2015 yilgi futbol mavsumi “Bunyodkor” futbol maktabi uchun muvaffaqiyatli o'tdi.
Xususan, “Bunyodkor” futbol maktabining 1999 yilda tavallud topgan futbolchilardan iborat jamoasi uchun omadli bo'ldi. Toshkent shahar bolalar-o'smirlar o'rtasidagi futbol birinchiligining U-16 yosh toifasida “Bunyodkor-99” birinchi o'rinni egalladi. Farg'ona shahrida o'tkazilgan futbol klublari tayyorlov guruhlarining Respublika turnirida ham g'oliblik qo'lga kiritildi.
Yangi yil bayrami arafasida “Bunyodkor-99” jamoasini taqdirlash marosimi bo'lib o'tdi. Dilmurod Abdullaev ustozligidagi tarbiyalanuvchilarimizni erishilgan muvaffaqiyatlar bilan taqdirlash uchun “Bunyodkor” futbol maktabi direktori Sergey Lushchan va akademiyamiz maslahatchisi Rustam Akramov tashrif buyurdi.
- Ortda qolayotgan mavsum Sizlar uchun omadli o'tdi. Erishilgan yutuqlar butun jamoaniki. Murabbiyingizni alohida e'tirof etib, uning hissasi beqiyos ekanligini aytib o'tmoqchiman. Bir narsani yodda tutinglar, hali oldinda juda ko'p musobaqalar bor. Sizlarni katta futbol kutmoqda. Hech qachon mashg'ulot o'tkazishdan erinmang, o'sishdan to'xtamang. Ana o'shanda, professional futbolda barqaror faoliyat yuritasizlar, - dedi “Bunyodkor” futbol maktabi direktori Sergey Lushchan.
— deya xabar beradi uff.uz nashri.