Professional futbol ligasida yil yakunlariga bag'ishlangan yig'ilish bo'lib o'tdi. Bunday anjuman har yili o'tkaziladi va unda eng avvalo, o'tgan mavsum statistikasi o'qib eshittiriladi. Navbatdagi tadbir ham bundan istisno bo'lmadi, PFL direktori Farhod Magometov o'tgan mavsum bilan bog'liq barcha ma'lumotlarni omma e'tiboriga havola qildi.
MAGOMETOVDAN STATISTIKA
«Assalom alaykum, avvalo hammani kirib kelayotgan Yangi yil bilan tabriklamoqchiman, - deya so'z boshladi PFL rahbari. - Asosiy masalalarga o'tish oldidan oliy liganing 2015 yilgi mavsum yakunlariga qisqacha to'xtalib o'tsak. O'tgan mavsum davomida 16ta jamoa ishtirokida 240ta o'yin bo'lib o'tdi. Eng sermahsul bahslar esa 14-turda kuzatilib, umumiy hisobda 28ta gol urilgan. Eng kam to'p esa 7-turda kiritildi -  12ta. Eng yirik hisob esa  «Lokomotiv» va «So'g'diyona» o'rtasida kechgan uchrashuvda qayd etildi - 7:0.
Oliy ligani tomosha qilgan ishqibozlar soni esa 1 million 305 ming kishiga etdi. Mavsum davomida eng ko'p muxlis «Neftchi» va «Nasaf» o'rtasida kechgan uchrashuvda tashrif buyurgan - 17 143 nafar. Eng kam tomoshabin esa «Bunyodkor» -  «Metallurg» uchrashuvida kuzatildi -  424 nafar.
O'zbekiston chempionatida o'tgan mavsumda 40 nafar legioner ishtirok etdi. O'tgan yili ularning soni 36 nafar edi. Eng ko'p legioner Moldovadan tashrif buyurdi - 8 futbolchi. Ikinchi o'rindagi Rossiyadan esa 7 o'yinchi kelgan.
Mavsum davomida 8ta jamoada bosh murabbiy almashdi. Solishtirish uchun o'tgan yil davomida 4ta jamoada bosh murabbiy almashgan edi. Bu yil «Paxtakor», «Dinamo», «Bunyodkor», «Neftchi», «Andijon», «Lokomotiv» va «Qo'qon-1912»da murabbiylar mavsum oxiriga qadar ishlay olmadilar.
SALBIY VA IJOBIY JIHATLAR
PFL direktori Farhod Magometov nutqi davomida o'tgan mavsumning salbiy va ijobiy jihatlariga ham to'xtaldi.
«Shu bilan birga, O'zbekiston chempionatida bir qator salbiy va ijobiy jihatlar kuzatildi.
Salbiy jihatga eng avvalo, Osiyo Chempionlar Ligasidagi muvaffaqiyatsiz ishtirokni aytib o'tishim lozim. Ikkinchi jihat esa - legionerlar saviyasi juda pastligicha qolib ketmoqda. Uchinchidan,  poytaxtdagi o'yinlarda muxlislar soni juda kam. To'rtinchi salbiy jihat sifatida klublarda malakali mutaxassislar etishmovchiligi borligini ta'kidlamoqchiman.
Ijobiy jihatlar esa - O'zbekiston chempionatida g'oliblik uchun kurash oxirgi turga qadar davom etgani ahamiyatli. Shu bilan birga, an'anaviy tarzda yangi stadionlar foydalanishga topshirilganini aytmoqchiman. Mavsum davomida Jizzax va Farg'onada zamonaviy inshootlar ochildi.  Chempionatning yana bir ijobiy tomoni - o'tkinchi o'yinlar soni kamaydi.
«PAXTAKOR»GA TAHDID
Farhod Magometov klublarning qarzdorligi masalasida fikr bildirarkan, eng avvalo «Paxtakor» klubidan moliyaviy muammoni hal etishni talab qildi. Shu bilan birga, mutasaddi oliy ligada yangi mavsumda «Obod» klubining o'rniga «Dinamo» ishtirok etishi mumkinligini ham tasdiqladi.
«PFL Ijroqo'mi qaroriga ko'ra, «Paxtakor» 29 dekabrga qadar qarzdorlik masalasini hal etmasa, chempionatdan chetlatiladi. Qolgan jamoalar ham inobatga olishsin, agar bizning talablarimiz bajarilmasa, shunday jazo qo'llaniladi. OFK talablari juda qattiq. Aslida, bizga OChLda 4ta o'rin berilishiga Iroq klublarining litsenziyadan o'ta olmagani sabab bo'lgan edi. Shunday ekan, OFK talablariga hamma klublar muvofiq bo'lishi lozim.
«Obod»ning o'rniga «Dinamo» kelishi mumkin? Biz faqat reglamentga mos tarzda ishlaymiz. «Obod» masalasida esa shuni aytishim mumkin, 10 yanvarga qadar klub litsenziyadan o'ta olmasa, demak oliy ligadan chetlatatiladi. O'rniga kim qatnashadi? «Dinamo»ni tortamiz. Sport printsiplarimi? Sport printsiplari o'z yo'liga, biz u bilan birga OFK va FIFA talablariga ham mos kelishimiz kerak», - dedi Farhod Magometov.
Davomi InterFUTBOL gazetasi blogida.
— deya xabar beradi uff.uz nashri.