Yakunlangan mavsumda "Qizilqum" safida barcha o'yinlarda ishtirok etgan Sherali Jo'raevning navoiyliklar bilan tuzgan shartnomasi poyoniga etdi. Hozircha uning jamoada qolish yoki qolmasligi aniq emas. Xo'sh, tezkor yarim himoyachi "Qizilqum"da qoladimi? Jo'raev UFF.uz internet portaliga bergan intervyusi jarayonida bunga oydinlik kiritib o'tdi.
- Mavsumga tayyorgarlikni 15 dekabrdan boshladik. Kuniga ikki mahaldan mashg'ulotlarni davom ettirmoqdamiz. Ko'proq jismoniy holatni tiklash va avvalgi holatimizga kelib olish uchun mashg'ulotlarda ter to'kmoqdamiz. Umuman olganda, hammasi binoyidek ketmoqda.
- Jamoada o'zgarishlar to'g'risida nimalarni ayta olasiz?
- O'zgarishlar yo'q. Doston Abdurahmonov, Navro'z Alimovlar jamoadan ketishdi. Boshqa ketganlar yoki kelganlar yo'q. Menimcha, hammasi yanvardan hal bo'lishi kerak.
- Sizning jamoa bilan shartnomangiz tugadi. "Qizilqum"da qolasizmi?
- Buni endi gaplashib olamiz. Oldimda qator variantlar bor. Lekin hammasini obdon o'ylab ko'rgan holda, keyinchalik qaror qabul qilaman. "Qizilqum"dagi taqdirimga yaqin o'rtada oydinlik kiritib olaman.
 - Yakunlangan mavsumda oliy liganning barcha uchrashuvlarida maydonga tushdingiz. Mavsum siz uchun qanday o'tdi?
- Yomon emas. Lekin egallagan o'rnimizdan qoniqish hosil qilmadim. Biz bundan yuqoriroq o'rinni egallashga haqliroq edik. Biroq ko'rsatgan o'yinlarimizda omad etishmadi. O'zim barcha o'yinlarda ishtirok etgan bo'lsam-da, natijalar yaxshi chiqmaganligi tufayli ko'nglim to'lmadi. Mavsum davomida biror marotaba gol ura olmadim. Sheriklarimni gol kiritishlari uchun qarashib yubordim.

— deya xabar beradi uff.uz nashri.