Nafaqat bundesliga, balki Evropaning eng sara klublari safidan joy olgan «Bavariya» futbol olamini doimiy ravishda yorqin ijrochilar bilan boyitib keladi. Mazkur jarayon hozir ham davom etmoqda. Marhamat, yaqin kelajakda klub afsonalari qatoridan joy olishlari taxmin qilinayotgan noyob iqtidorlar bilan tanishib, «Bavariya» naqadar chuqur ildiz otganiga ishonch hosil qiling.
Kingsli Koman, 19 yosh
«Yan Shlesserdan Frants Bekkenbauergacha» (mashhurlik darajasi) reyting shkalasidagi o'rni
Kecha. Garchi so'nggi paytlarda «Bavariya» hamyoni avvalgi saxovatpeshaligini biroz unutgan bo'lsada, o'ta ommaviy hisoblangan «O'zing yasa» jurnaliga yozilishni to'xtatmagan va yorqin yulduzlarni kashf etish an'anasini davom ettirmoqda. Ha,  klub akademiyasi David Alabadan keyin asosiy tarkibni sifatli «mahsulot» bilan ta'minlay olmadi. Shu bois, jamoa mutasaddilari o'z nigohlarini boshqa chempionat vakillariga qaratishdan o'zga chora topolmadilar. Xullas, myunxenliklar porloq kelajakka loyiq ko'rilayotgan 19 yoshli frantsuzni «Yuventus» zaxira o'rindig'idan topib, ijara shartnomasi uchun naq 7 mln. evroni hech ikkinlanmay sanab berishdi. Komanning avvalgi mavsumda hammasi bo'lib, 26 marta maydonga tushgani va bor-yo'g'i bitta gol urgani ham Gvardiolani xariddan qaytarolmadi. Chunonchi, Kingsli driblingning o'ta murakkab usullarini o'zlashtirgan. «Shu paytgacha, 17 yoshida bunday murakkab fintlarni amalga oshiradigan o'yinchi bilan ishlagan emasdim. Shu sababli, uni jamoaga qo'shib oldim»,- degandi «Bavariya» ustozi.
Bugun. Koman Myunxenda yuksak iste'dodini namoyish etish uchun etarli imkoniyatga ega bo'ldi. Ajoyib jismoniy tayyorgarlik va yuqori tezlikka ega yosh iqtidor Gvardiolaning shafqatsiz rotatsiya muhitida ham o'zini ummondagi nahangdek erkin his etdi va ilk marta maydonga tushganidayoq nechog'li foydali o'yinchi ekanligini ko'rsatdi. Qizig'i, futbolchining o'zi ham murabbiy tomonidan bildirilgan yuksak ishonchdan lol qolganini yashirmadi: «To'g'risini aytsam, menga shunchalik ko'p o'yin amaliyoti berishlarini sira o'ylamagandim. Maydonga qanchalik ko'p tushsam, salohiyatimga ishonch hissi shunchalik ortib bormoqda. Harqalay, menda xatoga yo'l qo'yish xususida qandaydir qo'rquv yo'q. Boz ustiga, jamoadoshlarim ham menga to'la-to'kis ishonishmoqda». Koman joriy mavsum EChLning eng yaxshi assistenti bo'lib turibdi. Vaholanki, uning Myunxenga kelgunga qadar nufuzli turnirdagi ishtiroki atigi 120 soniyaga (!) teng edi. Frantsiyalik futbolchi shuning bir daqiqasini «Yuventus Stedium»da «Borussiya»ga qarshi kechgan nimchorak final bahsida sarflagandi U yana final («Barselona» bilan)da ham 1 daqiqa o'ynash imkoniyatini hosil qilgandi.
Ertaga. Koman qanchalik noyob iqtidor sohibi bo'lmasin, hozircha «Bavariya»ning taniqli yulduzlari qo'lidagi shogird, xolos. Boshidagi yigitchalarga xos soch turmagi ham shundan dalolat beradi. Darvoqe, Kingsli Germaniyada ham sochlariga qizil, sariq va yashil rangli halqalarni taqib, vatani - Gvineya bayrog'ini aks ettirardi. Biroq bu xatti-harakati GFIga ma'qul kelmadi va futbolchiga halqalardan foydalanishni taqiqlab qo'yishdi. Shuningdek, Koman bolalarcha qiliqlardan imkon qadar tezroq qutulib, chinakam professionalga aylanishi uchun jamoa uni Frank Riberining otalig'iga topshirdi. Endilikda «Bavariya»ning 7- raqamli afsonasi boy tajribasini o'zidan 13 yosh kichik va serg'ayrat, iste'dodli, tezkor vatandoshiga o'rgatmoqda. Demak, yaqin vaqtlar ichida Kingsli Komanning Myunxen klubida asosiy o'yinchilardan biriga aylanishini taxmin qilish mumkin.
Davomi InterFUTBOL gazetasi blogida.
— deya xabar beradi uff.uz nashri.