Yil yakunlariga bag'ishlab o'tkazilgan yig'ilish davomida, klublarni litsenziyalashtirish masalalari ham ko'rib chiqildi. Xabaringiz borki, oliy liga klublari bir necha yildan beri OFKga bir qator xujjatlar to'plamini taqdim etib kelishmoqda. Yig'ilishda klublarimizni litsenziyalash jarayonidan o'tish jarayoniga kiritilgan o'zgarishlar ham ma'lum qilindi. Shuningdek, 2015 yilgi jarayon xususida ham ma'lumot berilib, klublarga maxsus sertifikatlar topshirildi. Aynan berilgan sertifikatlar jamoalarga 2016 yilgi O'zbekiston chempionatida qatnashish huquqini beradi. PFL rahbariyati oldingi yillarda litsenziyalashtirish jarayonidan o'tgan klublarga maxsus sertifikatlarni shunchaki topshirayotgandi. Bu safar esa sertifikatlarni topshirish jarayoniga o'zgartirish kiritildi. Ya'ni litsenziyalashtirish jarayonida qatnashgan klublarning faolliklari va boshqa jihatlariga qarab, o'rinlarga ajratildi. PFLning litsenziyalashtirish jarayoniga bevosita rahbarlik qilayotgan Aleksey Frolov beshlikdan o'rin olgan klublarni bu borada har tomonlama faol bo'lganliklarini e'tirof etgach, klublarga sertifikatlar topshirildi. 2015 yil yakunlariga ko'ra Buxoroning “Buxoro” klubi litsenziyalashtirish jarayonida qolgan klublarga o'rnak bo'lganligi e'tirof etilib, birinchi o'rinni qo'lga kiritdi. Ikkinchi o'rin “Nasaf”, uchunchi o'rin esa “Lokomotiv” klublariga tegishli bo'ldi. Bu borada “Navbahor ”klubi Toshkentning “Bunyodkor” klubidan keyingi beshinchi pog'onani band etdi. So'nggi o'rinda esa “Andijon” klubi e'tirof etildi. Shu o'rinda yakuniga etgan mavsumni oliy ligada o'tkazib, kuchlilar safini tark etgan “Dinamo” jamoasi ham litsenziyalashtirish jarayonidan o'tganligini e'tirof etish joiz. Oliy liga yo'llanmasini qo'lga kiritgan “Obod” klubidan esa qisqa vaqt ichida litsenziyalashtirish uchun zarur xujjatlarni topshirish talab etiladi. Agarda klub bu jarayondan o'ta olmasa “elita”da qatnashmasligi ham mumkin.
— deya xabar beradi uff.uz nashri.