«Atletiko»ning uy stadioni maydoni chetida doimo chiroyli guldasta ko'rinib turadi. Madridda bir go'zal odat bor: «Atletiko»ning har bir uy uchrashuvida maydon chetiga 24 dona chinnigul terib qo'yiladi. Bu an'ananing o'ziga xos tarixi bor, albatta. Barchasiga «Atletiko»ning «oltin dubl» qayd etishiga katta hissa qo'shgan serb futbolchisi sababchi bo'lgan.
1995 yilning iyunida serbiyalik mashhur mutaxassis Radomir Antich «Atletiko» boshqaruvini o'z qo'liga oladi. U bosh murabbiy sifatida ish boshlab-boshlamay, klubning o'sha vaqtdagi prezidenti Xesus Xil oldiga transferlarga bog'liq xohishlari bitilgan ro'yxatni tashlaydi. «Atletiko» xo'jayini familiyalar bilan tanishib chiqar ekan, birdan xoxolab kulib yuboradi:
- Milinko Pantich, 29 yosh, «Panionios», Gretsiya chempionati... Bu hazil emasmi? Axir u Ispaniyada o'ynab ketolmaydi-ku. Umuman, «Atletiko» menejerlaridan hech biri ushbu talabni jiddiy qabul qilmaydi. Hamma boshqacha xayolga boradi: «Antich shunchaki, serbiyalik eski tanishini chaqirib, uning yaxshigina pul ishlab olishiga imkon yaratmoqchi». Bir qarashda, bunday gumonlarda jon bor edi, zero, Pantich 29 yoshigacha biror narsani qoyillatib qo'ygan emasdi. Ammo murabbiy negadir o'z talabida qat'iy turib oladi. Hattoki, Pantich ishtirokidagi o'yinlar yozilgan videokassetani topib, barchaga ko'rsatadi.
- Ushbu transferdan zarracha afsuslanmaysizlar, - deya va'da beradi Antich rahbariyat vakillariga.
- Mayli. Lekin bilib qo'y, agar bu yigit o'ynolmasa, maoshingdan bir qismini kesib tashlayman, - qat'iy javob beradi prezident Xil. O'z navbatida, Antich bu shartga ko'nadi va tomonlar bir-birlariga qo'l tashlashadi. Shunday qilib, oradan bir hafta o'tgach, «Atletiko»da yangi yarim himoyachi paydo bo'ladi. Milinko Pantich darhol shunday faol o'ynay boshlaydiki, murabbiyning o'z hamyonidan xavotirlanishiga ham imkon qolmaydi. Serb yigiti 1-turdayoq jarima zarbasini golga aylantiradi. Keyin esa zargarona uzatmalari bilan «matraschilar»ning o'yinlariga o'zgacha jilo beradi. Shuningdek, bir qator gollarga hammualliflik qiladi. Ko'p o'tmay, Pantich Madrid klubida standart vaziyatlarning shtatli ijrochisiga aylanadi. Mavsum o'rtalariga borib, uning ijrosidagi burchak zarbalaridan xuddi penaltidek cho'chiydigan holatga kelishadi. Xullas, Milinko bahorgacha o'z hisobidagi gollar sonini 10taga etkazadi va chamasi 20ta aniq zarbaga assistentlik qilishga ulguradi. Bunday ajoyib ko'rsatkichi «Atletiko»ning chempion bo'lishida rosa qo'l keladi. Qolaversa, Pantich «Barselona»ga qarshi kechgan Ispaniya kubogi finalidagi yagona golni ham o'z nomiga yozib qo'yadi.
«Oltin dubl» - bu albatta, ajoyib, biroq o'ziga xos an'ana qabilida abadiy tarixga kirish uchun baribir, kam. Pantichga esa «Atletiko» tarixiga kirishi uchun bitta oddiy voqea yordam bergan. 1996 yilning 28 yanvar kuni «Atletiko»ning oddiy muxlisalaridan biri Margarita Luengo stadion yaqinidagi barda do'stlari bilan ko'rishadi - doimgidek, navbatdagi o'yin arafasida. Nogahon uning ko'zi oyna oldida turgan ulkan guldastaga tushadi. Shunda muassasa xodimiga yuzlanib, iltimos qiladi: «Hoy do'st, anavi chinniguldan 4 dona bersangiz, bugun «Atletik» darvozasiga shuncha gol uramiz!» Yig'ilganlar bu gapga qarsak chalishadi, bar ma'muri esa xursandchilik bilan vazadan 4ta chinnigul olib beradi.
- O'yinda har bir goldan so'ng maydon tomon bitta gulni uloqtirdim. «Atletiko» 4:1 hisobida g'alaba qozondi, demakki, men qo'limdagi gullarning barchasini tashladim. O'shanda «Atletiko»ning 4ta golidan 2tasini Pantich urgandi - burchak to'pidan. Tabiiyki, 2ta gulni burchak bayroqchasi yoniga uloqtirdim, - deya eslaydi Margarita.
Navbatdagi burchak zarbasini amalga oshirishga shaylangan Pantich xalal bergan gullarni ehtiyotsizlik bilan bir chetga uloqtiradi. Buni ko'rgan Margarita darrov qog'ozchaga «Chinnigullarni bunday tashlab yubormang, axir ular siz uchun», deya yozib, uni klub xodimi orqali futbolchiga yuboradi.
 O'yindan so'ng «murojaatnoma»ni olgan Pantich shunchalik xijolat tortadiki, klub xizmatchisidan o'sha muxlisaning uy telefoni raqamini topib berishini so'raydi. Yana 2 kundan so'ng esa darhaqiqat, qo'ng'iroq qilib, undan uzr so'raydi. Hattoki, keyingi uy uchrashuvi tugagach, Margaritaga o'z futbolkasini sovg'a sifatida beradi.
- Pantich nafaqat jarima zarbalarini ustalik bilan bajaruvchi ajoyib futbolchi, balki shunday inson ham. Shaxsan men bunchalik ma'nan boy odamlarni juda kam uchratganman, - deydi Margarita.
Shu-shu «Atletiko»ning har bir uy uchrashuvi chog'i burchak bayroqchasi yoniga 24ta chinnigul qo'yish odatga aylandi. Ulardan 12tasi qizil, qolgan 12tasi oq - bu klubning rasmiy ranglariga muvofiq.
Davomi InterFUTBOL gazetasi blogida.
— deya xabar beradi uff.uz nashri.