Yil so'ngida har bir sohada ortda qolgan mavsumni sarhisob qilish, yutuq va kamchiliklar tahlili, yangi yil rejalarini tuzish kuzatiladi. Millionlar o'yini ham bundan mustasno emas. Quyida 2015 yili ayollar futbol jamoamiz ko'rsatgan natijalarga nazar tashlaymiz. Bu borada bizga qariyb 30 yildan beri ayollar va sohil futboli rivojiga hissa qo'shib kelayotgan taniqli va tajribali mutaxassis Alisher Fayziev yaqindan yordam beradilar.
- Alisher aka, yakuniga etib borayotgan 2015 yilgi mavsum ayollar terma jamoalarimiz uchun qanday keldi?
- Bugungi kunda 4ta yosh toifasidagi terma jamoalarimiz bor. Ular uchun 2015 yil ham omadli, ham omadsiz o'tdi, deyish mumkin. Olimpiyachilarimiz mart oyida Iordaniyaning Amman shahrida o'tkazilgan Olimpiada-2016 saralash bahslarida ishtirok etishdi. Vakillarimiz 2-10 mart kunlari bo'lib o'tgan birinchi saralash bosqichida mag'lubiyatga uchrab, ikkinchi raundga chiqa olishmadi. Yoshlar termamiz (U-19) 19-30 avgust kunlari Xitoy mezbonlik qilgan Osiyo chempionatining final bosqichida qatnashdilar.
Qizlarimiz Yaponiyaga 0:6, Xitoyga 0:4, Avstraliyaga esa 0:2 hisobida imkoniyatni boy berishdi. Yakunda guruhdoshlarimiz - Yaponiya va Xitoy finalga qadar etib borishdi va kelasi yilgi 20 yoshlilar o'rtasidagi jahon chempionati yo'llanmasini qo'lga kiritishdi. 16 yoshli qizlardan iborat termamiz ham aynan Chin o'lkasida tashkil etilgan Osiyo chempionatining final bosqichida o'zini sinab ko'rdi. 4-15 noyabr kunlari o'tkazilgan turnir biz uchun nisbatan omadli keldi. Aslida, bu yoshdagi vakillarimiz ilk bor 2013 yilgi qita chempionatida ishtirok etishgandi. O'shanda Janubiy Koreya bilan durang o'ynab, Tailandga imkoniyatni boy bergandik. Bu yil 8ta jamoa ishtirok etgan final bosqichida ancha kuchli guruhga tushdik. Koreya va Yaponiya termalariga bir xil - 0:4 hisobida yutqazdik. Guruhning so'nggi o'yinida esa Xitoy Taypeyini 3:0 hisobida engdik. Bu - Osiyo chempionatlaridagi birinchi g'alabamiz. Nafaqat o'smirlar, balki milliy va yoshlar termalarimizga ham shu paytgacha final bosqichida zafar quchish nasib qilmagandi.
Bahrom Norsafarov bosh murabbiyligidagi o'smirlarimiz bu noxush an'anaga chek qo'yishdi. Osiyo chempionatida ushbu mutaxassisga Vyacheslav Soloxo yordam berdi. Jamoa asosi Qarshining «Sevinch» hamda Muborakning «Mash'al» jamoasi qizlaridan tashkil topgan. Menimcha, musobaqaga jiddiy tayorgarlik ko'rilgani natijamizning ijobiy ko'rinish olishiga sabab bo'ldi. Osiyodan yana guruhdoshimiz Yaponiya hamda Xitoy termasi qizlari jahon chempionati yo'llanmasini qo'lga kiritishdi. Iordaniya esa jahon chempionatida turnir mezboni sifatida ishtirok etadi. Shuningdek, joriy yil ilk marotaba futzal bo'yicha ayollar o'rtasida Osiyo chempionati o'tkazildi. 17-26 sentyabr kunlari Malayziyaning Kuala-Lumpur shahrida tashkillashtirilgan qit'a chempionatida Avaz Maqsumov murabbiyligidagi futzalchi qizlarimiz ishtirok etib qaytishdi. Bu jamoamiz o'z guruhida Malayziyaga 4:9, Eronga 1:9 hisobida imkoniyatni boy berib, Gongkong bilan 3:3 hisobida durang o'ynadi.
- Ayol futbolchilar bilan ishlash oson emas. Ularga qattiqroq gapirishga botina olmaysiz. Shu ma'noda, terma jamoalarimizda faoliyat yuritayotgan murabbiylar haqida nima deya olasiz?
- 20 yildan oshiqroq vaqt mobaynida ayollar futbolida ishlab kelyapman. «Sevinch» bilan ulkan yutuqlarni qo'lga kiritgan taniqli murabbiy Vladislav Xan qarshiliklar ustozi sifatida 11 marta O'zbekiston chempionligini nishonlaganiga qaramay, bir fikrni tez-tez takrorlagandi: ayollar futbolida ishlash juda mushkul. Tajribali mutaxassis shunday deyaptimi, demak boshqalar haqida gapirmasa ham bo'laverdi.
- Ta'kidlaganingizdek, «Sevinch» mamlakatimiz ayollar futbolida etakchi va bu maqomni hech kimga bermay kelyapti. Xo'sh, qarshiliklarga raqobat ko'rsata oladigan jamoa qachon shakllantiriladi?
- O'zbekistonda ayollar futboli tashkil etilganidan buyon roppa-rosa 20 yil o'tdi. 1995 yili ilk jamoalar paydo bo'lgan, o'sha kezlari Andijonning «Andijanka», Namanganning «Gulbahor», Toshkentning «Bahor» klublari etakchi maqomida edilar. 2000 yillarga kelib «Sevinch» jamoasi tashkil etildi. Umuman olganda, Qashqadaryoda ham ayollar, ham erkaklar futboliga katta e'tibor qaratiladi. Viloyat rahbarlari millionlar o'yinini juda sevishadi. Tabiiyki, bunday e'tibor natijasida mazkur sohada ancha o'sish kuzatildi. Bir necha yildan beri «Nasaf», «Mash'al», «Sho'rtan» jamoalari oliy ligada voha sharafini himoya qilib kelishyapti. Ayniqsa, «ajdarlar» bu yil o'z tarixlarida ilk marotaba O'zbekiston kubogini qo'lga kiritishdi. 2011 yili esa o'zbek klublari orasida birinchi bo'lib OFK kubogiga sazovor bo'lishgandi. Bularning bari futbolga qaratilayotgan e'tibor samarasi. Ham erkaklar, ham ayollar futboliga o'sha davrlardan e'tibor qaratila boshlandi.
Bugungi kunda «Sevinch» futbolchi qizlari barcha yosh toifasidagi terma jamoalarimizning asosini tashkil etishadi. Qarshida ajoyib baza bor. Futbol bilan shug'ullanish uchun barcha sharoitlar muhayyo. Termalarimiz o'z yig'inlarini asosan shu maskanda o'tkazib kelishyapti. U erda tashkiliy masalalarda ortiqcha savolga o'rin yo'q. Boshqa viloyatlarimizda ham vaziyat shunday tus olganida, ayollar futbolida katta yutuqlarga erishardik. Lekin afsuski, hamma joyda ham e'tibor birdek emas. Shunga qaramay, milliy chempionatimizda o'sish ko'zga tashlanyapti, raqobat yildan-yilga kuchaymoqda. Birgina joriy mavsumni oladigan bo'lsak, Bekobodning «Metallurg» jamoasi peshqadamga jiddiy qarshilik ko'rsatdi. Hatto bekobodliklar 15 noyabr kuni o'tkazilgan O'zbekiston kubogining final uchrashuvida      «Sevinch»ni 4:3 hisobida engib, bosh mukofotni qo'lga kiritishdi. Shu tariqa etakchi klubga nafaqat munosib qarshilik ko'rsatish, balki ularni mag'lub etish mumkinligini ham amalda isbotlashdi. Bu ularning «Sevinch» ustidan qozongan ikkinchi g'alabalari. O'tgan yili ham ushbu juftlik o'rtasidagi bahsda «Metallurg»ning qo'li baland kelgandi.
- Ayol murabbiylarni tayyorlash bo'yicha qanday ishlar olib boril-yapti?
- Bu borada ham aytishga arzigulik natijalarga erishildi. Mana, shu kunlarda FIFA instruktori Monika Shtab yurtimizda mehmon bo'lib turibdi. Germaniyalik taniqli mutaxassis Qarshi shahrida murabbiylarga seminar o'tkazdi. Barcha viloyatlardan saralab olingan 30 nafar ayollar ushbu seminarda ishtirok etib, malakalarini oshirishdi. Shtab xonim shu yil Kanadada o'tkazilgan jahon chempionatida ham qatnashib keldi. Tabiiyki, o'sha nufuzli musobaqalardagi yangiliklar, murabbiylikdagi zamonaviy fikrlash va ishlash uslublari bo'yicha bizning murabbiylarga saboq berdi. Yanvar oyida xuddi shunday seminarni Andijonda o'tkazamiz. Unga qo'shni Namangan, Farg'ona viloyatlari, shuningdek, Qoraqalpog'iston Respublikasi, Xorazm, Surxondaryo va Samarqand viloyatlaridan murabbiylar taklif etiladi. Fevralda esa poytaxtimizda Toshkent shahri va viloyatidagi murabbiylar uchun seminar tashkil qilish rejalashtirilgan. Bundan tashqari, Monika Shtab 16 yoshgacha bo'lgan o'smirlar terma jamoamiz bilan alohida seminar hamda mashg'ulot o'tkazadi.
Davomi InterFUTBOL gazetasi blogida.
— deya xabar beradi uff.uz nashri.