Joriy yilning bahorida gazetamiz orqali Osiyoda to'p surayotgan futbolchilar va ularning top-5 chempionatlarda ko'rsatayotgan karomatlari haqida ma'lumot bergandik. Oktyabr oyi so'nggida «Maynts» hujumchisi Yosinori Mutoning «xet-trik»ka erishgani, Shinji Okazakining APL peshqadami «Lester Siti» safida so'nggi o'yinda gol urganligi bizdan ushbu mavzuni davom ettirishga undadi. Bu safar chempionatlar geografiyasini yanada kengaytiramiz.
Muqaddima
Butun yoz-kuz Evropa OAVsi orqali Osiyoning notinch mamlakatlaridan Evropaga qochoqlar oqimi yopirilib kelayotgani to'g'risida xabarlar tinmadi. Bir narsani ishonch bilan aytish mumkinki, Evropa futboliga osiyolik boyvachchalar pul tikayotganda ko'hna qit'a futbolining qochoqlar bilan to'lishi haqidagi xavotir o'rinsiz. To'g'ri, Ashkan Dejaga, Raja Nainggolan singari asli osiyolik bo'lgan yulduzlar Evropada tarbiya ko'rishgan. Lekin bundaylar soni oz. Balki kelajakda vaziyat o'zgarar. Lekin ayni paytda qit'amizda o'z texnikasini takomillashtirib, Evropa futboliga kirib borayotganlar ko'p. Xohlardikki, yurtdoshlarimiz orasidan ham kuchli beshlik chempionatlarida o'ynaydiganlar paydo bo'lsa.
Yagona jadval
Angliya premer-ligasiga qadam qo'yish osiyolik futbolchilar uchun ilgari ham oson bo'lmagan, hozir ham shunday. Agarda Avstraliya OFKga qo'shilmaganida bu erdagi osiyoliklar soni 10 nafarga ham etmasdi.
Germaniyada bugungi kunga kelib Avstraliya, Janubiy Koreya va Yaponiyadan kelgan futbolchilar to'p surishmoqda, xolos. Bunga sabab marketingdir. Tez orada ushbu mamlakatlar safiga Xitoy va Eron qo'shilsa, ajablanmasdik. Bundesliga shuhratini yoyish maqsadi bu davlatlardan ko'plab futbolchilarning taklif etilishiga sabab bo'lmoqda.
Mazkur jadvalda 2015/2016-mavsumi uchun Evropadagi 7ta chempionat ishtirokchilari tomonidan ro'yxatga kiritilgan osiyolik futbolchilarga oid ma'lumotlar keltirilgan.
E'tirof
Quyida kuchli beshta chempionatda o'z mahoratlarini namoyish etib kelayotgan va Osiyo matbuotining e'tirofiga sazovor bo'layotgan osiyoliklarga alohida to'xtalib o'tamiz.
5. Ali Adnan Kozim
Joriy mavsumda: 13ta o'yin
Terma jamoasi: Iroq
Ilk professional klubi: «Bag'dod FK»
Terma jamoadagi debyuti: 2012 yil 3 dekabr, Iroq - Bahrayn.
Ampluasi himoyachi bo'lgan Ali Adnan Kozim Nosir Al-Tamimi 2013 yilda «Osiyoning eng yaxshi yosh futbolchisi» nominatsiyasida g'olib bo'lgan. Muxlislar tomonidan «Osiyo Garet Beyli» sifatida e'tirof etiladi. Iroq terma jamoasi safida 38ta o'yin o'tkazgan, Xitoy va Xitoy Taypeyi termalari darvozasiga gollar urgan. World Soccer jurnali tomonidan 20 yoshlilar o'rtasida jahon chempionatidan keyin porlashi mumkmn bo'lgan 10 nafar yulduz ro'yxatiga, Daily Mail tomonidan esa 2014 yilda Evropaning 20 nafar bo'lg'usi yulduzlari qatoriga kiritilgan. 2015 yil 1 iyulda «Udineze» klubi bilan 5 yillik shartnoma imzolagach, «A» seriyada to'p surishga muvaffaq bo'lgan birinchi iroqlik futbolchiga aylandi. Italiya chempionatidagi debyuti «Yuven- tus»ga qarshi o'yin (23 avgust, 1:0)ga to'g'ri keldi. Chap qanot himoyasida nafaqat Italiya, balki butun Evropaning eng umidli himoyachilaridan biri. «Udineze» safida Edenilson, Danilo va Ivan Piris bilan birgalikda himoya chizig'ini tashkil etishyapti. Ular 16ta o'yinning 4tasida gol o'tkazib yuborishmadi.
4. Sok Xyon Jun
Joriy mavsumda: 13ta o'yin 8ta gol
Oldingi klublari: «Ayaks» (Gollandiya), «Groningen» (Gollandiya), «Maritimu» (Portugaliya), «Al-Ahli» (BAA), «Nasonal» (Portugaliya)
Terma jamoasi: J.Koreya. Ilk professional klubi: «Ayaks»
Terma jamoadagi debyuti: 2010 yil 7 sentyabr, J.Koreya - Eron
2015 yil 12 yanvarda «Setubal» klubiga o'tdi. Ayni paytda uning klubi Portugaliya chempionatida 9-o'rinda bormoqda. Sok Xyon Jun Portugaliya chempionati to'purarlari orasida 3-o'rinni band etgan. Uning o'yinida asosan, «Ayaks» maktabi an'analari yaqqol seziladi, uning Laos terma jamoasiga urgan ikki goli fikrimizga yaqqol isbotdir.
3. Mayk Xavenaar
Joriy mavsumda: 14ta o'yin, 8ta gol
Oldingi klublari: «Vitess» (Gollandiya), «Kordoba» (Ispaniya), «XIK» Xelsinki (Finlyandiya)
Terma jamoasi: Yaponiya
Ilk professional klubi: «Yokogama Marinos»
Terma jamoadagi debyuti: 2011 yil 2 sentyabr, Yaponiya - KXDR
Maykning otasi Dido asli gollandiyalik bo'lib, 1986 yilda Xirosimaga, «Mazda FK» safiga kelib qo'shilgan edi. Xavenaarlar oilasi 1994 yili Yaponiya fuqaroligini olishdi. Gollandiya to'purarlari orasida ayni paytda 6-o'rinda turibdi. «ADO Den Xaag» safiga 2015 yil 11 avgustda kelib qo'shildi.
2. Xirosi Kiyotake
Joriy mavsumda: 9ta o'yin, 3ta gol
Terma jamoasi: Yaponiya
Ilk professional klubi: «Oita Trinita»
«Gannover» safiga 2014 yilning yozida kelib qo'shilgan. Bundesligada 104ta o'yin o'tkazib, 14ta gol urgan. Ayni paytda «Gannover» klubi xavfli zonada joylashgan. Lekin Kiyotake yarim himoyachilar orasida 3ta gol bilan eng yaxshi ko'rsatkichni qayd etib turibdi.
Davomi InterFUTBOL gazetasi blogida.
— deya xabar beradi uff.uz nashri.