Samvel Babayan boshchiligidagi O'zbekiston olimpiya terma jamoasi Birlashgan Arab Amirliklarining Dubay shahrida o'tkazgan yig'inini yakunlab, Toshkentga qaytdi.
19 — 28 dekabr kunlari o'tkazilgan o'quv-mashg'ulotlar davomida jamoa 3ta o'rtoqlik-nazorat uchrashuvlarini o'tkazdi.
Yig'in davomidagi ilk o'rtoqlik uchrashuvi KXDR olimpiya terma jamoasiga qarshi bo'lib o'tdi. 20 dekabr kuni o'tkazilgan o'yinda O'zbekiston olimpiya terma jamoasi raqib darvozasini to'rt bora ishg'ol qildi va yakuniy hisob 4:2 ko'rinish olishini ta'minladi. Igor Sergeev ushbu o'yinda dubl qayd etgan bo'lsa, Husniddin G'ofurov hamda Ikrom Aliboev ham o'z hisoblariga bittadan gol yozib qo'yishdi.
Ikkinchi nazorat uchrashuvi esa Suriya olimpiya terma jamoasiga qarshi, 23 dekabr kuni bo'lib o'tdi va unda O'zbekiston olimpiyachilari kichik — 0:1 hisobida raqibga mag'lub bo'ldi.
O'zbekiston olimpiya terma jamoasi yig'indagi so'nggi nazorat uchrashuvida Doxa shahrida Qatar olimpiya terma jamoasiga qarshi maydonga tushdi va 2:0 hisobida g'alaba qozondi.
Samvel Babayan bosh murabbiyligidagi terma jamoa Qatarga qarshi uchrashuvda ancha yaxshi harakat qildi yakunda 2:0 hisobida g'alaba qozondi. O'zbekiston olimpiya terma jamoasi safidagi gollarga ikkinchi bo'limda Akrom Komilov hamda Doston Tursunov mualliflik qilishdi.
Eslatib o'tamiz, O'zbekiston olimpiya terma jamoasi 12 – 30 yanvar kunlari Qatarda bo'lib o'tadigan Osiyo chempionatiga tayyorgarlik ko'rmoqda. Turnirning guruh bosqichida O'zbekistonga Iroq, Janubiy Koreya hamda Yaman olimpiya terma jamoalari raqib bo'ladi.
Turnirni o'zbekistonliklar 13 yanvar kuni Janubiy Koreyaga qarshi o'yin bilan boshlaydi. Kuni-kecha ushbu jamoa bosh murabbiyi Shin Tay Yong qit'a birinchiligiga boradigan tarkibni ma'lum qildi.
— deya xabar beradi uff.uz nashri.