Ko'z-ochib yumguncha 2015 yil ham nihoyalanib boryapti va o'z o'rnini yangi 2016 yilga bo'shatib bermoqda. Tabiiyki, har qanday inson ortda qolayotgan mazkur yil haqida o'ylaydi va uni o'zicha sarhisob qiladi. Bu har bir sohada mavjud bo'lib, an'ana tusiga kirgan. Shu nutqai nazardan qaraganda, milliy futbolimizda ham bir qator e'tiborga molik voqealar kuzatilganini aytib o'tishimiz kerak. 2015 yil yakunlariga bag'ishlab futbolimizda yuz bergan eng muhim holatlarni eslab o'tishga qaror qildik.
Yanvar
2015 yil futbolimiz uchun juda muhim musobaqa bilan boshlangan. Yodingizdan ko'tarilmagan bo'lsa, ushbu yilning boshida Avstraliya yashil maydonlarida Osiyo Kubogi o'tkazilgandi. Bu esa qit'amiz uchun nihoyatda jiddiy turnir sanaladi. Unda milliy terma jamoamiz ham qatnashdi. Guruhda KXDRni 1:0 hisobida mag'lubiyatga uchratdi, Xitoyga 1:2 hisobida engildi va Saudiya Arabistonini 3:1 natijasi bilan enggan holda chorak finalga yo'l oldi. U erda esa vakillarimiz Janubiy Koreya terma jamoasiga 0:2 hisobida mag'lubiyatga uchradi. Shu tariqa O'zbekiston uchun Osiyo Kubogi musobaqasi o'z yakuniga etdi.
Fevral
Odatda mazkur oyda biror-bir jiddiy musobaqaning yoki futbolimiz uchun o'ta muhim voqealarning yuz berishi kamdan-kam kuzatiladi. Bu safar e'tiborga molik jihat sifatida shuni aytishimiz kerakki, 17 fevral kuni “Bunyodkor” klubi Toshkentda Osiyo Chempionlar ligasi guruh bahslariga yo'l olish uchun pley-offda BAAning “Al Jazira” klubi bilan bellashib 2:1 hisobida g'alaba qozondi va guruh bosqichiga yo'l oldi.
Mart
Bahor faslining ilk oyida Superkubok o'yini o'tkazilganini alohida e'tirof etishimiz kerak. Yodingizdan chiqmagan bo'lsa, 7 mart sanasida o'tkazilgan uchrashuvda “Lokomotiv”, “Paxtakor” bilan bellashgandi hamda 4:0 hisobidagi ishonchli g'alabani qo'lga kiritib mamlakat Superkubogini qo'lga kiritdi. Shundan keyin “oliy liga-2015” musobaqasi ham start oldi. Darvoqe, ushbu oyda O'zbekistonning 2014 yildagi eng yaxshi futbolchisi ham aniqlandi. Odatda bunday tadbir qishda, aniqrog'i, yil yakunlariga yaqin o'tkazilishi joiz edi. Ammo o'sha paytda milliy terma jamoamizning Osiyo Kubogiga tayyorgarlik ko'rayotgani munosabati bilan yilning eng yaxshilarini taqdirlash marosimi biroz ortga surildi. Xullas, ushbu tadbir mart oyida o'tkazildi va unda “Krasnodar” sharafini himoya qilayotgan Odil Ahmedov 2014 yilning eng yaxshi futbolchisi deb e'tirof etildi.
Aprel
Ushbu oyda eng muhim voqelik sifatida shuni aytishimiz kerakki, Farg'onada yangi muhtasham “Istiqlol” stadioni foydalanishga topshirildi. Uning ochilish marosimida esa O'zbekiston yoshlar terma jamoasi bilan Yangi Zelandiya yoshlar terma jamoasi o'zaro o'rtoqlik uchrashuvini o'tkazdi va unda vakillarimiz 1:0 hisobida g'alaba qozonishdi.
May
Afsuski, ushbu oyda Osiyo Chempionlar ligasida qatnashayotgan “Paxtakor”, “Lokomotiv”, “Nasaf” va “Bunyodkor” klublari o'z ishtiroklarini yakunlashdi va guruhda qolib ketishdi. Aynan ushbu oyda O'zbekiston olimpiya terma jamoasi Bangladeshda o'tkazilgan saralash musobaqasida Qirg'izistonning yordami bilan Osiyo Kubogiga yo'llanmani qo'lga kiritdi. Aytgancha, 31 may kuni Yangi Zelandiyada yoshlar o'rtasidagi jahon chempionatiga start berildi. Shu bilan birga may oyida Eron chempionatida to'p surayotgan hamyurtimiz Fozil Musaev o'z klubi – “Sepaxon” bilan mamlakat chempionligini qo'lga kiritdi.
Iyun
Ravshan Haydarov boshchiligidagi yoshlar terma jamoamiz jahon chempionatining guruh bosqichidan muvaffaqiyatli o'tdi. Nimchorak finalda Avstriya ishonchli tarzda 2:0 hisobi bilan dog'da qoldirildi. Chorak finalda esa Senegalga imkoniyat boy berildi. Shuningdek, ushbu oyda ilk marotaba jahon chempionati bilan Osiyo Kubogi saralash turniri birlashtirildi. Milliy terma jamoamiz esa dastlabki turda Pxenyanda KXDRga 2:4 hisobida mag'lubiyatga uchradi. Shundan keyin bosh murabbiy Mirjalol Qosimov iste'foga chiqarildi va uning o'rniga Samvel Babayan tayinlandi. Bundan tashqari ushbu oyda Toshkentning “Lokomotiv” klubi Angliyada prem'er-liga va chempionshipdan keyingi o'rinda turuvchi uchini divizon vakili – “Flitvud Taun” bilan o'zaro hamkorlik yuzasidan shartnoma imzolandi. Unga ko'ra “Lokomotiv”ning ikki tarbiyalanuvchilari – Rustan Nortojiev bilan Sergey Proxorov uch oy davomida “Flitvud Taun” jamoasida malaka oshirib qaytishdi. Iyunda shuningdek, Jizzaxdagi yangi stadion nihoyat foydalanishga topshirildi. Yangi o'yingohdagi dastlabki uchrashuvda “So'g'diyona” “Qo'qon-1912”ni 2:1 hisobida mag'lub etdi.
Iyul
Yozning ikkinchi oyidagi eng muhim voqea shu bo'ldiki, “Bunyodkor” klubi tarbiyalanuvchisi Sardor Rashidov Qatarning “Al Jayish” jamoasiga ko'chib o'tdi. Uning transferidan “Bunyodkor” yaxshigina daromad oldi. Ayni paytda esa Rashidov o'zga bildirilgan ishonchni muvaffaqiyatli tarzda oqlab kelyapti.
Avgust
Ushbu oyda Davlatimiz rahbarining qaroriga asosan bir qator sohalar egalariga Davlat mukofotlari topshirildi. Ularning orasida “Nasaf” futbol klubi Akademiyasi murabbiyi Nurali Sultonov ham bor.
Sentyabr
3 sentyabr kuni Toshkentdagi “Paxtakor” markaziy stadionida Samvel Babayan milliy terma jamoadagi dastlabki uchrashuvini Yamanga qarshi o'tkazib 1:0 hisobida g'alaba qozondi va shu tariqa u debyutini muvaffaqiyat bilan boshladi. Jasur Abduraimov boshchiligidagi yoshlar terma jamoamiz esa saralash bosqichidan eson-omon o'tib olishdi. Shuningdek, ushbu oyda Temur Olimxo'jaev ustozlik qilayotgan o'smirlar terma jamoasi Falastinda tashkil etilgan saralash bosqichida ishtirok etib Osiyo chempionatiga yo'llanmani qo'lga kiritdi.
Oktyabr
12 oktyabr sanasida milliy terma jamoamiz Manamada Bahraynni 4:0 hisobida taslim qildi. Bungacha futbolchilarimiz u erdan g'alaba bilan qaytishmagandi. Shuningdek, 21 oktyabr kuni ichki chempionatimiz doirasida “Andijon” klubi Farg'onada “Neftchi” mehmoni bo'lib o'z tarixida birinchi marta safarda g'alaba qozondi - 1:0. Oktyabr oyidagi yana bir e'tiborga molik holat shu bo'ldiki, O'zbekiston futbol federatsiyasi prezidenti Mirabror Usmonov yig'ilish o'tkazib, unda “Paxtakor” – “Metallurg” (3:2) uchrashuvidagi sun'iy hatti-harakatlarni keskin tanqid ostiga olib, bekobodliklar bosh murabbiyi Rustam Mirsodiqovni yil oxiriga qadar litsenziyasidan mahrum qildi.
Noyabr
Ravshan Ermatov Osiyo Chempionlar ligasi finalining javob uchrashuvida Xitoyning “Guanchjou Evergrand” hamda BAAning “Al Ahli” klublari o'rtasidagi o'ta muhim o'yinni boshqardi va unda Luis Felipe Skolari shogirdlari 1:0 hisobi bilan g'alaba qozonishdi. Aytish kerakki, Ermatov faoliyati davomida to'rtinchi marta OChL final bellashuvini boshqardi. Noyabr oyida “Nasaf” klubi o'z tarixida ilk bor O'zbekiston Kubogini qo'lga kiritdi. Jizzaxdagi yangi stadionda bo'lib o'tgan final bahsida “Bunyodkor”ni 2:1 hisobida enggan “Nasaf” haqli ravishda O'zbekiston Kubogini qo'lga kiritdi. Bundan tashqari Hindistonning Nyu-Dehli shahrida Osiyoning eng yaxshilarini taqdirlash marosimida eng yaxshi yosh futbolchi nominatsiyasidan o'zbekistonlik Doston Hamdamov, Zabihillo O'rinboev va Eldor Shomurodov joy olishdi va unda Hamdamov g'olib chiqdi. “Paxtakor” esa ushbu oyda 11-marta O'zbekiston chempionligini qo'lga kiritdi. Birinchi ligada ikkinchi marta qatnashayotgan “Obod” birinchi marta oliy ligaga yo'llanmani qo'lga kiritdi. “Dinamo” esa elitani tark etdi.
Dekabr
2015 yilning so'nggi oyida Toshkentda Futzal bo'yicha Osiyo chempionatiga qur'a tashlash marosimi o'tkazildi. Kelasi yilning 10-21 fevral kunlari bo'lib o'tadigan qit'a musobaqasiga poytaxtimiz mezbonlik qilishi bois uning qur'a tashlash marosimi ham ajoyib tarzda tashkillashtirildi. 22 dekabr kuni PFLda “Oliy liga-2016” uchun qur'a tashlash marosimi ham o'tkazildi. Shu bilan birga Globe Soccer Awards talqini bo'yicha 2015 yilning eng yaxshi hakami bo'lish uchun dunyo qit'asidan olti nafar hakam tanlab olindi va ularning orasidan hamyurtimiz Ravshan Ermatov ham joy oldi. Shu munosabat bilan FIFA referisi 27 dekabrda Dubayda uyushtirilgan mazkur tadbirning gala-shousiga taklif etildi. E'tiborlisi, hamyurtimiz ushbu talqin bo'yicha jahonning eng yaxshi hakami deb e'tirof etildi. G'alaba muborak, Ravshan! FIRDAVSXON Xayrullo Vasiev blogidan olindi.
— deya xabar beradi uff.uz nashri.