Seshanba kuni O'FF anjumanlar zalida 25-milliy chempionatimiz oliy ligasiga qur'a tashlash marosimi bo'lib o'tdi. Unda kelasi mavsumda ham elitada 16ta jamoaning ikki davrali tizimda ishtirok etishi ma'lum qilindi.
Shuningdek, chempionatning dastlabki turida o'zaro o'ynaydigan jamoalar ikkinchi davra o'yinlarini ham o'zaro o'yin bilan boshlashlari tasdiqlandi. Bundan tashqari, bir mintaqa jamoalari o'z uy o'yinlarini bir turda o'tkazmasligi uchun jamoalar juftliklarga ajratildi. Unga ko'ra, «Paxtakor»-«Lokomotiv», «Bunyodkor»-«Obod», «Nasaf»-«Mash'al», «Olmaliq»-«Metallurg», «Navbahor»-«Andijon», «Neftchi»-«Qo'-qon-1912» juftliklari yuzaga keldi. Biz qur'a tashlash marosimidan so'ng «Neftchi» jamoasi bosh murabbiyi Andrey Fyodorovdan intervyu oldik. Oldinga o'tib shuni aytish kerakki, Fyodorov aynan qur'a tashlash marosimi kuni Moskvadan UEFAning PRO guvohnomasi uchun tashkil etilgan kurslarni tamomlab, Toshkentga qaytib kelgandi.
- Qur'a odatdagidek o'tdi, - deya so'z boshladi A.Fyodorov. - Mavsumning ilk o'yinini safarda, ikkinchi turni o'z maydonimizda o'tkazamiz. Raqiblarni bilib oldik. Har yili qur'a paytida aytiladigan gaplar. Hech qanday yangilik eshitmadim. Muhimi, qur'a bahona anchadan beri ko'rishmayotgan do'stlarimiz bilan uchrashdik, dildan suhbatlashdik, fikr almashdik.
- Qur'a natijasiga ko'ra, ilk turdayoq jiddiy raqib - «Bunyodkor»ga qarshi maydonga tushasizlar...
- Har bir jamoa bilan mavsum davomida ikki marotabadan to'qnash kelamiz. Ertami-kech, baribir, shu klub bilan o'ynashimiz kerak. Balki, mavsumning ilk uchrashuvini kuchli jamoaga qarshi mehmonda o'tkazish ham bir tomondan foydalidir. Hammasi mavsumga qanday tayyorgarlik ko'rishimizga bog'liq.
- Andrey Vitalevich, o'tgan mavsum jamoaning ishtirokidan o'zingiz uchun qanday xulosalarni chiqardingiz?
- Shaxsan menga professional klubning bosh murabbiyi sifatida ishlagan ilk mavsumim omadli keldi, deb ayta olaman. Jurnalistlar tomonidan oy murabbiyi, deb topildim. Hali ishlashda davom etishim, izlanishim kerak. Bir joyda to'xtab qolish yo'q. Siz murabbiylik qilayotgan jamoaning natijasi, muvaffaqiyati qanday ishlayotganingizni ko'rsatib beradi.
- «Neftchi»ning tayyorgarlik rejasi tasdiqlandimi?
- Men bugun Moskvadan uchib keldim. Hali Farg'onaga ham bormadim. Ertaga klub rahbarlari bilan uchrashib, yangi mavsum rejalarini tasdiqlab olamiz. Rejamizda xorijda o'quv-mashg'ulot yig'ini o'tkazish bor. Lekin uning amalga oshishi faqat bizga bog'liq emas. Aslida, Turkiyada yig'in o'tkazishni maqsad qilgandik. Bu masalani hali ko'rib chiqamiz.
- «Neftchi» an'anaviy tarzda o'tkazib kelinayotgan Farg'ona viloyati hokimi kubogida ishtirok etadimi?
- Albatta, qatnashamiz. Shu paytgacha asosan, ushbu turnirda asosiy tarkib ishtirok etib kelgan. Bu yil ham shunday bo'ladi. Ko'rik uchun taklif etilgan yangi futbolchilarni ham sinab olish uchun bu muhim musobaqa hisoblanadi.
- Jamoani kimlar rasman tark etdi? Qaysi futbolchilar ko'rik uchun taklif etilgan?
- Bu savol hali ochiqligicha qolmoqda. Aytib o'tganimdek, bugun Moskvadan uchib keldim. Farg'onaga borgach, klub rahbarlari bilan uchrashamiz va yangi mavsum rejalarini tuzib olamiz. Shunga qarab, qaysi futbolchilarni jamoada olib qolish, kimlarni taklif etish masalasiga oydinlik kiritamiz. Tez orada barcha tashkiliy masalalar ko'rib chiqiladi.
Davomi InterFUTBOL gazetasi blogida.
— deya xabar beradi uff.uz nashri.