La liga «kuchli beshlik» chempionatlari orasida o'ziga xos nufuzga ega. Uch-to'rt yil avval eng katta qiziqish asosan bir o'yin -  «klassiko» atrofida jamlangandek tuyulardi. Chempionlik masalasi «Real» va «Barselona» o'rtasida hal qilinadigan musobaqada boshqa jamoalar e'tibordan chetda qolar va ular ishtirokidagi o'yinlar ikkinchi va uchinchi darajali hisoblanardi.
Bu klublar faqat Kataloniya va Madrid grandlariga qarshi kechadigan uchrashuvda omma nigohiga tushishi mumkin edi. Hatto «Atletiko» va «Atletik»ning o'zaro qarama-qarshiligida ham katta auditoriya yig'ish mushkul bo'lib qolgandi. Ammo bir murabbiy - Diego Simeonening Ispaniyaga tashrifi hammasini keskin o'zgartirib yubordi!
SIMEONE SINDROMI
Hozir bu murabbiyni hamma yaxshi taniydi. XXI asr boshlarida porlagan «Valensiya» va «Deportivo» tezda so'ndi. Bir muddat bosh ko'targan «Vilyarreal»ning esa ikki grand - «Real» va «Barselona»ning o'rtasiga tushar darajada iqtidorli emasligi ma'lum bo'ldi. Simeone shunday pallada shonli tarix, ammo o'rtamiyona asliyatga ega «Atletiko»ni qabul qilib oldi. Bu vaqtda Ispaniya chempionatida «Real» va «Barselona»dan boshqa jamoada ish boshlash har qanday murabbiy uchun o'ziga qarshi o'qilgan hukmdan boshqa narsa emas. Chunki nafaqat Ispaniya, balki butun Evropa futboli aynan shu ikki klub atrofida «aylanardi». La ligada «Barselona» va «Levante» o'rtasida kechadigan o'yinni tomosha qilishdan ko'p ma'ni topilmasdi. Chunki bu bahs faqat bir jihati - Lionel Messining nechta gol urishi bilan ahamiyatli. Xuddi shunday holatni «Real» - «Osasuna» uchrashuvida ham ko'rish mumkin edi. Bunday o'yinlar asosan Krishtianu Ronaldu uchun yangi rekord o'rnatish imkonini berardi, xolos. Simeone aynan shunday chempionatda ish boshladi va uni o'zgartira oldi. Hozir Messi va Ronaldu rekord o'rnatishda davom etayotgandir, ammo endi hech kim «Real» va «Barselona»ga qarshi tura oladigan klub borligini inkor eta olmaydi...
Qiziq tomoni, «Atletiko» rivojlanish uchun ko'p pul sarflamadi. Aksincha, yil o'tgani sari madridliklarning biror yulduzni katta pul evaziga sotishi odat tusiga kirdi. Falkao, Diego Kosta, Arda Turon... ularning bari nollari ko'p mablag' tufayli «Atletiko»dan ketdilar. Qolaversa, kelasi mavsum Grizmann va Filipe Luis ham aynan shu sababga ko'ra klubni tark etishlari mumkin. Ammo bu yo'qotishlar shu vaqtga qadar «Atletiko»ning kuchiga daxl qilolmadi. Chunki klubni Diego Simeone boshqarmoqda. Toki u ketmas ekan, «Atletiko» «Barselona» va «Real»ga bosh- og'riq bo'lib qolaveradi.
Eng muhimi, «Atletiko» ikki yil oldin shunday «nahanglar»ni dog'da qoldirib, Ispaniya chempioni bo'lgach, endi «Vilyarreal» ham bemalol «Real»dan ochko olishiga ishongan holda maydonga tushmoqda. «Sevilya» esa «Barselona»ni mag'lub etyapti. Buning uchun shunchaki futbol o'ynash kifoya qilarkan, ular buni bilib oldilar. Diego Simeone Ispaniyada ish boshlashi bilan La-ligada ham yangi davr boshlandi.
O'ZBEK SIMEONESI
Mana endi, gapning yo'nalishini O'zbekiston chempionati tomon bursak. Zero, ispan futboli va Diego Simeone haqida fikr yuritish orqali aslida oliy ligadagi vaziyatga atroflicha baho berishni istagandik, xolos. Chunki bizdagi holat ham uch yil oldingi Ispaniya futbolidan farq qilmaydi. Tabaqalanish jihatidan, albatta.
Davomi InterFUTBOL gazetasi blogida.
— deya xabar beradi uff.uz nashri.