Jahonda chapaqaylar kamchilikni tashkil etishadi, ammo futbolda ulkan yutuqlarni qo'lga kiritib kelishayotgani anchagina. Soccer.ru RFPLning eng yaxshi chap qanot himoyachisini aniqlash maqsadida o'ziga xos so'rov tashkil etdi. E'tiborlisi, ushbu ro'yxatdan O'zbekiston milliy terma jamoasi etakchilaridan biri Vitaliy Denisov ham o'rin egalladi. Demak, uning o'z pozitsiyasida tengsiz futbolchilardan biri ekanini nafaqat biz, balki ruslar ham tez-tez e'tirof etishlari odatiy holga aylandi.
Vitaliy DENISOV
(«Lokomotiv»)
18ta bahsda 1564 daqiqa o'ynab, 1ta golli «pas»ni amalga oshirgan.
Uzatmalari soni (aniqligi): 847ta (79,6%)
To'pni olib qo'yish: 70ta
Keskin uzatmalari soni: 17ta
Maydonda keng ko'lamli ishni bajarish bo'yicha liganing birinchi raqamli qanot himoyachisi. Uning hisobidagi to'p uzatmalari soni o'ng qanot himoyachisi Fernandesnikidan ko'proq. Aniqlik ko'rsatkichi pastroq, ammo to'pni olib qo'yishda ajoyib natijaga erishdi - 70 marta. Bardoshlilik borasida ham Denisovga teng keladiganini topish qiyin - «temiryo'lchilar»ning chap qanot himoyachisi o'zi qatnashgan barcha - 18ta o'yinda bor kuchini safarbar etdi. Uning muntazam ravishda hujumga qo'shilishi, to'pni sheriklaridan qizg'anmasligi, jismoniy jihatdan baquvvatliligini inobatga olib, tegishli xulosa chiqarish mumkin. «Lokomotiv»dagilarning ko'pchiligi o'z ishiga to'g'ri yondoshadiganlar sirasiga kirishadi. Vitaliy esa shunday tajribaga ega jamoada eng yaxshilardan biridir.
Grigoriy MOROZOV
(«Dinamo»)
15ta bahsda 1306 daqiqa o'ynab, 2ta gol urgan.
Uzatmalari soni (aniqligi): 705ta (74,2%)
To'pni olib qo'yish: 46ta
Keskin uzatmalari soni: 14ta
Eng yaxshi yosh o'yinchi sifatida Miranchuk tanlandi, ammo barcha jihatlarni uyg'unlashtirilsa, Morozov rossiyalik yoshlar orasida haqiqiy kashfiyotga aylandi. Grigoriy kutilmaganda paydo bo'ldi. Dastlab uning g'ayrati so'nggi pallada tugab qoladigandek tuyulgandi, ammo yakunda jamoa barcha ishni qoyillatadigan himoyachini qo'lga kiritdi. U yon chiziqda ajoyib o'ynaydi, ham himoya, ham hujumda faollik ko'rsatadi, ba'zan oldingi hududda orqadagiga nisbatan kuchliroq ko'rinadi. Zarur pallada markaziy himoyadagi bo'shliqlarni yopishi mumkin. Lekin, baribir, uning joyi aynan qanotda ekani oydinlashdi. Uning gollari Rossiya futbol xaritasida yangi nomning qayd etilishiga zamin yaratdi. Morozov chindan ham iqtidorli, ammo barcha jihatlar bo'yicha maqtov va yuqori baholarga loyiq ko'rilishga biroz yoshlik qiladi.
Dmitriy KOMBAROV («Spartak»)
17ta bahsda 1530 daqiqa o'ynab, 2ta gol urgan, 3ta golli «pas»ni amalga oshirgan
Uzatmalari soni (aniqligi): 717ta (77,5%)
To'pni olib qo'yish: 48ta
Keskin uzatmalari soni: 29ta
Garchi Kombarov ayrim bahslarda o'z imkoniyati darajasida o'ynay olmasa ham, «Spartak»ning eng yaxshi o'yinchilaridan biri sifatida e'tirof etilaveradi. Deyarli zaxiraga olinmaydi, gollar uradi, samarali to'p uzatmalarini amalga oshiradi. Sheriklarini qulay vaziyatga chiqarish borasidagi ko'rsatkichlari aksariyat pleymeykerlarnikidan ijobiyroq. O'z navbatida, jismoniy tayyorgarligi maromida, to'pni olib qo'yishda faol. Jamoalar «Spartak»ni asosan himoyadan hujumga o'tish chog'ida ranjitishganini inobatga olsak, Kombarovning bu paytda raqib himoyachisi ortida turgani oydinlashadi. Himoyachini qiyin ahvolga soladigan yagona holat - uzoq masofaga to'p uzatish chog'idagi xatoliklar. Dmitriyni avvallari kross borasida hech qanday muammo qiynamasdi, endi esa shunday uchta holatning ikkitasi ko'kka sovurilmoqda. Ushbu nuqsonlar to'p uzatmalarining noaniqlik kasb etishiga sabab bo'lmoqda. Demak, mazkur masalada astoydil ishlashi lozim, zero oldinda Evro-2016 hamda Rossiya termasi manfaatlari turibdi.
Davomi InterFUTBOL gazetasi blogida.
— deya xabar beradi uff.uz nashri.