O'z lavozimidan 90 kunlik muddatga chetlatilgan FIFA prezidenti Yozef Blatter Gazetta dello Sport muxbiriga in-tervyu berib,  yana o'zini oqlashga urindi. Korruptsiyada aybla­­nayotgan 79 yoshli funktsioner xususan, Mishel Platiniga 2 mln. Shveytsariya franki ochiq-oydin to'langanini ta'kidlab, hech qanday noqonuniy ish  qilmaganini  bildirdi.
- Qachondir shunday vaziyatga tushib qolishingiz haqida hech o'ylab ko'rganmidingiz?
- Ochig'i, karaxt holga tushib qoldim. Bir og'iz gapirishga ham izn bermay, 90 kunga lavozimimdan chetlatishdi. Meni malakali advokat himoya qiladi. Sud barcha kerakli dalillarni tinglashini istayman. Shveytsariyada hukm chiqarishdan avval ayblanuvchiga o'zini himoya qilish imkonini berishadi. Hech qachon birovning pulini olmaganim va kimdandir qarzdor emasligimni barcha bilishini istayman. Sizni ishontirib aytamanki, Platiniga berilgan pullarning hujjatlari joyida.
- Sizda «Menga xoinlik qilishdi», degan gumon yo'qmi?
- Nazarimda, bir qator federatsiyalar vakillari - Evropa, Janubiy Amerika va Karib havzasidagilar hamon meni qo'llab-quvvatlamoqdalar. Shveytsariya parlamenti vakili esa mendan «FIFAni AQShga sotish niyatingiz yo'qmi?» - deb so'radi.
- AQSh komissiyaga ta'sir o'tkaza oladi, deb o'ylaysizmi?
- Juda qiyin. Lekin shveytsariyaliklar doimo hushyor bo'lishlari kerak. Bilasiz, Shveytsariya fuqarosiman. Ammo o'z yurtimda menga to'g'ri munosabatda bo'lishmayapti.
- Ha, AQSh va Rossiya o'rtasidagi navbatdagi mojaro markazida qolgan ko'rinasiz...
- Bilmadim, men bilan bu ikki mamlakat o'rtasidagi munosabatlar orasida qanday bog'liqlik bor ekan?
- O'zi Platini va unga berilgan 2 mln. frank mojarosi qanday kelib chiqdi?
- 1998 yilning oxirida Platini men bilan ishlash istagini bildirgandi. Shunda o'zaro hamkorlikdan faqat mamnun bo'lishimni bildirdim. Mishel yiliga 1 million atrofida maosh so'radi. Men esa ishning maromiga qarab, uni rozi qilishimni aytdim. Shu tariqa og'zaki kelishuvga erishdik. Keyin kutilmaganda, uni FIFA va UEFA qo'mitasiga saylashdi. Platinining o'zi yodimga solmaguncha unga maosh berish kerakligini unutib ulgurgandim. Lekin barcha ishlarni tegishli mahkamalar roziligi asosida bajarganmiz.
- Franko Karraroning aytishicha, mazkur mablag' hisobot hujjatlarida ko'rsatilmagan ekan...
- U shunchaki, ko'rmay qolgan. Mablag'ning bir qismiga oid uzatma hujjati bor, ikkinchisi yo'q. Lekin har qanday holatda o'sha mablag'ni berishim kerak edi.
- Gap-so'zlarga qaraganda, ikkingiz o'zaro kelishib olgan ekansizlar. Unga ko'ra, avval Platini sizning nomzodingizga ovoz berishi, keyin 2015 yili siz uning nomzodini yoqlashingiz lozim bo'lgan...
- Safsata. Bu masalada hech qanday kelishmaganmiz. O'shanda yagona nomzod edim va Platini yordamiga ehtiyoj sezmasdim. Bilmadim, bu ivg'olarni uning prezidentlikka saylanmasligi uchun o'ylab topishgandir, balki bizga bosim o'tkazmoqchi bo'lishayotgandir. Fakt shuki, hozir bitta qayiqdamiz.
- Mablag' haqidagi ma'lumotni politsiyaga kim etkazdi?
- Xalqaro bank. O'tkazma ochiq-oydin amalga oshirilgan. Bu xususda tergovchilarga ham aytdim. Hammasi risoladagidek rasmiylashtirilgan.
- Endi sizni futboldan butunlay haydamoqchilar.
- Hozircha rasman hech qanday ayblov e'lon qilingani yo'q. Odob-axloq qo'mitasi qachonki, prezident o'z vazifasini ado etmay qolsagina ishga aralashishi mumkin. Lekin prezidentni faqat Kongress saylaydi va lavozimidan bo'shatadi.
Davomi InterFUTBOL gazetasi blogida.
— deya xabar beradi uff.uz nashri.