Braziliyada hattoki, terma jamoa tarkibining e'lon qilinishi ham shou darajasiga ko'tarilmoqda. Muxlislar bu jarayonga ba'zi o'yinlarga nisbatan ham ko'proq qiziqishadi. Buning o'ziga xos sabablari bor, albatta. Umuman, Braziliya termasining xoh o'rtoqlik o'yini, xoh yirik turnirga chaqirilgan tarkibi e'lon qilinishi anchadan buyon ilhaqlik bilan kutiladi.
Bunda ushbu voqelik mohirona yoritilishi va reklama qilinishi katta rol o'ynaydi. Tarkibni to'g'ridan-to'g'ri efirda e'lon qilish g'oyasi Braziliya futbol konfederatsiyasiga tegishli. Translyatsiyani aynan shu tashkilot uyushtiradi va tadbirga barcha jurnalistlarni taklif etadi. To'g'ri, g'oya original emas. Ammo mahalliy telekanallar bunday translyatsiyalarga katta auditoriya yig'ish hadisini o'zlashtirib ulgurgan. Aytaylik, taniqli ekspertlar va sharhlovchilar studiyaning o'zida tarkib e'lon qilinishidan oldin ham, keyin ham terma jamoa bosh murabbiyining har bir qadamini qizg'in muhokama etishadi.
1-qism. Muhokama
Mamlakat teledunyosidagi barcha sport ko'rsatuvlari (ESPN, Sportv, Band va boshqa kanallarda) boshlovchilari kunning asosiy voqeasiga chamasi 1-1,5 soat qolganida o'zaro muhokamani boshlashadi. Misol uchun, qaysi futbolchilar chaqirilishi va kimlar chetda qolishini taxmin qilishadi, so'nggi gap-so'zlar haqida fikr yuritishadi. Shuningdek, oxirgi ikki oyda kimlar yaxshi o'ynashganiga e'tibor qaratishadi. Bu vaqtda muxlislar interaktiv so'rovlarda ishtirok etib, o'z variantlarini bayon qilishadi. Ya'ni har kim muayyan tarkib tuzib chiqadi.
2-qism. Matbuot anjumani
Mamlakat milliy jamoasi bosh murabbiyi bilan har qanday uchrashuv chog'i zal to'lib-toshib ketadi. Ya'ni xohlovchi jurnalistlarga joy etmay qolishi hech gap emas. Ayniqsa, yirik turnirlar arafasidagi uchrashuvda misli ko'rilmagan auditoriya yig'iladi. Misol uchun, Amerika kubogiga boruvchi tarkib e'lon qilinishi munosabati bilan tashkil etilgan anjumanni yoritish uchun hattoki, Xitoydan ham jurnalistlar tashrif buyurishdi. Matbuot vakillari vaqti-vaqti bilan savollar soni va ularning o'tkirligi bo'yicha  sira muloyimlik qilishmaydi. Jarayonning o'zi reja bo'yicha boshlanadi. Avvaliga Dunga minbarga chiqib, taklif etilgan futbolchilar familiyasini birma-bir o'qib eshittiradi. Har bir familiya yangragan payt zaldagi ulkan ekranda futbolchining surati paydo bo'ladi.
Tabiiyki, bu jarayon televizion translyatsiyalar nigohidan ham chetda qolmaydi. Keyin jurnalistlar savollar bilan murojaat etishadi. Yuqorida aytildi, bunda ular ba'zan ro'yxotirlikni umuman yig'ishtirib qo'yishadi. Deylik, Dunga ishtirokidagi oxirgi matbuot anjumanida uni tang ahvolga solib qo'yishdi: «Yaqinda internetda qandaydir ruhoniy bilan birga tushgan suratingizga ko'zimiz tushdi. Bu nimani anglatadi? Nahotki, u jamoa bilan doimo birga yursa?» Murabbiy esa qizishgani yo'q yoki «Futbolga daxli yo'q savollar bilan jonimga tegdinglar» qabilida javob bermadi. Aksincha, barchasini yotig'i bilan tushuntirdi.
Ma'lum bo'lishicha, o'sha ruhoniy Dungadan birga suratga tushishni iltimos qilgan va keyin uni ijtimoiy tarmoqqa joylashtirgan ekan. Qo'shimchasiga, surat ostiga jamoaga juda yaqinligini yozib qo'ygan. Buning natijasida tarmoqda minglab do'stlar orttirgandir, ehtimol. Aslini olganda, pastor Gilerme Batista chindan ham, milliy jamoaning ba'zi futbolchilari bilan tanish, chog'i. Harqalay, u tarmoqqa bir qator futbolchilarning ibodat qilishayotgani videoyozuvini ham kiritgan.
3-qism. Yana muhokama
Odatga ko'ra, aynan shunday muhokamalarda futbol yulduzlari ham tez-tez ishtirok etishadi. Asosan sobiq futbolchilar chiqish qilishadi, yana mamlakatdagi mashhur sharhlovchi va jurnalistlar faollik ko'rsatishadi. Ular tarkibga kiritilgan har bir futbolchining kuchli va zaif tomonlarini tahlil qilishadi, yana kimlarni jalb etish mumkin bo'lganini tilga olishadi. Tabiiyki, tarkibga kiritilgan ba'zi o'yinchilarga salbiy baho berib, ulardan naf yo'qligini ro'y-rost ta'kidlashadi. Shuning barobarida futbolchilarning maydondagi joylashuvlari variantlarini, taktik sxemalarni chizib ko'rsatishadi.
Aytaylik, oxirgi marta Xalkning taklif etilganiga ko'p e'tibor qaratishdi. Murabbiy Neymarning yo'qligi sabab, «Zenit» vakilini markaziy hujum pozitsiyasiga mo'ljallagandi. «U klubida shu pozitsiyada to'p suradi. Ya'ni jarima maydoniga yaqin hududda harakatlanadi. Biz Xalkning jismoniy quvvatidan to'laqonli foydalanmoqchimiz. Umid qilamanki, u o'z imkoniyatini qo'ldan chiqarmaydi»,-degandi Dunga matbuot anjumanida. Shunga qaramay, jurnalistlar va ekspertlar bu tanlovni etarlicha muhokama qilishdi.
Manba: "InterFUTBOL" gazetasi
— deya xabar beradi uff.uz nashri.