Aftidan, bu yigit «Gent»da tarbiya olgan ko'rinadi. Balki meni barvaqtroq safdan chiqarmoqchi bo'lgandir? Hazil, albatta. Futbolda bunday hodisalar uchrab turadi.
- Qolaversa, jentlmenlar o'ch olmaydilar!
- Xullas, men uni kechirdim (kuladi).
- Dzyubaning jentlmenligini «Zenit»dagilar qanday qabul qilishdi?
- Tabriklashdi. Bahonada ancha kulishib oldik. «Jentlmen», «mitti jentlmencha» deganlar ham bo'ldi. Qisqasi, hammasi joyida.
- Bolaligingizda ota-onangiz bilan istiqomat qilgan Moskvadagi kommunal xonadonni yodga oldingiz. Shunday qashshoq go'shadan Rossiya futbolining jentlmeni chiqadi deb kim ham o'ylabdi, deysiz?
- Ha, futbol bilan har erda, har qanday sharoitda shug'ullanganman. Ayrimlar oyimga «O'g'lingizni baxtli bolalikdan mahrum etyapsiz», qabilidagi ta'nalarni aytishgan. Biroq vaqt ota-onamning to'g'ri yo'l tutganlarini isbotladi. Otam politsiyada ishlashiga qaramay, ko'proq men bilan shug'ullanardi. Buning uchun turli jazolarga duchor bo'lgan. Lekin mening o'yinlarimda doimo yonimda turdi.
Davomi InterFUTBOL gazetasi blogida.
— deya xabar beradi uff.uz nashri.